قايتا وڭدەۋ ونەركاسىبى نىسانىنىڭ كۇنىنە 10 توننا ءونىم دايىندايتىن قۋاتى بار. تولىق قۋاتىندا جۇمىس ىستەگەندە كۇنىنە 3 توننا بۇقتىرىلعان ەت, 3 توننا شۇجىق ونىمدەرى جانە 4 توننا ساپالى ەت دايىندايتىن بولادى.
«تورعاي وڭىرىندەگى بۇل ەت كومبيناتىنا وسى جەرگە جاقىن ناۋىرزىم, امانگەلدى, جانگەلدى, ارقالىق قالاسىنىڭ اۋماعى جانە قاتار جاتقان اقمولا, قاراعاندى وبلىستارىنىڭ ىرگەلەس اۋداندارىنىڭ شارۋاشىلىقتارى مالىن وتكىزەتىن بولادى. شارۋا ءۇشىن ەت كومبيناتى جاقىندىعىمەن جانە وڭدەۋ ىسىندە زاماناۋي تەحنولوگياسىمەن ۇتاتىن بولادى. ەندىگى مىندەت – وڭىردە مال باسىن كوبەيتۋ كەرەك» دەدى وبلىس اكىمى ارحيمەد مۇحامبەتوۆ.
زاماناۋي ەت كومبيناتىنىڭ اشىلۋىنا بيۋدجەتتەن شىعىن شىققان جوق, ول جەكە ينۆەستيتسيا تارتۋ ارقىلى مۇمكىن بولدى. كومبيناتتى سالعان «تورعاي ەت» جاۋاپكەرشىلىگى شەكتەۋلى سەرىكتەستىگى بارلىعى 2 ميلليارد تەڭگە قارجى سالدى. الداعى جىلى تاعى ءبىر ميلليارد تەڭگەگە مال بورداقىلاۋ الاڭىن سالۋدى جوسپارلاپ وتىر.
«جەلتوقسان ايىنان باستاپ, شارۋاشىلىقتاردان, جەكە سەكتوردان مال قابىلداي باستايمىز. قازىر ءوزىمىز ەلۋ شاقتى مال سويىپ, شۇجىق, قالبىرداعى ەتتىڭ العاشقى ءتۇرىن شىعارىپ كوردىك. مامانداردى ۇيرەتىپ جاتىرمىز. مالدى تىرىلەي سالماقتا 400 كيلوگرامعا دەيىن كيلوگرامىن 500 تەڭگەدەن, ال 400 كيلوگرامنان اسسا كاتەگورياسىنا قاراي 600-650 تەڭگەدەن الامىز» دەدى «تورعاي ەت» جاۋاپكەرشىلىگى شەكتەۋلى سەرىكتەستىگىنىڭ ديرەكتورى راسۋل مۇقانوۆ.
قازىر ەت كومبيناتىندا 60 ادام جۇمىس ىستەيدى, ءوندىرىس تولىق قۋاتىنا جەتكەن كەزدە جۇمىسشىلار سانى 120 عا دەيىن كوبەيتىلەدى.
ءنازيرا جارىمبەت,
«ەگەمەن قازاقستان»
قوستاناي
