ايى وڭىنان تۋعان «ورداباسى»
سەيسەنبى كۇنى استانادا بيىلعى فۋتبول ماۋسىمىنىڭ بەتاشار ويىنى ءوتتى. بۇل قازاقستان سۋپەركۋبوگى ءۇشىن وتكەن كەزدەسۋدە شىمكەنتتىڭ «ورداباسى» كلۋبى قاراعاندىنىڭ «شاحتەر» كومانداسىن 1:0 ەسەبىمەن ۇتىپ, وسىمەن بەسىنشى رەت وتكىزىلگەن بايگەنىڭ جەڭىمپازى اتاندى.
ءسويتىپ, كوپتەن بەرى سۋپەركۋبوكقا قول سوزىم جەردە تۇرىپ, وعان جەتە الماي كەلگەن شىمكەنتتىك ۇجىم استانا ءتورىنەن قازاقستان فۋتبولىنىڭ ەڭ باعالى تروفەيلەرىنىڭ ءبىرىن اكەتتى.
سەيسەنبى كۇنى استانادا بيىلعى فۋتبول ماۋسىمىنىڭ بەتاشار ويىنى ءوتتى. بۇل قازاقستان سۋپەركۋبوگى ءۇشىن وتكەن كەزدەسۋدە شىمكەنتتىڭ «ورداباسى» كلۋبى قاراعاندىنىڭ «شاحتەر» كومانداسىن 1:0 ەسەبىمەن ۇتىپ, وسىمەن بەسىنشى رەت وتكىزىلگەن بايگەنىڭ جەڭىمپازى اتاندى.
ءسويتىپ, كوپتەن بەرى سۋپەركۋبوكقا قول سوزىم جەردە تۇرىپ, وعان جەتە الماي كەلگەن شىمكەنتتىك ۇجىم استانا ءتورىنەن قازاقستان فۋتبولىنىڭ ەڭ باعالى تروفەيلەرىنىڭ ءبىرىن اكەتتى.
وسى كەزدەسۋدە ەكى كوماندا دا ساۋاتتى ويىن ورنەگىن كورسەتتى. دەگەنمەن, ماتچتىڭ ءبىرىنشى جارتىسىندا «شاحتەر» ءۇستەمدىك قۇرىپ, قارسىلاستار قاقپاسىنا بىرنەشە مارتە دوپ سوعۋعا مۇمكىندىگى بولدى. ونىڭ ەڭ ءبىرىنشىسىن كوماندا كاپيتانى اندرەي فينونچەنكو جىبەرىپ الدى. ول ماتچتىڭ 3-ءشى ءمينوتىندە قورعاۋشى نيكولا ۆاسيلەۆيچتىڭ ادەمى شىعارعان پاسىن نەبارى ءۇش مەتردەن قاقپاعا سوعا المادى. وسى جاعداي «ورداباسىعا» ساباق بولىپ, ولار ەندى قاقپانى تاسقامالداي قورعاۋعا كوشتى.
ويىننىڭ ءبىرىنشى تايمىندا «شاحتەردىڭ» ساپىندا جامبىل كوكەەۆ بىرنەشە مارتە شابۋىل ۇيىمداستىرۋعا تالپىنعانىمەن, ونىسىنان ەشتەڭە شىقپادى. ويتكەنى, وعان كومەككە ەشكىم كەلمەدى. ال جاڭاعى 100 پايىزدىق مۇمكىندىكتى جىبەرىپ العان فينونچەنكو بولسا, ويىن سوڭىنا دەيىن باسىن تومەن ءتۇسىرىپ, تۇك بىتىرمەي كەتتى.
وسى جەردە بار كىنانى «شاحتەردىڭ» شابۋىلشىلارىنا ارتپاي, «ورداباسىداعى» مۆەسيگۆا, قوجاباەۆ سياقتى قورعاۋشىلاردىڭ ساۋاتتى ويىن ورنەگىن كورسەتكەنىن اتاپ وتكەنىمىز ءجون. ايتقانداي, ەندريۋ مۆەسيگۆا – ۋگاندا ۇلتتىق قۇراماسىنىڭ قورعاۋشىسى. ول وڭتۇستىكتىڭ كومانداسىندا بيىل ەكىنشى ماۋسىمىن وتكىزەتىن بولادى.
