نۇرسۇلتان نازارباەۆتىڭ اتىنا قازاقستان رەسپۋبليكاسىنىڭ تاۋەلسىزدىك كۇنىنە وراي شەت مەملەكەتتەر مەن ۇكىمەتتەر باسشىلارىنان قۇتتىقتاۋ جەدەلحاتتارى مەن حاتتار كەلىپ تۇسۋدە.
رەسەي فەدەراتسياسىنىڭ پرەزيدەنتى ۆلاديمير پۋتين قازاقستاننىڭ ەكونوميكالىق, الەۋمەتتىك جانە عىلىمي-تەحنيكالىق دامۋدىڭ وزەكتى ماسەلەلەرىن شەشۋ جولىندا ايتارلىقتاي تابىسقا جەتكەنىن اتاپ ءوتىپ, ەلىمىزدىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە جانە استانا پروتسەسى اياسىندا وڭىرلىك جانە حالىقارالىق كۇن ءتارتىبىنىڭ ماسەلەلەرىن شەشۋ بارىسىندا ماڭىزدى ءرول اتقاراتىنىنا توقتالدى.
«مەملەكەتتەرىمىز اراسىنداعى ستراتەگيالىق سەرىكتەستىك پەن وداقتاستىق قارىم-قاتىناستاردى جوعارى باعالايمىز. ءبىز بىرلەسە كۇش جۇمىلدىرا وتىرىپ, بارلىق سالالارداعى ەكىجاقتى سىندارلى ىنتىماقتاستىقتى جانە ەۋرازيالىق ينتەگراتسيالىق ۇدەرىستەر اياسىنداعى ءوزارا ىقپالداستىقتى ودان ءارى نىعايتاتىنىمىزعا سەنىمدىمىن.
قۇرمەتتى نۇرسۇلتان ءابىش ۇلى! سىزگە شىن جۇرەكتەن مىقتى دەنساۋلىق پەن تابىس, ال دوستاس قازاقستان حالقىنا اماندىق پەن باق-بەرەكە تىلەيمىن», – دەلىنگەن رەسەي پرەزيدەنتىنىڭ قۇتتىقتاۋ جەدەلحاتىندا.
قىتاي حالىق رەسپۋبليكاسىنىڭ توراعاسى سي تسزينپين جەكە ءوزىنىڭ جانە قىتاي حالقىنىڭ اتىنان مەملەكەت باسشىسىن جانە بارشا قازاقستاندىقتاردى تاۋەلسىزدىكتىڭ 27 جىلدىعىمەن قۇتتىقتادى. سي تسزينپين نۇرسۇلتان نازارباەۆتىڭ باسشىلىق ەتۋىمەن قازاقستاننىڭ قول جەتكىزگەن الەۋمەتتىك-ەكونوميكالىق دامۋ ناتيجەلەرىن ەرەكشە اتاپ ءوتتى.
«مەن قازاقستان مەن قىتاي قارىم-قاتىناستارىنىڭ دامۋىنا باسا ءمان بەرىپ, سىزبەن جۇمىس بابىنداعى بايلانىسىمىزدى جانە جەكە دوستىعىمىزدى جوعارى باعالايمىن. بيىلعى ماۋسىم ايىندا ءسىز قىتايعا مەملەكەتتىك ساپارمەن كەلىپ, شانحاي ىنتىماقتاستىق ۇيىمىنىڭ تسينداوداعى سامميتىنە قاتىستىڭىز. ءبىز جەمىستى كەزدەسۋ وتكىزىپ, بىرقاتار ماڭىزدى ۋاعدالاستىقتارعا قول جەتكىزدىك. بۇل ەكىجاقتى قاتىناستاردىڭ دامۋىنا تىڭ سەرپىن بەردى.
مەن سىزبەن بىرلەسە وتىرىپ, مەملەكەتتەرىمىز بەن حالىقتارىمىزدىڭ يگىلىگى جولىندا جاڭا بەلەستەردى باعىندىرۋعا جانە ەكى ەل اراسىنداعى جان-جاقتى ستراتەگيالىق سەرىكتەستىك بايلانىستاردى ىلگەرىلەتۋگە ءازىرمىن. سىزبەن ء«بىر بەلدەۋ, ءبىل جول» حالىقارالىق ىنتىماقتاستىعىنىڭ جوعارى دەڭگەيدەگى ەكىنشى فورۋمى بارىسىندا جۇزدەسەمىز دەپ ويلايمىن.
دوستاس قازاقستاننىڭ ءوسىپ-وركەندەي بەرۋىنە نيەتتەستىك بىلدىرەمىن, ال حالقىنا باق-بەرەكە تىلەيمىن», – دەپ اتاپ وتكەن سي تسزينپين.
