ءىس-شاراعا «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ, پارلامەنت ءماجىلىسىنىڭ دەپۋتاتى نۇرتاي سابيليانوۆ, بەلگىلى ساياساتتانۋشى ايدوس سارىم, «كيەلى قازاقستان» عىلىمي-زەرتتەۋ ورتالىعىنىڭ باسشىسى بەرىك ابدىعالي ۇلى جانە گارۆارد ۋنيۆەرسيتەتىنىڭ تۇلەگى شىڭعىس مۇقان قاتىستى. وتىرىستى عالىم, حالىقارالىق تۇركى اكادەمياسىنىڭ پرەزيدەنتى, «ەگەمەن قازاقستان» گازەتىنىڭ باسشىسى دارحان قىدىرالى جۇرگىزدى.
قازىرگى تاڭدا «نۇر وتان» پارتياسى ءوز قىزمەتىن جاڭعىرتۋ جولىندا #NurOtanTrends جانە #NurOtanTalks سياقتى تىڭ باستامالاردى قولعا الىپ, جۇيەلى جۇمىس ىستەپ كەلە جاتقانى بەلگىلى. ال #NurOtanPikir جاڭا جوباسىندا حالقىمىزدىڭ رۋحاني قۇندىلىقتارىن دارىپتەۋ, تاريحي سانانى جاڭعىرتۋ, سول ارقىلى ۇلتتىڭ ساناسىن وياتۋ, مەملەكەتتىك ءتىل مەن مادەنيەتىمىزدى ودان ءارى دامىتۋ, تاۋەلسىزدىگىمىزدى نىعايتۋ سياقتى ۇلتتىق ماسەلەلەر تالقىعا تۇسەتىندىكتەن, ونىڭ جۇمىسى تەك قازاق تىلىندە جۇرگىزىلەدى. سونداي-اق اتالعان الاڭنىڭ نەگىزىندە پارتيانىڭ وسى باعىتتا اتقارىپ جاتقان جۇمىستارىن دارىپتەۋ دە كوزدەلىپ وتىر.
وتىرىستا ءسوز الىپ, قاتىسۋشىلاردى تاۋەلسىزدىك مەرەكەسىمەن قۇتتىقتاعان «نۇر وتان» پارتياسى توراعاسىنىڭ ءبىرىنشى ورىنباسارى م.اشىمباەۆ: ء«بىز زاماناۋي فورماتتا حالقىمىزدىڭ رۋحاني قۇندىلىقتارىن ساقتاۋ, تاۋەلسىزدىگىمىزدى نىعايتۋ مەن ۇلتتىق كودىمىزدى ساقتاپ قالۋ سياقتى ماڭىزدى ماسەلەلەردى تالقىلاۋ ءۇشىن وسىنداي جوبانى قولعا الدىق. بۇل باعىتتا «نۇر وتان» پارتياسى كوپ جۇمىس ىستەپ جاتىر. ءبىز بۇل ماسەلەلەردى تالقىلاپ قانا قويماي, ناقتى ناتيجە بەرىپ جاتقان بىرنەشە جوبانى جۇزەگە اسىرۋدامىز», دەپ اتاپ ءوتتى.
م.اشىمباەۆ جاستاردىڭ بويىندا قۇندىلىقتار جۇيەسى مەن تاريحي سانانى قالىپتاستىرۋ قاجەت ەكەنىنە توقتالىپ, بارلىق قازاقستاندىقتاردى ەلىمىزدىڭ ەڭ باستى مەرەكەسى – تاۋەلسىزدىك كۇنىن تويلاۋعا ءوز ۇلەستەرىن قوسۋعا شاقىردى.
جالپى العاندا, ءبىرىنشى كەزدەسۋ جىلدىڭ الەۋمەتتىك-ەكونوميكالىق جانە قوعامدىق-ساياسي قورىتىندىسىنا, سونداي-اق مەملەكەت باسشىسىنىڭ « ۇلى دالانىڭ جەتى قىرى» ماقالاسىندا باياندالعان ستراتەگيالىق ماقساتتاردى ىسكە اسىرۋ مۇمكىندىگىنە ارنالدى. پىكىرتالاسقا قاتىسقان پارلامەنت ءماجىلىسىنىڭ دەپۋتاتى نۇرتاي سابيليانوۆ وزەكتى ماسەلەلەردى قوزعايتىن وسىنداي الاڭنىڭ ماڭىزدىلىعىنا توقتالدى. دەپۋتات قاتىسۋشىلاردى تاۋەلسىزدىككە قول جەتكىزۋدىڭ ماڭىزىن جاستارعا تەرەڭىرەك تۇسىندىرۋگە شاقىردى. تاريحشى, ساياساتتانۋشى, «كيەلى قازاقستان» عىلىمي-زەرتتەۋ ورتالىعىنىڭ باسشىسى بەرىك ابدىعالي ۇلى بۇگىنگى جاستاردىڭ قوعامدىق قۇندىلىقتان گورى جەكە باس مۇددەلەرىنە كوبىرەك كوڭىل بولەتىنىن ايتتى. ول تاريحي سانانى قالىپتاستىرۋ, ىشكى ءتۋريزمدى دامىتۋ مەن قازاقستاننىڭ كيەلى جەرلەرىن قاستەرلەۋدى ۇيرەتۋ ارقىلى قالىپتاسقان احۋالدى وزگەرتۋ قاجەت دەپ ەسەپتەيدى.
ساياساتتانۋشى ايدوس سارىم تاريحقا وتكەن كۇندەردىڭ جىلناماسى مەن ناقتى اتاقتى تۇلعالاردىڭ ءومىربايانى ارقىلى عانا قاراماي, ونى سانانى قالىپتاستىرۋداعى مىقتى مەحانيزمگە اينالدىرۋدى ۇسىندى. ال شىڭعىس مۇقان بولسا, جاستار اراسىنداعى ماڭىزدى يدەولوگيالىق اقپاراتتىق جۇمىستاردى حالىققا تۇسىنىكتى, قاراپايىم تىلدە جۇرگىزۋ كەرەك ەكەنىن تىلگە تيەك ەتتى. ونىڭ ايتۋىنشا, كەز كەلگەن مەملەكەتتىك مۇددەگە جانە يدەولوگياعا جاۋاپتى قىزمەتكەر ماڭىزدى ماسەلەلەردى دۇرىس جەتكىزە ءبىلۋى ءتيىس.
كەزدەسۋگە قاتىسۋشىلار مەملەكەت باسشىسىنىڭ «بولاشاققا باعدار: رۋحاني جاڭعىرۋ» جانە « ۇلى دالانىڭ جەتى قىرى» باعدارلامالىق ماقالالارىنىڭ ەلىمىزدى رۋحاني جاڭعىرتۋداعى تەمىرقازىق بولاتىنىن ايتتى.
ايدانا شوتبايقىزى,
«ەگەمەن قازاقستان»
