كونە تاراز, ايگىلى اۋليەاتا ايماعىندا ءتۋريزمدى دامىتۋ ارقىلى ءالى دە زەرتتەۋدى قاجەت ەتەتىن, تانىتۋدى كەرەكسىنەتىن جەرلەر بار. بۇل ورايدا اۋليەاتا وڭىرىنە كەلگەن ءاربىر تۋريست كونە مەكەن تۋرالى تىڭ دەرەكتەردى تابا الاتىن جاعدايدا بولۋى كەرەك. ياعني, تۋريستەر تارازدان تاڭداعانىن تابۋى ءتيىس. دەگەنمەن, ءوڭىر بويىنشا تۋريستەردىڭ كومەكشىسىنە اينالۋعا ءتيىس دەلىنەتىن تۋريستىك سايتتىڭ جۇمىسى قازىر كوڭىل كونشىتپەي تۇر. «تاراز-تۋريزم» تۋريستىك اقپاراتتىق ورتالىعىمەن قۇرىلعان سايت نەگىزىنەن تەحنيكالىق شارتتارى بويىنشا قازاق, ورىس, اعىلشىن جانە قىتاي تىلدەرىندە جۇمىس ىستەۋى قاجەت بولاتىن. اتالعان ءتورت ءتىل بويىنشا بۇل سايتتان مۇندا كەلۋشى تۋريستەر وزىنە كەرەگىن تابا الۋى ءتيىس ەدى. الايدا, بۇگىنگى تاڭدا بۇل كەلەڭسىزدىككە شەتەلدىك مەيماندار تۇگىلى, جەرگىلىكتى تۋريزم سالاسىنىڭ وكىلدەرىنىڭ ءوزى نارازى بولىپ وتىر. اتالعان ماسەلە تۋراسىندا جامبىل وبلىستىق كاسىپكەرلەر پالاتاسىندا جامبىل تۋريستىك يندۋستريا قاۋىمداستىعى باسشىلىعىنىڭ قاتىسۋىمەن وتىرىس تا وتكەنى بەلگىلى.
«مەملەكەت باسشىسى كەز كەلگەن ءوڭىر ءۇشىن ەڭ پەرسپەكتيۆالى تابىس كوزدەرىنىڭ ءبىرى – وتاندىق تۋريزم جانە ونى ءارى قاراي دامىتۋ كەرەكتىگىن ايتتى. بۇل تابىستى سالاعا مەملەكەت تاراپىنان قولداۋ دا ەسەلەنگەن. ەندى جامبىل وبلىسى شەتەلدىك مەيماندار ءۇشىن تۋريستىك باعىت رەتىندە تانىلۋىنا قاجەتتى جاعداي جاساۋىمىز قاجەت. كەلۋشىلەر ءبىرىنشى كەزەكتە اقپاراتپەن قامتاماسىز ەتىلۋى كەرەك. ولار باراتىن مارشرۋت قانداي, وڭىردە قانداي تۋريستىك نىساندار بار دەگەن سياقتى ولكەنىڭ تاريحي ورىندارى مەن تانىمدى جەرلەرى تۋرالى اقپارات الۋ – باستى ماسەلە. بۇل تۇرعىدا وبلىستا العاش رەت تۋريستىك سايتتىڭ قۇرىلعاندىعى كاسىپكەرلەر پالاتاسى مەن تۋريزم جاناشىرلارى ءۇشىن جاعىمدى جاڭالىق بولدى. الايدا, قازىرگى تاڭدا بۇل سايتتىڭ جۇمىسى تۇرالاپ تۇر», دەيدى جامبىل وبلىسى كاسىپكەرلەر پالاتاسى ديرەكتورىنىڭ ورىنباسارى اسپانديار سەيسەباەۆ.