كەزدەسۋدە ودان باسقا «ورداباسى» ساپىندا افريكادان كەلگەن تاعى ەكى ويىنشى ونەر كورسەتتى. ونىڭ بىرەۋى – سەنەگالدىق مانسۋر گۋيە. ول ماتچتىڭ 80-ءشى مينوتىندە رومان پاحوليۋكتى الماستىردى. ەكىنشىسى – تۋنيستىك مۇحاممەد ارۋري. ول بۇكىل ماتچ بويى جارتىلاي قورعانىستا ساۋاتتى ويناپ شىقتى.
سونىمەن بىرگە, شىمكەنتتىك كوماندادا المات بەكباەۆ (قاقپاشى), باقداۋلەت قوجاباەۆ, فارحادبەك يريسمەتوۆ, سەربيالىق لەگيونەر الەكساندر ترايكوۆيچ, اندرەي كارپوۆيچ, قايرات اشىربەكوۆ, داۋرەنبەك ءتاجىمبەتوۆ پەن بەكزات بەيسەنوۆتىڭ الاڭدا وزدەرىن جاقسى قىرىنان كورسەتكەندەرىن اتاپ وتكەن ءجون. وسىلاردىڭ ىشىندە قايرات اشىربەكوۆ ويىننىڭ 58-ءشى مينوتىندە ەكى قورعاۋشىنىڭ اراسىنان سۋىرىلىپ شىعىپ, الەكساندر موكين قاقپاسىنىڭ سول جاق بۇرىشىن ءدال كوزدەدى. ءسويتىپ, ول ماتچتاعى جالعىز گولدىڭ اۆتورى اتاندى.
بۇل جەردە ارتەم كاسيانوۆتىڭ ەڭبەگىن ەرەكشە ايتۋعا بولادى. ونىڭ قايرات اشىربەكوۆكە شىعارعان كەرەمەت پاسىن ءالى تالاي جانكۇيەردىڭ ايتا ءجۇرەتىنى ءسوزسىز. وسى گول «شاحتەردىڭ» نامىسىن ويناتىپ, قالعان ۋاقىتتا قارسىلاستار قاقپاسىنا بارىنشا قاۋىپتى جاعداي جاساۋعا ءماجبۇرلەسە دە, ودان ەشتەڭە شىقپادى.
كوماندا باپكەرى ۆيكتور كۋمىكوۆ شارشاپ-شالدىققانداردىڭ ورنىنا تىڭ ويىنشىلاردى شىعارا باستادى. الدىمەن ۆاديم بوروۆسكي كەتتى. ودان كەيىن ماقسات بايجانوۆ كولۋمبيالىق لەگيونەر رودجەر كانيانستى الماستىردى. بىراق «شاحتەر» ءتورەشىنىڭ ىسقىرىعىنا دەيىن «ورداباسىنىڭ» قورعانىسىن بۇزا المادى. وسىلايشا «ورداباسى» قازاقستاننىڭ سۋپەركۋبوگىن جەڭىپ العان بەسىنشى كوماندا بولدى.
بۇعان دەيىن حابارلانعانىنداي, «ورداباسىعا» سۋپەركۋبوكتى ەلباسى نۇرسۇلتان نازارباەۆتىڭ ءوزى تابىس ەتتى.
وسى كەزگە دەيىن قازاقستان سۋپەركۋبوگىن 1995 جىلى «ەلىم-اي» (سەمەي), 2008 جانە 2010 جىلدارى «اقتوبە (اقتوبە), 2011 جىلى «لوكوموتيۆ» (استانا) كوماندالارى يەلەنگەن بولاتىن.
داستان كەنجالين.
