– بۇگىن بۇكىل قازاقستان, بارلىق كونفەسسيالار مەن ەتنوستاردىڭ وكىلدەرى وسى مەيرامدى اتاپ ءوتىپ جاتىر. بۇل مەرەكە مەيىرىمدىلىك پەن باق-بەرەكەنىڭ سيمۆولى سانالادى. وسى كۇنى ەسكى وكپە-رەنىشتەر ۇمىتىلىپ, مۇقتاج جاندارعا كومەك كورسەتىلىپ, دۇعا وقىلادى, – دەدى قازاقستان پرەزيدەنتى.
ەلباسى تاۋەلسىزدىكتىڭ العاشقى جىلدارىنان باستاپ مەملەكەتىمىزدىڭ ەتنوسارالىق جانە كونفەسسياارالىق كەلىسىمدى نىعايتۋ جونىندەگى جۇمىستاردى جۇرگىزىپ جاتقانىنا توقتالدى.
– ءبىز بىرلىگىمىزدىڭ ارقاسىندا ەكونوميكادا جانە حالقىمىزدىڭ ءال-اۋقاتىن ارتتىرۋ ىسىندە زور جەتىستىككە جەتتىك. مەن ەگەمەندىك جىلدارى ىشىندە پراۆوسلاۆ حريستياندارىنىڭ قولداۋىن سەزىندىم, سول ءۇشىن سىزدەرگە ريزاشىلىق بىلدىرەمىن, – دەدى مەملەكەت باسشىسى.
سونداي-اق, نۇرسۇلتان نازارباەۆ ەلىمىزدىڭ جەر بەتىندەگى بەيبىتشىلىك پەن تىنىشتىقتى ساقتاۋعا باعىتتالعان جاھاندىق دىنارالىق ديالوگتى دامىتۋ ىسىندەگى ءرولىن اتاپ ءوتتى.
– بۇل كۇندەرى بارلىق پراۆوسلاۆ قاۋىمى جاراتۋشىدان جاقىندارىنا دەنساۋلىق پەن اماندىق, ەلىمىزگە تىنىشتىق, بەيبىت ءومىر مەن كەلىسىم تىلەيدى. وسى دۇعا-تىلەكتەردىڭ ءبارى قابىل بولسىن! بارشاڭىزدى روجدەستۆو مەرەكەسىمەن تاعى دا قۇتتىقتاپ, سىزدەرگە زور دەنساۋلىق پەن باق-بەرەكە تىلەيمىن! – دەدى قازاقستان پرەزيدەنتى.
مەملەكەت باسشىسى قازاقستاننىڭ بىرلىك پەن بەيبىتشىلىكتىڭ ارقاسىندا عانا جاڭا تابىستارعا قول جەتكىزەتىنىن ايتتى.
– ءبىز دوستىق پەن ءوزارا تۇسىنىستىكتى, ءبىر-بىرىمىزگە دەگەن سەنىمدى نىعايتۋعا باعىتتالعان ساياساتىمىزدى جالعاستىراتىن بولامىز. وسىنداي باستامامامەن عانا العا ىلگەرىلەپ, بولاشاق ۇرپاقتىڭ جايلى ءومىر سۇرۋىنە قولايلى جاعداي جاساي الامىز, – دەدى نۇرسۇلتان نازارباەۆ.
سوڭىندا قازاقستان پرەزيدەنتى پراۆوسلاۆ شىركەۋى رۋحاني-مادەني ورتالىعىنىڭ ءدىن جولىندا قۇربان بولعاندار مەن ءدىن تاراتۋشىلار مۋزەيىنىڭ ەكسپوزيتسياسىن ارالاپ كوردى.