پولشا رەسپۋبليكاسىنىڭ پرەزيدەنتى اندجەي دۋدا قازاقستاننىڭ كوپ جىلداردان بەرى پولشانىڭ ورتالىق ازياداعى نەگىزگى سەرىكتەسى سانالاتىنىن جانە وعان ءتۇرلى دەڭگەيدەگى تىعىز قارىم-قاتىناستارىمىز دالەل ەكەنىن ايتادى.
«بۇگىندە قازاقستان ۇلتى پولياك كوپتەگەن ادامنىڭ تۋعان جەرى سانالادى. وسى مۇمكىندىكتى پايدالانا وتىرىپ, قازاقستان اۋماعىندا پولياك مادەنيەتىنىڭ دامۋىنا جاعداي تۋعىزعانىڭىز ءۇشىن العىس بىلدىرەمىن», – دەپ اتاپ وتكەن پولشا پرەزيدەنتى.
ازەربايجان رەسپۋبليكاسىنىڭ پرەزيدەنتى يلحام اليەۆ جەكە ءوزىنىڭ جانە بارشا ازەربايجان حالقىنىڭ اتىنان نۇرسۇلتان نازارباەۆتى جانە بۇكىل قازاقستاندىقتاردى تاۋەلسىزدىك كۇنىمەن قۇتتىقتاپ, ەلىمىزدىڭ جان-جاقتى جانە ورنىقتى دامۋ جولىمەن ءجۇرىپ, مەملەكەتتىلىكتى جانە ەكونوميكانى نىعايتۋ جولىندا, سونداي-اق حالىقتىڭ ءال-اۋقاتىن ارتتىرۋ ىسىندە زور تابىسقا جەتكەنىنە توقتالدى.
«ەلدەرىڭىز حالىقارالىق جانە وڭىرلىك ۇيىمداردا ماڭىزدى ءرول اتقارادى جانە جوعارى بەدەلگە يە. ءوزارا سەنىم مەن قولداۋعا نەگىزدەلگەن ازەربايجان مەن قازاقستان اراسىنداعى دوستىق ءارى ستراتەگيالىق ارىپتەستىك قارىم-قاتىناستار ورتاق تاريحى, ۇلتتىق جانە مورالدىق قۇندىلىقتارى بار حالىقتارىمىزدىڭ يگىلىگى جولىندا داميتىنىنا سەنىمدىمىن», – دەلىنگەن حاتتا.
بەلگيا كورولى فيليپپ ءوزىنىڭ قۇتتىقتاۋ جەدەلحاتىندا ەكى مەملەكەت اراسىندا قالىپتاسقان دوستىق قارىم-قاتىناستار مەن ىنتىماقتاستىقتىڭ ماڭىزدىلىعىن اتاپ وتكەن.
اۋستريا رەسپۋبليكاسىنىڭ فەدەرالدىق پرەزيدەنتى الەكساندر ۆان دەر بەللەن قازاقستان پرەزيدەنتىن ۇلتتىق مەرەكەمەن قۇتتىقتاپ, ءوزارا ەكونوميكالىق جانە ەنەرگەتيكالىق ىنتىماقتاستىقتى ودان ءارى قارقىندى دامىتۋعا نيەتتى ەكەنىن جەتكىزدى.
ارمەنيا پرەمەر-ءمينيسترىنىڭ مىندەتىن اتقارۋشى نيكول پاشينيان ءوزىنىڭ حاتىندا قازاقستاننىڭ مەملەكەت قۇرۋ ىسىندەگى, ەكونوميكانى جاڭعىرتۋداعى جانە حالىقارالىق بەدەلىن نىعايتۋداعى دارا جولىنا نازار اۋداردى.
ۋكراينا پرەزيدەنتى پەتر پوروشەنكو قۇتتىقتاۋ جەدەلحاتىندا قازاقستاننىڭ تاۋەلسىزدىك جىلدارىندا وسى زاماننىڭ ساياسي, ەكونوميكالىق سىن-تەگەۋرىندەرىنە توتەپ بەرىپ, وڭىردەگى كوشباسشىلاردىڭ بىرىنە اينالعانىن اتاپ وتكەن.
ۆەنگريا پرەزيدەنتى يانوش ادەر نۇرسۇلتان نازارباەۆتى تاۋەلسىزدىك كۇنىمەن قۇتتىقتاپ, ۆەنگريا مەن قازاقستان اراسىنداعى قارىم-قاتىناستاردىڭ ورتاق سالت-ءداستۇرىمىز بەن تاريحي بايلانىستارىمىز تۇرعىسىنان ماڭىزدىلىعىن اتاپ ءوتىپ, ەكى ەل حالىقتارىنىڭ دوستىعىن ودان ءارى نىعايتۋدىڭ جانە مادەني بايلانىستار اياسىن كەڭەيتۋدىڭ قاجەتتىگىنە توقتالدى.
