مىڭعا تارتا ادام باس قوسقان سالتاناتتى قابىلداۋ ەلىمىزدىڭ انۇرانىمەن اشىلدى. تۇركيا پرەزيدەنتىنىڭ باس كەڭەسشىسى يالچين توپچۋ باستاعان ساياساتكەرلەر مەن ءار سالانىڭ كوش باسىندا جۇرگەن زيالى قاۋىم وكىلدەرى بارشا وتانداستارىمىزدى تاۋەلسىزدىك كۇنى مەرەكەسىمەن قۇتتىقتاپ, ەلباسى نۇرسۇلتان نازارباەۆتىڭ سىندارلى ساياساتىنىڭ ارقاسىندا تاريحى تامىرلاس ەلدەردىڭ ديپلوماتيالىق قارىم-قاتىناسى جىل وتكەن سايىن ورىستەپ كەلە جاتقانىن جەتكىزدى.
ەلىمىزدىڭ تاۋەلسىزدىگىن العاشقىلاردىڭ ءبىرى بولىپ مويىنداعان باۋىرلاس ەلدە ەگەمەندىك العان تۇستان باستاپ بەس مىڭنان استام قازاقستاندىق ستۋدەنت تەگىن ءبىلىم العان. بەرىك ىنتىماقتاستىق قارىم-قاتىناستاردىڭ ناتيجەسىندە 25 جىل ىشىندە تۇركيا ەلىمىزدىڭ تەك قۇرىلىس سالاسىنا 23 ميلليارد دوللار ينۆەستيتسيا قۇيىپتى. ودان بولەك اۋىل شارۋاشىلىعى, كولىك-لوگيستيكا, تاۋ كەن, فورماتسەۆتيكا سىندى سان سالاداعى بىرلەسكەن جوبالار ەكى مەملەكەت ءۇشىن دە ءتيىمدى ناتيجەسىن بەرگەن. الداعى ەكى ءۇش جىلدا بۇل باعىتتاعى سەرىكتەستىك بايلانىستار ودان ارى قارقىن الادى دەپ كوزدەلۋدە.
يالچين توپچۋدىڭ سوزىنشە, قازىر قازاقستان مەن تۇركيا قارىم-قاتىناسى ەكى كوشباسشىنىڭ, قوس استانانىڭ بايلانىسى قارقىندى دامىپ كەلەدى. سيريا ماسەلەسى بويىنشا استانا پروتسەسى قانشالىقتى ناتيجەلى بولىپ جاتقانىنا الەم كۋا. بۇل قازاقستاننىڭ الەمدىك ساياساتتاعى بيىك بىتىمگەرلىك بەدەلىن كورسەتەدى دەيدى ول. سونداي-اق تۇرىك زيالىلارى ەلباسىنىڭ « ۇلى دالانىڭ جەتى قىرى» ماقالاسى قازاقستان ءۇشىن عانا ەمەس, ءبۇتىن تۇركى دۇنيەسى ءۇشىن تاريح تامىرىنا قان جۇگىرتەتىن سەرپىندى باستاما دەپ ەسەپتەيدى.
– ەكى مەملەكەت اراسىنداعى ساياسي بايلانىس وتە جوعارى دەڭگەيدە دەپ ايتا الامىز. بۇل جوعارى دەڭگەيدەگى ىنتىماقتاستىقتىڭ ەڭ ماڭىزدى رولىندە ءبىزدىڭ ەلباسىمىز تۇر. ەلباسىمىزدىڭ تۇركى جۇرتى ىشىندەگى تۇركيانىڭ ساياسي-قوعامدىق توبىنىڭ اراسىنداعى بەدەلى اسا جوعارى. مۇنى تەك قانا ۇكىمەت مۇشەلەرى نەمەسە جوعارى لاۋازىمدى تۇلعالار عانا ەمەس قاراپايىم حالىقتان سۇراساڭىز دا ءبىرىنشى كەزەكتە ايتاتىنى ەلباسىمىزدىڭ تۇركى الەمىندەگى ءرولى, ونىڭ ىشىندە سوڭعى جىلدارداعى تەك قانا قازاقستان حالقى ءۇشىن ەمەس, تۇركى الەمى ءۇشىن جاساعان يگى باستامالارى تۇر. بۇل رەتتە تۇركى تىلدەس مەملەكەتتەردىڭ ىنتىماقتاستىق كەڭەسىن, حالىقارالىق تۇركى اكادەمياسىن ايرىقشا اتاي كەتكەن ءجون. تۇركيانىڭ الدىڭعى قاتارلى تۇلعالارى پرەزيدەنتىمىزدىڭ جۋىردا عانا جارىق كورگەن « ۇلى دالانىڭ جەتى قىرى» ماقالاسىن تۇركى الەمىنە شاقىرۋ رەتىندە باعالايدى, ءتىپتى تۇركى الەمىنە جاسالعان مونيفەست رەتىندە قابىلداۋ قاجەتتىگىن اتاپ وتۋدە. بۇل تاراپتان تۇركى مادەنيەتىن, وركەنيەتىن الەمگە تانىتۋ بارىسىندا ەڭ الدىمەن ءوز ارامىزدا باعدارلامالىق جوبالاردى جۇزەگە اسىرساق دەگەن ۇسىنىستار دا جوق ەمەس, – دەيدى قازاقستاننىڭ تۇركيا رەسپۋبليكاسىنداعى توتەنشە جانە وكىلەتتى ەلشىسى ابزال ساپاربەك ۇلى.
ۇستىمىزدەگى جىلدىڭ قىركۇيەك ايىندا وتكەن ەلباسىنىڭ تۇرىك ەلىنە رەسمي ساپارى بارىسىندا ەكى ەل اراسىنداعى بىرقاتار اۋقىمدى جوبالارعا قول قويىلعان بولاتىن. بۇل ينۆەستيتسيالىق-كوممەرتسيالىق جوبالار ەل ەكونوميكاسىن دامىتۋعا سونى سەرپىن بەرمەك.
باۋىرلاس حالىقتاردىڭ رۋحاني بايلانىسىن ودان ءارى نىعايتا تۇسكەن قابىلداۋ كەشىندە ءسۇيىنباي اتىنداعى الماتى وبلىستىق فيلارمونيانىڭ قۇرامىنا كىرەتىن «ادىرنا» فولكلورلىق-ەتنوگرافيالىق ءانسامبلى مەن «التىناي» حالىق بي ءانسامبلى قازاق ونەرىن جوعارى دەڭگەيدە كورسەتىپ, كوپشىلىكتى ءتانتى ەتتى.
ارمان وكتيابر,
«ەگەمەن قازاقستان»
انكارادان
