قازاق مەملەكەتتىك قىزدار پەداگوگيكالىق ۋنيۆەرسيتەتى – ەلىمىزدىڭ وقۋ ورىندارى اراسىندا وزىندىك دارا ورنى بار ءبىلىم وردالارىنىڭ ءبىرى. ول – رەسپۋبليكادا تەك قىزداردان پەداگوگ كادرلار دايارلايتىن بىردەن-ءبىر جوعارى وقۋ ورنى. ۋنيۆەرسيتەت 75 جىلعا جۋىق ۋاقىت ارالىعىندا ءوزىنىڭ قالىپتاسۋى مەن دامۋى جولىنان ءوتتى. ۇلت زيالىلارى قىزمەت اتقارعان ۇلاعات ۇياسىندا وسى ۋاقىت ارالىعىندا 60 مىڭنان استام بىلىكتى مامان دايارلانىپ, ارماندارىن اسقاقتاتىپ, قياعا قانات قاقتى. ايتۋلى عالىمدارىمىز ءتۇرلى عىلىم سالالارىنا قاتىستى ىرگەلى زەرتتەۋ ەڭبەكتەرىن وسى ۋنيۆەرسيتەت قابىرعاسىندا جازىپ, ەل يگىلىگىنە اينالدىردى.
ەلىمىزدىڭ دامۋىنا زور ۇلەس قوسىپ كەلە جاتقان وقۋ ورنى بۇگىندە قازاقستاننىڭ جوعارى بىلىكتى پەداگوگ كادرلار دايارلايتىن نەگىزگى ورتالىعىنىڭ بىرىنە اينالىپ وتىر. قازاقستانداعى بىلىكتى ماماندار مەن تالانتتى عالىمداردىڭ, دارىندى ۇستازداردىڭ ۇلكەن توبى وسى كيەلى شاڭىراقتان شىڭدالىپ شىعىپ, وتانىمىزدىڭ دامۋى جولىندا جەمىستى ەڭبەك ەتىپ جاتىر.
بۇگىندە قازاق مەملەكەتتىك قىزدار پەداگوگيكالىق ۋنيۆەرسيتەتى باكالاۆريات بويىنشا – 42, ماگيستراتۋرا بويىنشا – 23, PhD دوكتورانتۋرا بويىنشا 4 ماماندىق دايارلايدى. وقۋ ورنىنداعى 6 فاكۋلتەتتىڭ 27 كافەدراسى پەداگوگ كادرلاردى ازىرلەۋدى جۇزەگە اسىرۋدا. ال سىرتتاي وقۋ بولىمىندە 20 ماماندىق بويىنشا قاشىقتىقتان وقىتۋ تەحنولوگياسى قولدانىسقا ەنگىزىلگەن. بولاشاق پەداگوگ ماماندارعا 41 عىلىم دوكتورى, 193 عىلىم كانديداتى, 22 PhD دوكتورى, 202 عىلىم ماگيسترى ءبىلىم بەرەدى.
