تالاي ۇرپاقتىڭ ەستەتيكالىق تالعامىن تاربيەلەگەن بۇل شىرايلى شىعارمالار ورىس مادەنيەتى تاريحىندا ويىپ وتىرىپ ورىن الاتىن «كۇمىس عاسىر بالەتتەرى» توپتاماسىنداعى توپجارعان جاۋھارلار قاتارىنا جاتادى.ء سوز رەتى كەلىپ تۇرعاندا اتالمىش اعىمعا از-كەم انىقتاما بەرە كەتكەنىمىز ءجون سەكىلدى. التىن عاسىرى اياقتالىپ, اپتىعى باسىلعان رەسەي رۋحانياتى XIX عاسىردىڭ اياعىندا داعدارىسقا ۇشىراپ, باياعى داڭقىنان ايىرىلا باستادى. مىنە, وسىنداي قۇندىلىقتار قۇلدىراعان تۇستا ك.ستانيسلاۆسكي, ۆ.نەميروۆيچ-دانچەنكو سياقتى تۇلعالار ورىس مادەنيەتىن قايتادان ورگە سۇيرەپ, ەكىنشى تىنىسىن اشتى. ويىن-ساۋىق ورنىنا اينالا باستاعان كيەلى ساحنانىڭ ءوڭى كىردى. ماسكەۋ كوركەم تەاترىنىڭ (محت) قابىرعاسى قالانىپ, سۇبەلى پەسالار رەپەرتۋار قورىن بايىتتى. سوندىقتان دا وسىناۋ قايتا ورلەۋ كەزەڭى «كۇمىس عاسىر» دەپ اتالادى.
ەلدى ەلەڭدەتكەن جاڭاشىل باعىتتار بالەت ستسەناسىن دا قامتىدى. ونداي وڭدى وزگەرىستەر نەگىزىنەن بىلىكتى مامان م.فوكيننىڭ ەسىمىمەن تىعىز بايلانىستى ەكەنىن ايتۋعا ءتيىسپىز. ول بۋىنسىز بيشىلەردى باستاپ بارىپ اتاقتى مەتسەنات س.دياگيلەۆ ۇيىمداستىرعان پاريجدەگى ورىس ماۋسىمىنا قاتىسىپ, ۇلكەن ابىرويعا بولەندى. سونداعى ارتىستەردىڭ ىشىندە ا.پاۆلوۆا, ۆ.نيجينسكي, ت.كارساۆينا, ە.گەلتسەر ءتارىزدى تالانتتارى تاس جارعان تارلاندار بولعانىنان دا حابارىمىز بار.
تەاتردىڭ ءباسپاسوز قىزمەتى الدىن الا تاراتقان اقپاراتتاردا «شوپەنيانا» مەن «شەحەرەزادا» كوپشىلىك كوڭىلىن كونشىتەتىنىن العا تارتادى. ويتكەنى ۇستىنى بەرىك ونەر ۇجىمىنىڭ شىعارماشىلىق مۇمكىندىگى وتە جوعارى. اڭىزعا اينالعان حورەوگرافيا مەن ۆيكتور كارارە, اناتولي نەجنىي قاتارلى حاس شەبەرلەر ازىرلەگەن كورنەكى ستسەنوگرافيالار كوزدىڭ جاۋىن الادى. دەكوراتسيالاردا سول زاماننىڭ پوەتيكالىق رۋحى كورىنىس تاپقان. كوستيۋمدەر ميلانداعى «ينستيتۋتو مارانگوني» اكادەمياسىنىڭ تۇلەگى اراسەل دوسمۇراتوۆا مەن دارىندى سۋرەتشى ەلەنا نەتسۆەتاەۆا-دولگالەۆانىڭ ەسكيزدەرىمەن تىگىلگەن.
قالعان قىزىقتىڭ ءبارىن 30 قاراشادا «استانا وپەراعا» كەلىپ, ءوز كوزدەرىڭىزبەن كورگەندەرىڭىز دۇرىس, قادىرلى ونەرسۇيەر قاۋىم.
تالعات باتىرحان,
«ەگەمەن قازاقستان»
