جىل سايىن رەسپۋبليكامىزدىڭ بارلىق ءوڭىرى وكىلدەرىنىڭ باسىن قوسىپ, كوماندالىق جارىستاردا كىمنىڭ ۇزدىك ەكەنىن انىقتايتىن ءدۇبىرلى دودانى جانكۇيەرلەر اركەز تاعاتىسىزدانا كۇتۋدە. وسى كۇنگە دەيىن كۇرەس تۇرلەرى, بوكس, تاەكۆوندو, دزيۋدو جانە قازاق كۇرەسىنەن وتكەن توپتىق تۋرنيرلەرىندە دارا شىققان كوماندالار تولىقتاي انىقتالدى. ەندى سولاردىڭ اراسىنان قاي ءوڭىردىڭ ورەندەرى وزا شاباتىنىن الاتاۋ باۋرايىندا جالاۋى جەلبىرەيتىن وسى جارىس بارىسىندا بەلگىلى بولادى. بۇل ءتۋرنيردىڭ جۇلدە قورى 145 ميلليون تەڭگەنى قۇرايدى.
بوكسشىلار باسەكەسىندە قاراعاندى, وڭتۇستىك قازاقستان, ماڭعىستاۋ وبلىستارى مەن استانا قالاسى كۇش سىناسادى. دزيۋدوشىلار اراسىنداعى تارتىس باتىس قازاقستان, قاراعاندى, اتىراۋ جانە قىزىلوردا بالۋاندارى اراسىندا وتەدى. تاەكۆوندوشىلار تۋرنيرىندە توپ جاراتىن كوماندا پاۆلودار مەن تۇركىستان وبلىستارى جانە الماتى قالاسى وكىلدەرى اراسىنداعى تارتىستا انىقتالادى. ەركىن كۇرەس شەبەرلەرىنىڭ سايىسىندا شىعىس قازاقستان مەن تۇركىستان وبلىستارى جانە الماتى مەن استانا قالالارىنىڭ ورەندەرى باق سىنايدى. گرەك-ريم كۇرەسىنەن ۇيىمداستىرىلاتىن باسەكەدە الماتى قالاسى, قوستاناي, الماتى جانە شىعىس قازاقستان وبلىسىنىڭ اپايتوستەرى شەبەرلىك بايقاسادى. قازاق كۇرەسىنەن وتەتىن جارىس استانانىڭ «ەلوردا باتىرى», الماتىنىڭ «Qazaqkuresi» جانە قاراعاندىنىڭ «قاراعاندى وبلىسى قازاق كۇرەسى» (قاراعاندى) جانە «زاك كار» كلۋبتارى اراسىندا وتەدى.
عالىم سۇلەيمەن,
«ەگەمەن قازاقستان»
الماتى
