اۋدان-اۋىلدارعا ەرىنبەي بارىپ, وقۋشىلارمەن كەزدەسىپ, كاسىپتىك باعدار جۇمىسىن بەلسەندى جۇرگىزگەن جوعارى وقۋ ورىندارىنىڭ ءبىرى - وسكەمەندەگى سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى. ءبىلىم ورداسىنىڭ رەكتورى, پروفەسسور مۇحتار تولەگەننىڭ ءوزى باستاعان, فاكۋلتەت دەكاندارى, كافەدرا مەڭگەرۋشىلەرى قوستاعان ۋنيۆەرسيتەت قىزمەتكەرلەرى بيىلعى قاڭتار, ءساۋىر-مامىر ايلارىندا وبلىستىڭ 11 اۋدانى مەن 1 قالاسىندا بولىپ, وقۋشىلارمەن كەزدەسىپ قايتىپتى. ء«بىز ارنايى مارشرۋت جاسادىق. كەزدەسۋلەردە بۇرىنعىداي ءبىر پروفەسسوردى اپارىپ, ەكى ساعات سويلەتكەن جوقپىز. سول اۋداننىڭ, اۋىلدىڭ مەكتەپتەرىن بىتىرگەن ستۋدەنتتەردى وزىمىزبەن بىرگە ەرتە باردىق. وسى جۇمىستاردىڭ ناتيجەسى دەۋگە بولاتىن شىعار, بيىل قىرىققا جۋىق سپورت شەبەرلەرى, الەم, ازيا چەمپيوندارى, 39 «التىن بەلگى», 40 ۇزدىك اتتەستات يەگەرلەرى ءبىزدىڭ ۋنيۆەرسيتەتكە وقۋعا ءتۇستى. وقۋ ورنىندا قوعامنىڭ سۇرانىسىنا يە 17 جاڭا ماماندىق اشىلدى. ۋنيۆەرسيتەت تاريحىندا العاش رەت ينتەگراتسيالانعان ماتەماتيكا-فيزيكا, ماتەماتيكا-ينفورماتيكا, فيزيكا-ينفورماتيكا, حيميا-بيولوگيا, گەوگرافيا-تاريح ماماندىقتارىنا تالاپكەرلەر قابىلداندى. ەرەكشە اتاپ وتەر دۇنيە, جىل سايىن 1 كۋرسقا قابىلداناتىن تالاپكەرلەر مىڭ-مىڭ جارىمنان اسپايتىن بولسا, بيىل 2600-دەن استى», - دەگەن وقۋ ورنىنىڭ رەكتورى م.تولەگەن بيىل گرانت يەگەرلەرىنىڭ سانى ارتىپ, 814-كە (2017 جىلى - 606) جەتكەنىن تىلگە تيەك ەتتى.
سونىمەن قاتار 2018 جىلدىڭ ءساۋىر ايىندا ۋنيۆەرسيتەت رەكتورىنىڭ باستاۋىمەن تۇركىستان, قىزىلوردا وبلىستارىنىڭ بارلىق اۋدان مەكتەپتەرىندە «ۋنيۆەرسيتەت كۇندەرى» وتكىزىلىپ, 12 ستۋدەنتتەن تۇراتىن دارىندى, تالاپتى جاستار كونتسەرتتىك شارا ۇيىمداستىرىپتى. وسى ساپار اياسىندا تۇركىستان وبلىسى اكىمدىگىمەن ىنتىماقتاستىق تۋرالى مەموراندۋمعا قول قويىلىپتى. جالپى, 2017-2018 وقۋ جىلىندا كاسىپتىك باعدار جۇمىسىن جۇرگىزۋ ماقساتىندا ۇزىن سانى 1241 ءىسساپار ۇيىمداستىرىلعان ەكەن.
رەتى كەلگەندە ايتا كەتەيىك, بۇگىنگى تاڭدا وقۋ ورنىندا 6453 ستۋدەنت ءبىلىم الىپ جاتىر. ونىڭ – 5498-ءسى باكالاۆريات, 345-ءى - ماگيسترانت, 18-ءى - دوكتورانتتار, قالعانى كوللەدجدە ءبىلىم الۋشىلار.
ازامات قاسىم,
«ەگەمەن قازاقستان»
شىعىس قازاقستان وبلىسى
