Zhas project جاستار كورپۋسىن دامىتۋ – دۇنيەجۇزىلىك بانك پەن ءبىلىم جانە عىلىم مينيسترلىگىنىڭ بىرلەسكەن جوباسى.
– ۇيلەستىرۋ اگەنتتىگى الدىڭعى جىلى قاناتقاقتى جوبانى قاراعاندى, پاۆلودار, وڭتۇستىك قازاقستان جانە الماتى وبلىستارىندا جۇزەگە اسىرۋدى قولعا العان بولاتىن. ءسويتىپ وسى 4 ايماقتا 18-29 جاس ارالىعىنداعى ەكى مىڭعا جۋىق جاستى قامتىدى. ولار الەۋمەتتىك يدەيالاردىڭ نەگىزىندە 589 جوبا ۇسىندى. گرانتتىق بايقاۋعا قاتىسۋ ءۇشىن جاستار 3-5 ادامنان تۇراتىن توپتارعا بىرىگىپ, ءبىزدىڭ سايتتا ورنالاسقان تالاپتارعا سايكەس ەلەكتروندى تۇردە ءوتىنىش بەرە الادى. قاتىسۋشىلارعا قويىلاتىن نەگىزگى تالاپتارعا توقتالار بولساق, جاستار جوبا جۇزەگە اسىرىلاتىن ايماقتا تۇرۋى قاجەت. ولاردىڭ جاس مولشەرىنە, قولعا العان باستامالارىنا قاجەتتى قۇجاتتارىنىڭ تۇگەل بولۋىنا قاتىستى دا تالاپتار بار. ارينە, ەڭ باستىسى, ىنتا-ىقىلاسىنا كەلىپ تىرەلەدى. بىلتىر قوستاناي, شىعىس قازاقستان, سولتۇستىك قازاقستان, اقتوبە, جامبىل جانە قىزىلوردا سىندى 6 وبلىس قوسىلدى. بيىل قالعان ءتورت وبلىستى جانە استانا مەن الماتىنى تارتامىز. وسىلايشا, ءۇش جىلدىڭ ىشىندە قازاقستان جاستارى مۇمكىندىگىنشە «Zhas project» جوباسىنىڭ قايتارىمسىز گرانتتارىنا يە بولا الادى, – دەيدى بىرلەستىك ءتورايىمى ۆەرا كيم.
بىلتىر گرانتقا ۇمىتكەر ادامداردىڭ جاس شەكتەۋىنە ازداعان وزگەرىس ەنگىزىلىپ, 14-29 جاس ارالىعى قامتىلدى. ايتا كەتەرلىگى, گرانتتى الۋ ءۇشىن كەرەمەت يننوۆاتسيالىق جاڭالىق تابۋ قاجەت ەمەس. قاراپايىم مىسال ءۇشىن ايتساق, اۋىلدا شاعىن ناۋبايحانا اشۋدى ۇسىنعان جاستارعا دا قولداۋ كورسەتىلەدى. ەڭ باستىسى, ەلگە دە, ىسكەر ازاماتتىڭ وزىنە دە پايداسىن تيگىزسە بولعانى. جوبا جۇزەگە اسىرىلاتىن التى اي ىشىندە جاستار شاكىرتاقىمەن قامتاماسىز ەتىلىپ, تيىسىنشە اۋىل تۇرعىندارىنا ناندى اقىسىز تاراتۋى كەرەك. جوبانىڭ الەۋمەتتىك دەپ اتالۋى دا وسىدان كەلىپ تۋادى.
مال جانە قۇس شارۋاشىلىعى, اعىلشىن ءتىلىن وقىتۋ, تىگىن تسەحتارى, باسقا دا كوپتەگەن الەۋمەتتىك باعىتتاعى جوبالار بار. بەرىلگەن گرانتقا ساتىپ الىنعان جابدىقتار نەمەسە ءتورت ت ۇلىكتەردىڭ ءبارى وزدەرىندە قالادى. ياعني, ولار ءوز ءىسىن ءارى قاراي دامىتۋعا مۇمكىندىك الادى.
– ءبىر قىزىق جوبا بولدى. الماتى وبلىسىندا ەتى ءتىرى جاستار بىرىگىپ, ءبىراز سيىر ساتىپ الىپ, ءسۇتىن اۋىل تۇرعىندارىنا تاراتىپتى. ءبىر قاراعاندا جاي عانا مال شارۋاشىلىعى سياقتى. كەيىن زەرتتەپ كورسەك, بۇل اۋىلدا كالتسي مەن باسقا دا دارۋمەندەردىڭ جەتىسپەۋشىلىگىنە بايلانىستى سۇيەك جۇيەسى اۋرۋلارىنا شالدىققان ادامدار باسقا وڭىرلەرمەن سالىستىرعاندا كوپ ەكەن. دەمەك, ونى قولداۋ كەرەك, – دەيدى ۆەرا الەكساندروۆنا.
يپپوتەراپيا, ياعني سالت اتپەن ءجۇرۋ ارقىلى ەمدەۋ ءادىسىن قولعا العاندار دا بار. جالپى, مەديتسيناعا قاتىستى كەز كەلگەن جوباعا ۇيلەستىرۋشى توپ ەرەكشە ساقتىقپەن قارايدى. تەكسەرە كەلگەندە, يپپوتەراپيانى قولعا الۋشى ازاماتتىڭ بارلىق ءتيىستى قۇجاتتارى تۇگەل ەكەندىگى انىقتالدى. جاس جىگىت ماسكەۋدە مەديتسينالىق ۋنيۆەرسيتەت بىتىرگەن بىلىكتى مامان بولىپ شىققان. اۋىلدىق جەرلەردە وسىنداي ارنايى ءبىلىمى بار مامانداردىڭ بولۋى وتە ماڭىزدى. قازىر ونىڭ كومەگىنە جۇگىنگەن ءبىراز ناۋقاس بالالار دەرتىنە شيپا تاۋىپ, اتا-انالارى العىسىن جاۋدىرىپ تۇرادى.
– وسىنداي پايدالى ىستەر ءوز ناتيجەسىن بەرىپ جاتقانىن كورگەندە بەكەر جۇمىس ىستەمەيتىنىمىزدى تۇسىنەمىز. ءبىز ءاربىر قاتىسۋشى ءومىرىنىڭ وڭ باعىتقا وزگەرۋىنە جانە ولاردىڭ ارماندارىنا جەتۋ ءۇشىن العاشقى قادامدارىن باستاۋىنا, قوعامنىڭ ماسەلەلەرىن شەشۋگە اتسالىسۋىنا ىقپال ەتكىمىز كەلەدى, – دەيدى ۆ.كيم.
ءار جوبا جاستاردىڭ وزىنە عانا ەمەس, ولار ءومىر سۇرەتىن قوعام ءۇشىن ماڭىزدى. جوبادا جۇمىس ىستەگەن التى اي ىشىندە جاستار وزدەرىنە پايدالى كوپ نارسەنى ۇيرەنەدى. ال قابىلەتى بار ازامات ءارى قاراي باسقا دا قىزمەتتە ءوزىنىڭ جۇمىسىن كورسەتە الاتىنى ءسوزسىز. دەمەك, ولاردى قولداۋ ءۇشىن اتقارىلعان جۇمىس, توگىلگەن تەر تەككە كەتپەگەنى.
ارنۇر اسقار,
«ەگەمەن قازاقستان»