سونىمەن قاتار اسپانديار سەيسەباەۆ كەزىندە بيۋدجەتتىڭ ەسەبىنەن قۇرىلعان تۋريستىك «Taraz tour» سايتىنىڭ دۇرىس ءارى ۇزدىكسىز جۇمىس ىستەۋىنە كاسىپكەرلەر پالاتاسىنىڭ ماماندارى قاجەتتى كومەكتى تەگىن ۇسىنا الاتىنىن دا ايتىپ وتىر. ال جامبىل وبلىستىق تۋريزم باسقارماسىنىڭ ءبولىم باسشىسى جومارت حاجىنىڭ ايتۋىنشا, سايتتىڭ جۇمىسى قازىرگى تاڭدا پىسىقتالۋ ۇستىندە ەكەن. سونىمەن قاتار ول تەحنيكالىق ەرەكشەلىككە سايكەس تۋريستىك سايتتىڭ جۇمىسىن ساپالى جاڭارتۋ بويىنشا ۇيىمداستىرۋ ءىس-شارالارى جۇرگىزىلەتىنىن, تۋريستىك الەۋەتكە باي وڭىرىمىزدە تۋريزم سالاسىن تانىمال ەتۋ ماقساتىندا ءتۇرلى دەڭگەيدەگى ءىس-شارالار ۇيىمداستىرىلىپ تۇراتىنىن جەتكىزدى.
«ماسەلەن, تارازدا جۋىردا عانا قالىڭ بۇقارانىڭ باسىن قوسقان «Aspara fashion week», «Food tourism-2018» سياقتى ءىس-شارالار جوعارى دەڭگەيدە ءوتتى. الداعى ۋاقىتتا تۋريستىك باعىتتاعى ءىس-شارالاردى ۋاقتىلى جانە ساپالى وتكىزۋ ماقساتىندا جانە كونكۋرستىق قۇجاتتامانى دايىنداۋ كەزىندە ۇسىنىستار ەنگىزۋ ءۇشىن وڭىرلىك كاسىپكەرلەر پالاتاسىن, جەرگىلىكتى تۋريستىك يندۋستريا قاۋىمداستىعىن الدىن الا حاباردار ەتۋ قاجەت», دەيدى جامبىل تۋريستىك يندۋستريا قاۋىمداستىعىنىڭ ءتورايىمى ۆالەريا باتۋەۆا.
جالپى, تاۋەلسىزدىك جىلدارىندا اۋليەاتانىڭ مادەني تاريحىندا دا ايتارلىقتاي وقيعالاردىڭ ورىن العانى راس. ماسەلەن, وسى ۋاقىتتاردا يۋنەسكو-نىڭ بۇكىلالەمدىك مۇرالار تىزىمىنە اۋليەاتا وڭىرىنەن بەس بىردەي تاريحي نىساننىڭ ەنگەنى بەلگىلى. اتالعان نىساندار بۇگىندە الەم قىزىعا قارايتىن قۇندى قازىنالار قاتارىنان سانالادى. ەندىگى جەردە يۋنەسكو نىسانىنا جامبىل وبلىسىنداعى «بالاساعۇن» قالاشىعى مەن «شاۋشەن» كەشەنى ەنەتىن بولدى. بۇل ورايدا اتالعان تۋريستىك نىسانداردىڭ ينفراقۇرىلىمى ماسەلەسىنە كەلسەك, قازىرگى كەزدە جوبالىق-سمەتالىق قۇجاتتامانى ازىرلەۋگە قاراجات بار ەكەن. ەندى مەملەكەتتىك-جەكەشەلىك ارىپتەستىگى شەڭبەرىندە «شاۋشەن» كەشەنىنە اۆتوجول قۇرىلىسىن قارجىلاندىرۋ تىزبەسى جامبىل وبلىستىق جولاۋشىلاردى تاسىمالداۋ جانە اۆتوكولىك جولدارى باسقارماسىنا ۇسىنىلۋدا.
بار نارسەنى كورسەتە ءبىلۋدىڭ دە ماڭىزى وراسان. بۇگىندە جامبىل وبلىسىندا تۋريزم سالاسىنا ءتيىستى كوڭىل بولىنۋدە. تەك تۋريستەر ءۇشىن ونىڭ جارناماسىنىڭ جارتىمسىزدىعى, سايت جۇمىسىنىڭ تۇرالاپ تۇرۋى قولايسىز, ارينە.
حاميت ەسامان,
«ەگەمەن قازاقستان»
جامبىل وبلىسى
