كوكشەتاۋلىق الماگۇل ەركىنبەكوۆانىڭ باسىنان كەشكەنىن تارقاتىپ ايتساڭىز, يمانىڭ قاسىم بولعانداي. جولداسى اۆتوكولىك اپاتىنان قايتپاس ساپارعا اتتانىپ, شيەتتەي التى بالامەن اڭىراپ جەسىر قالعان جالعىزىلىكتى ايەل تاعدىردىڭ تاقسىرەتتى سىنىن كوپ كوردى. ايتسە دە سىنعان جوق, سىنۋعا حاقىسى دا جوق ەدى. التى بالانى قاتارىنان كەم قىلماي جەتكىزۋ كەرەك. بىراق سول سالماق جالعىز ايەلگە وڭاي ما؟! باسىندا باسپاناسى دا جوق. بىرەۋدىڭ اۋلاسىنداعى قۇرقىلتايدىڭ ۇياسىنداي, ات اينالعىسىز كىشكەنتاي ءۇيىن جالعا العان. تاعدىر ءبىر قىرىنا السا بولمايدى ەكەن عوي. ءبىر كۇنى ءومىر وتى كۇيدىرگەنى ازداي, الگى باسپانانىڭ جالىن قۇشاعىندا قالعانى. ايتەۋىر, ۇلكەن قىزى قىزىل ءتىلى سۋماڭداپ, قىپ-قىزىل قاسىرەت اكەلە جاتقان ءورت قۇشاعىنان ەكى باۋىرىن امان-ەسەن الىپ شىعىپتى. ءوزى جۇمىستا بولاتىن. كەيىن ەستىگەندە كۇيىكتەن جۇرەگى جارىلىپ كەتە جازدادى.
تابىسى دا شامالى. ارزان پاتەر ىزدەپ قالانىڭ ءبىر قيىرىنان ەكىنشى قيىرىنا دەيىن ءسۇزىپ شىعادى. نەسىن ايتاسىز, باسپانانىڭ زارى ابدەن ءوتىپ تۇرعان. بىراق ءتاڭىردىڭ ءوزى كوپ جىلاتقان پەندەسىن تۇبىندە ءبىر قۋانتادى ەكەن عوي. ءماۋلىت مەيرامىنا جينالعان قاراقۇرىم حالىقتىڭ الدىندا قازاقستان مۇسىلماندارى ءدىني باسقارماسىنىڭ اقمولا وبلىسى بويىنشا وكىلى, ناۋان حازىرەت مەشىتىنىڭ باس يمامى قۋانىش ءسابيتتىڭ قولىنان ەكى بولمەلى پاتەردىڭ كىلتىن العاندا توبەسى كوككە ءبىر-اق ەلى جەتپەي قالعان.
ءجۇزى بالبۇل جانىپ الابۇرتقان, مىناۋ جارىق دۇنيەدە جانى ىزگى جاقسى ادامداردىڭ بار ەكەندىگىنە قۋانعان الماگۇلدىڭ باسىنداعى شاتتىقتى سيپاتتاۋ ءسىرا, مۇمكىن ەمەس. اق تۇيەنىڭ قارنى جارىلعان دەگەن وسى بولار.
ەندى ءدۇيىم جۇرت كۋا بولعان, اسەرى مول, ادەمى ءىستى تۇپتەن تارتىپ ساباقتاپ كورەلىك. «زەكەت» قورى 2012 جىلى ءوز جۇمىسىن باستاعان. العاشقى بەتتە كوپشىلىكتىڭ ساداقاعا بەرگەن قاراجاتىمەن مۇقتاج ادامدارعا كومەك كورسەتۋدى مۇرات تۇتقان قوردىڭ جۇمىسى ۋاقىت وتە كەلە اۋقىمىن كەڭەيتتى. مۇقتاجدارعا عانا ەمەس, وزگە دە ىزگى نيەتتى ىسكە جۇمساي باستادى. ماسەلەن, «مەكتەپكە جول» ءتارىزدى اكتسيالار. بيىل مىڭعا جۋىق بالاعا وقۋشى سومكەسىمەن قوسا, قاجەتتى وقۋ قۇرالدارىن ساتىپ اپەردى. قۇربان ايتىندا 25 توننادان استام ەتتى الەۋمەتتىك جاعىنان از قامتىلعان وتباسىلارىنا تاراتتى. جالعىز بۇل عانا ەمەس, كۇندەلىكتى قاجەتتى وتىن-كومىر, ۇن, كارتوپ ءتارىزدى ازىق-ت ۇلىك ساتىپ اپەرۋدى دە داستۇرگە اينالدىردى.
