سۋرەتشى-مونۋمەنتاليست ا.نازارقۇلدىڭ شىعارماشىلىق تۋىندىلارىنىڭ قايسىسى بولسىن تاريحي دا تاعىلىمدى مازمۇنىمەن دارالانادى. ونىڭ شىعارمالارىنىڭ كوركەمدىك شەشىمى ەپيكالىق سيپاتپەن جىرلانعان ءومىر شىندىعىندا جاتىر. «قورقىتتىڭ ءۇش بۇلاعى», «ازيا ءبيبى», «بابالار رۋحى», ء«ۇش گراتسيا», «توميريس», «تۇنگى جولاۋشى», «ارالدى اڭساۋ», «كەنتاۆر», «كاتارسيس» سىندى تۋىندىلارىندا تاريحي دەرەكتى وقيعالاردى نەگىز ەتە وتىرىپ, كەڭ تىنىسپەن جىرلايدى. قازاق تاريحىنداعى ەلەۋلى ورنى بار تۇلعالاردىڭ كەسەك بولمىسى مەن باتىرلىق, ەرلىك داستاندارىن اۆتورلىق بايىپتاۋمەن جاڭاشا تۇرلەنتكەن شىعارمالار قاتارىن «حان ەركە», «ەدىل باتىر», «قورقىت اتا», «فارابي», «اباي» كومپوزيتسياسى تولىقتىرا تۇسەدى. ال سوڭعى جىلدارى سالىنعان كارتينالار قاتارىنداعى كۇردەلى سيۋجەتىمەن ەرەكشەلەنەتىن ايتماتوۆ تاقىرىبى ءبىر توبە دەۋگە بولادى. ساباقتاسقان وقيعالارعا قۇرىلعان «دودا», «ورلەۋ», «اق كۆادرات» سەريالى تۋىندىلارىنا ايگىلى قالامگەردىڭ شىعارماشىلىعى مەن ءومىر جولىن ارقاۋ ەتكەن.
– ستۋدەنت كەزىمدە ايتماتوۆ شىعارمالارىن ەرەكشە جاقسى كورىپ وقىدىم. جىلدار وتكەن سايىن قالامگەردىڭ تۇلعالىق بولمىسى كوڭىل تۇكپىرىندە ىرىلەنە ءتۇستى. مىسالى, «اق كۆادرات» اتتى كارتينامدا ايتماتوۆ دۇنيەتانىمى تۇرعىسىنان باعامداپ, بۇگىنگى زاماناۋي عىلىم مەن كەشەگى وتكەن تاريحتىڭ اراجىگىن, ونەر مەن ءومىردىڭ ءتۇرلى قۇبىلىستارىن وزىمشە كوركەم بەينەلەگىم كەلدى, – دەيدى سۋرەتكەر.
قوعامدىق ومىردەگى كۇرمەۋى قيىن كەي ماسەلەلەر دە امانات نازارقۇلدىڭ نازارىنان تىس قالعان جوق. ماسەلەن, قازاق دالاسىنىڭ كوركى مەن كيەسى سانالعان كيىك جانۋارىنىڭ تاعدىرى بەينەلەنگەن «دالا مۇڭى» گرافيكالىق كومپوزيتسياسىندا اۆتور كوزقاراسى ايقىن كورىنەدى. ءبىر-بىرىنە يىق تىرەستىرە سۇيكەنگەن قوس بالبالدىڭ كۇرسىنىسى مەن اياق استىنا تاپتالا, اق سوڭكە بولىپ شاشىلعان كيىكتەردىڭ سۇيەگى جان تۇكپىرىندەگى كوڭىل تولقىنىسىن تاپ باسقان. دالا مەن تابيعات پەرزەنتى ادام ۇندەستىگىن دالمە-ءدال كورسەتكەن شتريحتىق قولتاڭباسىنان سۋرەتشى مانەرى انىق تانىلادى.
ايا ءومىرتاي,
«ەگەمەن قازاقستان»
