جاڭا جىل مەرەكەسىنىڭ قيال-عاجايىپقا سەنەتىن بالالار ءۇشىن ەرەكشە ورنى بار. «نۇر وتان» پارتياسى وبلىستىق فيليالى جانە «پروموتەي» قوعامدىق قورىنىڭ قولداۋىمەن «سپەتسيالنايا وليمپيادا كوكشەتاۋ» قوعامدىق قورى مۇمكىندىگى شەكتەۋلى بالالارعا ارناپ جاڭا جىلدىق مەرەكەلىك كونتسەرت ۇيىمداستىردى. شارانىڭ اشىلۋ سالتاناتىندا قوعامدىق بىرلەستىك ماماندارى مەن №1 ارنايى كوررەكتسيالىق مەكتەپ-ينتەرناتىنىڭ ۇجىمى بالالاردى جاڭا جىلمەن قۇتتىقتاپ, جىلى لەبىزدەرىن ءبىلدىردى.
– ارنايى كوررەكتسيالىق مەكتەپ-ينتەرناتىنىڭ اتىنان بۇگىنگى كەشتى ۇيىمداستىرىپ وتىرعان «سپەتسيالنايا وليمپيادا كوكشەتاۋ» قوعامدىق بىرلەستىگىنە العىسىم شەكسىز. ءارتۇرلى مەرەكەلىك شارالاردا ءبىزدى نازاردان تىس قالدىرمايدى. جاقسىلىق ەشقاشان دا ارتىق بولمايدى,– دەيدى №1 ارنايى كوررەكتسيالىق مەكتەپ-ينتەرناتىنىڭ مۇعالىمى گۇلشات قۇسايىنوۆا.
اۋەزدى ءان جانە اسەم بيمەن ورىلگەن مەرەكەلىك شارا بالالارعا قۋانىش سىيلادى. بارشا بالالار اياز اتاعا ولەڭدەرىن وقىپ, دەمەۋشىلەر دايىنداعان جاڭا جىلدىق سىيلىقتارعا يە بولدى.
–ۇلكەن راحمەت. مۇندا ءبارى تاماشا ءارى ادەمى. جاڭا جىلدا بارلىق ادامداردا تەك جاقسىلىق بولىپ, كوڭىلدەرى جابىرقاماسىن. شىرشامىز جارقىراي بەرسىن!,–دەيدى №1 ارنايى كوررەكتسيالىق مەكتەپ-ينتەرناتىنىڭ وقۋشىسى ۆيكتوريا لۋكاشەنكو.
راسىندا دا جاڭا جىلدا كەز-كەلگەن ادام عاجايىپقا سەنەدى, سونى كۇتىپ, ۇمىتتەنەدى. بالالار بولسا, اياز اتاعا وزدەرىنىڭ جۇرەكجاردى قالاۋلارىن جازىپ, ارماندارىنىڭ ورىندالۋىن اسىعا كۇتەدى. مۇمكىندىگى شەكتەۋلى بالالارعا جاڭا جىلدىق مەرەكەدە ۇمىتىلماس ساتتەر قالدىرۋ ءۇشىن جومارت جاندار بارىن سالدى.
بايقال ءبايادىل,
«ەگەمەن قازاقستان»
اقمولا وبلىسى
