تاۋ-شاڭعى كەشەنىنىڭ جالپى اۋماعى 85 گەكتار جەردى الىپ جاتىر. تەڭىز دەڭگەيىنەن 1500-1800 مەتر بيىكتىكتە ورنالاسقاندىقتان سىرعاناققا تاپتىرمايتىن ورىن.
مۇندا شاڭعى, سكەيتبورد, ۇرلەنگەن كامەرالارمەن دە سىرعاناۋعا بولادى. دەمالۋشىلاردىڭ قاۋىپسىزدىگىن ساقتاۋ ءۇشىن بارلىق جاعداي جاسالعان. توبەدەن تومەنگە قۇلديلاپ تۇسۋگە ارنالعان 15 ارنايى جولاق سالىنىپتى. ال تاۋ باسىنا ارنايى ارقان جولمەن كوتەرىلۋگە بولادى. كەشەننىڭ تاعى ءبىر ەرەكشە ماقساتى, دەمالۋشىلاردى شاڭعى تەبۋگە ۇيرەتۋمەن دە اينالىسادى. ياعني, كاسىبي شاڭعىشىلاردىڭ جەكە مەكتەبى ۇيىمداستىرىلعان. ىنتالى ادامنىڭ تاۋدان سىرعانۋدىڭ قىر-سىرىنان بولەك شاڭعى سپورتىنىڭ دا قۇپيالارىن ۇيرەنۋىنە بولادى. قىسقاسى, الماتى سياقتى الىپ مەگاپوليستەن قول سوزىمدا اشىلعان جاڭا كەشەن وڭىردەگى ءتۋريزمنىڭ دامۋى مەن تۇرعىنداردىڭ سالاماتتى ءومىر سالتىن ۇستانۋعا تولىق مۇمكىندىك بەرمەك.
«ويقاراعاي - لەسنايا سكازكا» تاۋ-شاڭعى كەشەنى مەملەكەت پەن جەكەمەنشىك ارىپتەستىگى ناتيجەسىندە سالىنىپ, پايدالانۋعا بەرىلىپ وتىر. دەمالىس ورىنىن اشۋدى «Alina» كومپانيالار توبى باستاما ەتىپ كوتەرگەن بولاتىن. كەشەننىڭ زامانعا ساي بولۋىنا «قازاق تۋريزم» ۇلتتىق كومپانياسى مەن اۆستريالىق ماماندار ۇلەس قوستى.
- ەلباسى الماتى وبلىسىنا كەلگەن ساپارىندا تۋريزم كلاستەرىن قالىپتاستىرۋ تۋرالى تاپسىرما بەرگەن ەدى. سونىڭ ىشىندە شىمبۇلاقتان باستاپ تۇرگەن شاتقالىنا دەيىنگى ارالىقتا تاۋ ءتۋريزمىن دامىتۋ قاجەتتىگىن ايتقان بولاتىن. سوعان بايلانىستى بۇگىن, مىنە, جاڭا تاۋ-شاڭعى كەشەنىن اشىپ وتىرمىز. مەملەكەت تاراپىنان قولداۋ كورسەتىلىپ, رەسپۋبليكالىق ماڭىزداعى اۆتوكولىك جولىنان كەشەنگە دەيىنگى 6,2 كم جولعا كۇردەلى جوندەۋ جاسادىق. وسى تاۋ-شاڭعى كۋرورتىنا ينۆەستور ءوزىنىڭ جەكە قاراجاتى ەسەبىنەن 60 ملن اقش دوللارىن قۇيدى. بۇل - وتباسىمەن كەلىپ, تاۋدىڭ تازا اۋاسىمەن تىنىستاپ, شاڭعى تەۋىپ, سىرعاناپ, دەمالۋعا تاپتىرمايتىن ورىن, - دەدى شاڭعى كەشەنىنىڭ اشۋلۋىنا ارنايى كەلگەن ايماق باسشىسى اماندىق باتالوۆ.
ايتپاقشى, «ويقاراعايدىڭ» قىزىعى قىسپەن بىرگە اياقتالمايدى. كەشەن جاز مەزگىلىندە دە قىزمەت كورسەتە بەرەدى. جەر قارادا شاڭعى جولدارى ۆەلوسيپەد تەبەتىن داڭعىلعا اينالىپ, تاۋ اراسىنداعى دەمالىستى قىزدىرا تۇسپەك. ول ءۇشىن دە قولاتسيلى جاعداي بار. قازىر مۇندا 6 مەيرامحانا, 99 ورىندىق قوناق ءۇي قىزمەت كورسەتۋگە كىرىستى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