سونىمەن قاتار وزدەرىنىڭ جەدەلحاتتارىندا يسپانيا كورولى VI فەليپە, نيدەرلاند كورولى ۆيللەم-الەكساندر, تايلاند كورولى ماحا ۆاچيرالونگكورن, يتاليا رەسپۋبليكاسىنىڭ پرەزيدەنتى سەردجو ماتتارەللا, لاتۆيا رەسپۋبليكاسىنىڭ پرەزيدەنتى رايموندس ۆەيونيس, ليتۆا رەسپۋبليكاسىنىڭ پرەزيدەنتى دالي گريباۋسكايتە, فينليانديا رەسپۋبليكاسىنىڭ پرەزيدەنتى ساۋلي نينيستيو, وڭتۇستىك افريكا رەسپۋبليكاسىنىڭ پرەزيدەنتى ماتامەلا سيريل رامافوزا قازاقستان حالقىنا بەيبىت ءومىر جانە باق-بەرەكە تىلەگەن.
سونىمەن قاتار, سەربيا رەسپۋبليكاسىنىڭ پرەزيدەنتى الەكساندر ۆۋچيچ نۇرسۇلتان نازارباەۆتىڭ قازاقستاندى دامىتۋ بارىسىندا قول جەتكىزگەن جەتىستىكتەرىن اتاپ ءوتتى.
ء«سىزدىڭ دانا باسشىلىعىڭىزدىڭ, كورەگەندىگىڭىزدىڭ, كۇش-قۋاتىڭىزدىڭ ءارى ىسكە ادالدىعىڭىزدىڭ ارقاسىندا قازاقستان شيرەك عاسىردان استام ۋاقىت بويى تابىستى دامىپ, ۇلكەن جەتىستىكتەرگە جەتىپ, الەمدە زور بەدەلگە يە بولدى. ءسىز «قازاقستان-2050» ستراتەگياسىندا بەلگىلەنگەن ماقسات-مىندەتتەرگە قول جەتكىزەسىز دەپ سەنەمىن», – دەلىنگەن جەدەلحاتتا.
مولدوۆا رەسپۋبليكاسىنىڭ پرەزيدەنتى يگور دودون جولداعان حاتىندا: «مولدوۆا حالقىنىڭ جانە جەكە ءوزىمنىڭ اتىمنان ۇلتتىق مەرەكەلەرىڭىز – تاۋەلسىزدىك كۇنىمەن شىن جۇرەكتەن قۇتتىقتايمىن. وسى جىلدار ىشىندە تابيعي رەسۋرستارى مەن ادامي الەۋەتى مول قازاقستان ۇلتتىق ەكونوميكا مەن الەۋمەتتىك سالانىڭ ءتۇرلى باعىتتارىندا زور تابىسقا قول جەتكىزە الدى. بۇل قازاقستاندىقتاردىڭ ءال-اۋقاتىن ارتتىرىپ قانا قويماي, ەلدەرىڭىزدىڭ ءيميدجىن حالىقارالىق دەڭگەيدە ىلگەرىلەتۋگە سەپتىگىن تيگىزەدى», – دەپ اتاپ وتكەن.
شۆەيتساريا كونفەدەراتسياسىنىڭ پرەزيدەنتى الەن بەرسە ءوزىنىڭ قۇتتىقتاۋ جەدەلحاتىندا قازاقستان حالقىنا باق-بەرەكە مەن اماندىق تىلەپ, ەكى ەل اراسىنداعى سەنىمگە نەگىزدەلگەن ءارى دوستىق قارىم-قاتىناستاردى ودان ءارى دامىتۋعا نيەتتەستىك بىلدىرەدى.
سونىمەن قاتار وزدەرىنىڭ جەدەلحاتتارىندا يوردانيا كورولى ءىى ابداللا, شۆەتسيا كورولى كارل گۋستاۆ, ومان سۇلتانى كابۋس بەن سايد, ۆەتنام سوتسياليستىك رەسپۋبليكاسىنىڭ پرەزيدەنتى نگۋەن فۋ چونگ, مالايزيا جوعارعى بيلەۋشىسىنىڭ ورىنباسارى سۇلتان نازرين مۋيززۋددين شاح قازاقستان حالقىنا بەيبىت ءومىر جانە باق-بەرەكە تىلەيدى.
