اتىراۋ قالالىق اكىمدىگىنىڭ وسى ولقىلىقتىڭ ورنىن تولتىرۋعا ارەكەتتەنگەنى ناتيجەسىز ەمەس. وبلىس ورتالىعىندا ەكى اۆتوبۋس باعىتىندا ەلەكتروندى بيلەت جۇيەسىنىڭ قاناتقاقتى جوباسى ىسكە قوسىلدى. قالا اكىمدىگى ءباسپاسوز قىزمەتىنىڭ حابارلاۋىنشا, №1, 2, 4, 5, 10, 12, 14, 20 باعىتتارىنداعى قوعامدىق كولىكتەر ءموبيلدى تولەم قۇرىلعىسىن پايدالانۋدى باستاعان. جىل سوڭىنا دەيىن بارلىق قوعامدىق كولىككە ستاتسيونارلىق ۆاليداتورلار ورناتىلادى.
– «تسيفرلى قازاقستان» مەملەكەتتىك باعدارلاماسى اياسىندا قوعامدىق كولىكتە جول ءجۇرۋ تولەمدەرىن اۆتوماتتاندىرۋ بويىنشا جۇمىستار جۇرگىزىلۋدە. «Smart-تكش» كومپانياسى تاسىمالداۋشى-كومپانيالارمەن كەلىسىمشارتقا قول قويدى. اۆتوبۋستارعا QR كودتارىن تاعايىنداپ, تولەمدەردىڭ باسقا تۇرلەرىن جاساۋعا بولاتىن «SmartQala» ءموبيلدى قوسىمشاسى ىسكە قوسىلدى. ەلەكتروندى بيلەت جۇيەسىن ەنگىزۋدىڭ ماقساتى – قوعامدىق كولىك جۇمىسىنىڭ اشىق بولۋىن قامتاماسىز ەتۋ», دەيدى اتىراۋ قالاسى اكىمىنىڭ ورىنباسارى مەيىرىم قالاۋي.
جاڭا جۇيە ارقىلى قوعامدىق كولىكتە قىزمەت كورسەتۋ ساپاسى جاقسارىپ, جۇرگىزۋشىلەردىڭ, جولسەرىكتەردىڭ جالاقىسى, تاسىمالداۋشى كومپانيالار تابىسى, بيۋدجەتكە تۇسەتىن سالىق ءتۇسىمى كوبەيەدى ەكەن. قازىردىڭ وزىندە جۇرگىزۋشىلەر مەن اۆتوبۋس جولسەرىكتەرىنىڭ جالاقىلارى ەكى ەسەگە ءوسىپتى. «سمارت اتىراۋ» كمم باسشىسى ادىلبەك تانكيەۆتىڭ ايتۋىنشا, قاراشا ايىنان باستاپ قوعامدىق كولىك جۇرگىزۋشىلەرىنىڭ ەڭبەكاقىلارى 110 مىڭ تەڭگەدەن 300 مىڭ تەڭگەگە كوتەرىلگەن, ال جولسەرىكتەر بۇرىنعى 45 مىڭ تەڭگەنىڭ ورنىنا 85 مىڭ تەڭگە الادى.
– بۇل شارالار قوعامدىق كولىكتەرگە ەنگىزىلگەن جولاقى تولەۋدىڭ ەلەكتروندى جۇيەسىنىڭ تيىمدىلىگىن كورسەتەدى, – دەيدى ءا.تانكيەۆ. – جولاۋشىلاردىڭ قوزعالىسىن باسقارۋ, تاسىمالداۋشى مەكەمەلەر كىرىستەرىنىڭ اشىقتىعى, بيۋدجەتكە تۇسەتىن سالىق تۇسىمدەرىنىڭ ارتۋى وسىنداي مۇمكىندىك بەرىپ وتىر.
– قاناتقاقتى جوبا كەزىندە جولاۋشىلار ۆاليداتور ارقىلى قولما-قول اقشا تولەيدى. جۇيە ىسكە قوسىلعاننان كەيىن ارنايى تولەم كارتوچكالارى ەنگىزىلدى. جول ءجۇرۋ كارتاسىنىڭ قۇنى 300 تەڭگە, زەينەتكەرلەر مەن مۇگەدەكتەرگە, ارداگەرلەرگە ارنايى تەگىن كارتالار بەرىلەدى, – دەيدى «Smart-تكش» كومپانياسىنىڭ وكىلى ەرلان نۇرلان ۇلى. – بۇعان دەيىن الماتى, استانا سەكىلدى ەلىمىزدىڭ ءىرى قالالارىندا قولعا الىنعان جوبا قوعامدىق كولىك سالاسىنداعى ماسەلەلەردىڭ كۇرمەۋىن شەشكەن ەدى. اتىراۋداعى جوبانىڭ ارتىقشىلىعى – تولەمدەر ونلاين-فورماتتا قابىلدانادى جانە تولەمدەردىڭ بارلىق 9 ءتۇرى بىرىكتىرىلگەن ءبىر جۇيەدە جۇمىس ىستەيدى. بۇل اۆتوبۋستاردىڭ ءبىر-بىرىمەن بايلانىستا بولۋىنا, كۇندەلىكتى جۇمىستارى تۋرالى اقپارات الۋعا مۇمكىندىك بەرەدى. جىل سوڭىنا دەيىن مۇنايلى ايماققا 100 جاڭا اۆتوبۋس كەلىپ, قوعامدىق كولىكتەر تولەم قۇرىلعىلارىمەن جابدىقتالادى دەگەن جوسپار بار.
مەملەكەت باسشىسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىنىڭ اياسىندا قولعا الىنعان بۇل جوبا كولەڭكەلى ەكونوميكانىڭ الدىن الۋعا, حالىقتىڭ ءومىر سۇرۋىنە قولايلى جاعداي جاساۋعا جانە تابىستىڭ كوبەيۋىنە مۇمكىندىك بەرەدى. بيىل وبلىس ورتالىعىنداعى بايمۇحانوۆ, تايمانوۆ, ۆلاديميرسكي كوشەلەرى كەڭەيتىلدى. ەندى وسى جەرلەرگە جاڭادان جەتى ايالداما قوندىرىلادى. «WiFi» جەلىسى, بەينەكامەرالارى بار ايالدامالاردا دۇكەن, ءدارىحانا جانە باسقا دا قىزمەت كورسەتۋ ورتالىقتارى ورنالاسادى.
جالپى, وبلىس ورتالىعىنداعى 60 كوشەنى قازىرگى زامانعى قۇرالدارمەن جابدىقتاۋ كەزەكتە تۇر. سونداي-اق 192 كوشەگە جارىق شامدارى ورناتىلادى. قوعامدىق ورىندارعا 776 بەينە جانە فوتوباقىلاۋ كامەرالارى ورناتىلادى. مۇنىڭ ءبارى – اتىراۋدى «اقىلدى قالاعا» اينالدىرۋ جولىندا جاسالىپ جاتقان جۇمىستار. وسىلايشا كۇننەن كۇنگە ساۋلەتى مەن داۋلەتى قاتار ارتىپ كەلە جاتقان شاھار شىرايلانا تۇسپەك.
باقىتگۇل باباش,
«ەگەمەن قازاقستان»
اتىراۋ
