8,6 مىڭ شارشىمەترگە سوزىلىپ جاتقان جاڭا الاڭنىڭ جوبالىق قۇنى 105 ملن. تەڭگەگە جۋىق. مۇندا بيىكتىگى 15 مەترلىك «جەتى كەرەمەت» مونۋمەنتى, بەينە باقىلاۋ كامەرالارى, جارىقشامدارمەن قوسا, سوڭعى ۇلگىدەگى LED ەكران ورناتىلعان. ارنايى جول تارتىلىپ, الاڭدى اينالا 3 اۆتوتۇراق سالىنعان. بولاشاقتا كوپشىلىك شارالار ۇيىمداستىرىلىپ, حالىق جينالاتىن بۇل الاڭنىڭ قۇرىلىسىن «رەمسترويبىت» جشس جارتى جىل ىشىندە اياقتاپ شىعىپتى.
شىڭعىرلاۋ اۋدانىندا «رۋحاني جاڭعىرۋ» باعدارلاماسى بويىنشا دا كوپ جۇمىس اتقارىلىپ جاتىر. ءدال وسى كۇنى اۋدان ورتالىعىندا كۇللى قازاققا ورتاق ابىز – اسان قايعىعا ارنالعان «دالا اڭىزى» اتتى ەسكەرتكىش ورناتىلدى. شىڭعىرلاۋلىقتاردىڭ اسان قايعىنى وزدەرىنە جاقىن تارتۋىنىڭ سەبەبى بار – «قارعابويلى قازتۋعان» جىرىندا:
اسان قايعى كوشكەن جەر
شىڭعىرلاۋ, تورىاتباسى ەدى,
قىزەمشەكتى سارىشوقى
وسى سۋدىڭ قاسى ەدى.
اسان قايعى تۋعاننىڭ
بولىنگەن جەرى وسى ەدى...» - دەپ كەلەدى. وسى ۇزىندىدە اتالعان جەر اتاۋلارىنىڭ ءبارى دە شىڭعىرلاۋ اۋدانى اۋماعىندا, ءالى كۇنگە سولاي اتالىپ كەلە جاتىر.
- اۋداندا اتقارىلعان ىزدەنىس جۇمىستارىنىڭ ارقاسىندا جەرىمىز جانە اتا-بابامىز جونىندە كوپتەگەن ماعلۇمات جيناقتالدى. ولار كىتاپ, ءباسپاسوز بەتتەرىندە جارىق كورۋدە. سونىمەن قاتار ەلباسى جاقىندا عانا « ۇلى دالانىڭ جەتى قىرى» ماقالاسىندا «دالا فولكلورىنىڭ انتولوگياسى» جانە « ۇلى دالانىڭ ۇلى ەسىمدەرى» اتتى باستاما كوتەرىپ, تاريحي تۇلعالارعا ەسكەرتكىش ورناتۋ باعىتىندا تاپسىرما بەرگەن بولاتىن. اسان قايعى بابامىزدىڭ ءمۇسىنى – تۋعان جەرىمىزدىڭ وتكەن تاريحىنا دەگەن قۇرمەت, - دەدى شىڭعىرلاۋ اۋدانىنىڭ اكىمى البەرت ەساليەۆ ەسكەرتكىشتىڭ اشىلۋ سالتاناتىندا.
جەلماياسىن شوگەرىپ قويىپ جول قاراپ تۇرعان اسان بابا ەسكەرتكىشىنىڭ اۆتورى – قازاقستان سۋرەتشىلەر وداعىنىڭ مۇشەسى, ءمۇسىنشى يبراگيم ايدەنوۆ. ول ارىپتەستەرى احمەت ەرعاليەۆ جانە زاكيجان يسلامبەكوۆپەن بىرگە ءمۇسىندى ەكى اي ىشىندە جاساپ شىققان. ال اۋدان ورتالىعىنا كورىك بەرەتىن ماعىنالى ءمۇسىننىڭ باس دەمەۋشىسى – جەرگىلىكتى كاسىپكەر يۋسۋپ قازيەۆ ەكەن.
قازبەك قۇتتىمۇرات ۇلى,
«ەگەمەن قازاقستان»