– ناۋان حازىرەت مەشىتىنىڭ باس يمامى قۋانىش ءسابيتتىڭ باستاماسىمەن «ەل ۇلەسى – پاتەرگە» جوباسى قولعا الىنعان بولاتىن, – دەيدى «زەكەت» قورىنىڭ جاۋاپتى وكىلى ەربولات ءشارىپ, – ەڭ الدىمەن كوپبالالى وتباسىلارىنا ەل بولىپ قاراجات جيناپ, ءۇي ساتىپ اپەرۋدى مەجەلەپ وتىرمىز.
الدىمەن اعايىن قۇلاقتانعان. جۇما نامازىنا جينالعان جۇرتشىلىققا جاڭا جوبانىڭ ىزگىلىكتى قىر-سىرى جەتكىزىلگەن. ارنايى تاقتا دايىندالىپ, ءمولدىر ءتۇستى پلاستيكتەن جاشىك جاسالىپ, كوپشىلىكتىڭ قاراجاتى سوعان سالىناتىن بولعان. باسپانا ساتىپ الۋعا تولايىم جەتەتىن قاراجات از ۋاقىتتىڭ ىشىندە جينالىپتى. بۇل زايىرى ادامداردىڭ ىزەتتى كوڭىلىنىڭ قانداي ەكەندىگىن ۇقتىرسا كەرەك.
وبلىس ورتالىعىندا باسپانانىڭ باعاسى كۇيىپ تۇر. ال بۇرىن اۋدان ورتالىعى بولعان, قازىرگى كۇنى وبلىس ورتالىعىنا قارايتىن كراسنويار اۋىلى كىمگە بولسىن قولايلى-اق. كولىك قاتىناسىندا ءمىن جوق. وسى اۋىلداعى وكتيابردىڭ 50 جىلدىعى كوشەسىندەگى ەكى قاباتتى ۇيلەر جاڭا جوبانىڭ جولىن اشقانداي. قابىرعاسى ءبۇتىن, شاتىرى ساۋ ۇيلەردىڭ ىشكى ارلەۋ جۇمىستارىن عانا جۇرگىزۋ كەرەك. ال باعاسى ارزان. وسى ۇيدەن پاتەر الىپ, سوڭعى ۇلگىمەن جوندەۋ جۇمىستارىن جاساپ, جاڭا جيھاز ساتىپ العان سوڭ قۇلازىپ تۇرعان باسپانا قىزدىڭ جيعان جۇگىندەي جۇتىنىپ شىعا كەلدى. ەندىگى ماسەلە ۇمىتكەرلەردى وكپەلەتپەي, ءادىل شەشىمىن تابۋ. ادىلدىگىمەن اتى شىققان ەل اقساقالدارىنان تورالقا قۇرىلدى. ماسەلەنى سولار شەشپەك. ءبىر پاتەر موڭعوليادان تۋعان توپىراعىنا ورالعان جەتى بالانىڭ اناسى, جەسىر ايەل ماۋلەنگۇل تارباحقا بەرىلسىن دەپ شەشتى اقساقالدار. جايدان-جاي ايتا سالعان جوق, بايلام جاساردىڭ الدىندا جەتى بالالى جەسىر انانىڭ تۇرمىسىن كوزدەرىمەن كورىپ كەلدى. جاتاقحانانىڭ جالعىز بولمەسىندە تۇراتىن كوپبالالى انانىڭ جاعدايى شىنىندا دا ادام ايايتىنداي ەدى. جاقسىلىقتان ءۇمىت ۇزبەگەن ماۋلەنگۇل تارباح رامازان ايىنىڭ العاشقى كۇنى وتكىزىلگەن شارا بارىسىندا ەكى بولمەلى پاتەردىڭ كىلتىن ايالاي قىسىپ, ايىرىلىپ قالارداي الاقانىن تارس جۇمىپ ۇستاعان ساتتە جانارىنان جاس ساۋلاپ تۇرعان. كوپ بالالى انانىڭ اق جۇرەگىنەن اقتارىلعان العىسى مەرەكەگە جينالعان جالپاق جۇرتتى تەبىرەنتىپ جىبەردى.
– جاقسىلىق جاساۋعا قۇمارلار كوپ, – دەيدى قوردىڭ جاۋاپتى وكىلى ەربولات ءشارىپ, – ەكى-ءۇش مىڭ تەڭگە جاشىككە سالۋ قيىن ەمەس قوي. ونى ايتاسىز, ەل قۇلاقتانعان سوڭ ءجۇز مىڭداپ بەرگەن ازاماتتار بار.
قازاق ەجەلدەن جومارت حالىق. استىنداعى جالعىز اتىن جولاۋشىعا ءتۇسىپ بەرگەن «اتىمتايلاردىڭ» بۇگىنگى جالعاسى دا بار ەكەن. سوعان قۋاندىق. رۋحاني جاڭعىرعان, وتكەنىنەن وشپەس ۇلگى العان جاسامپاز جاقسىلىقتىڭ جالعاسى وسى ەمەس پە؟!
بايقال ءبايادىل,
«ەگەمەن قازاقستان»
اقمولا وبلىسى
