بەس ەل ۇمىتكەر
جاقىندا 2020 جىلى وتەتىن جازعى وليمپيا ويىندارىنا ۇمىتكەر قالالار انىقتالدى. قازىر ازيا مەن ەۋروپانىڭ توكيو, مادريد, باكۋ, ىستامبۇل جانە دوحا قالالارى 2020 جىلعى وليمپيادا استاناسى اتانۋعا ۇمىتتەنىپ وتىر. بۇل ءمارتەبەلى اتاقتى قاي قالانىڭ يەلەنەتىنى كەلەسى جىلى بەلگىلى بولادى.
بۇعان دەيىن ريم قالاسى دا وليمپيا ويىندارىن وتكىزۋگە قۇلشىنىس تانىتقان ەدى. الايدا, سوڭعى اينالىمعا كەلگەندە ريم ءوزىنىڭ ءوتىنىشىن قايتارىپ الدى. ونىڭ سەبەبىن يتاليانىڭ پرەمەر-ءمينيسترى ماريو مونتي ەل ەكونوميكاسىنىڭ وليمپياداعا جۇمسالاتىن شىعىندى كوتەرە المايتىندىعىمەن ءتۇسىندىردى. ونىڭ ايتۋىنشا, ەلدىڭ قاراجاتى الەمنىڭ باستى باسەكەلەرىن وتكىزۋگە جەتكىلىكسىز.
جاقىندا 2020 جىلى وتەتىن جازعى وليمپيا ويىندارىنا ۇمىتكەر قالالار انىقتالدى. قازىر ازيا مەن ەۋروپانىڭ توكيو, مادريد, باكۋ, ىستامبۇل جانە دوحا قالالارى 2020 جىلعى وليمپيادا استاناسى اتانۋعا ۇمىتتەنىپ وتىر. بۇل ءمارتەبەلى اتاقتى قاي قالانىڭ يەلەنەتىنى كەلەسى جىلى بەلگىلى بولادى.
بۇعان دەيىن ريم قالاسى دا وليمپيا ويىندارىن وتكىزۋگە قۇلشىنىس تانىتقان ەدى. الايدا, سوڭعى اينالىمعا كەلگەندە ريم ءوزىنىڭ ءوتىنىشىن قايتارىپ الدى. ونىڭ سەبەبىن يتاليانىڭ پرەمەر-ءمينيسترى ماريو مونتي ەل ەكونوميكاسىنىڭ وليمپياداعا جۇمسالاتىن شىعىندى كوتەرە المايتىندىعىمەن ءتۇسىندىردى. ونىڭ ايتۋىنشا, ەلدىڭ قاراجاتى الەمنىڭ باستى باسەكەلەرىن وتكىزۋگە جەتكىلىكسىز. سپورت ارەنالارى دا قايتا جوندەۋدى قاجەتسىنەدى. يتاليا پرەمەر-ءمينيسترى ەلدەگى وليمپيادا كوميتەتىنىڭ باسشىسى دجوۆانني پەترۋچي جانە قالا اكىمى ريما دجانني اليمانومەن كەڭەسىپ, وليمپيادادان ۇمىتكەر بولۋدان باس تارتۋ جونىندە وسىنداي شەشىمگە كەلگەندەرىن ايتتى.
مۇنىڭ الدىندا يتاليانىڭ ترەنتو قالاسى دا 2017 جىلعى قىسقى ۋنيۆەرسياداعا ۇمىتكەر بولۋدان ءوتىنىشىن قايتارىپ العان بولاتىن. سول كەزدە ۇمىتكەرلىكتەن باس تارتقان ترەنتونىڭ ورنىنا الماتى قالاسىنىڭ ۋنيۆەرسيادا استاناسى بولىپ جاريالانعانى بەلگىلى.
ال جازعى وليمپياداعا كەلسەك, ءبىزدىڭ پىكىرىمىزشە, ۇمىتكەر قالالاردىڭ ىشىندە باكۋدەن باسقاسىنىڭ ءبارىنىڭ وليمپيادانى قابىلداۋعا مۇمكىندىگى زور. ءويتكەنى, وليمپيادا 2012 جىلى ەۋروپانىڭ لوندون جانە 2016 جىلى وڭتۇستىك امەريكانىڭ ريو دە جانەيرو قالاسىندا وتكىزىلگەن سوڭ, ازيا قۇرلىعىنا بىردەن بەت بۇرۋى مۇمكىن. ماسەلەن, جاپونيا 2002 جىلى وڭتۇستىك كورەيامەن بىرىگىپ, فۋتبولدان الەم چەمپيوناتىن وتكىزەردىڭ الدىندا سپورت ارەنالارىنىڭ ءبارىن قايتا جاڭارتىپ, سالاتىندارىن سالىپ, تۇرعىزاتىندارىن تۇرعىزىپ الدى. بۇل ەلدە ينفراقۇرىلىم دا وتە جوعارى دەڭگەيدە دامىعان. ونىڭ ۇستىنە كۇنشىعىس ەلىنىڭ وليمپيادانى ءوتكىزۋدەن ءتاجىريبەسى بار. توكيودا ءتورت جىلدىقتىڭ بايراقتى باسەكەسى العاش رەت 1964 جىلى وتكىزىلگەن بولاتىن. سول حVII جازعى وليمپياداعا قازاقتان شىققان جەلاياقتار ءامين تۇياقوۆ پەن عۇسمان قوسانوۆتىڭ بارعانىن بىلەمىز. الايدا ءامين اعامىز سول جولى كسرو قۇراماسى باس باپكەرىنىڭ قاتەلىگىنەن جارىسقا قاتىسا المادى. نەگىزى, سول جولعى وليمپيادا توكيودا ودان ەرتەرەك, ياعني 1940 جىلى وتكىزىلۋگە ءتيىس ەدى. الايدا, ەكىنشى ءدۇنيەجۇزىلىك سوعىس XII جازعى وليمپيادانى وتكىزۋگە كەدەرگىسىن جاسادى.
تۇركيانىڭ ىستامبۇل قالاسىنىڭ دا وليمپيادانى وتكىزۋگە قاۋقارى جەتەدى. بۇل ەل ءالى وليمپيا ويىندارىن وتكىزىپ كورمەسە دە ءتورت جىلدىقتىڭ باستى باسەكەسىن لايىقتى دەڭگەيدە قابىلداي الاتىنى انىق. ونىڭ ءبىرنەشە سەبەبى بار. الدىمەن, ءتۇركيادا سپورت وتە جوعارى دەڭگەيدە دامىعان. بۇل ەلدە سپورت يسلام دىنىنەن كەيىنگى ەكىنشى «ءدىنگە» اينالعان. تۇركيادا سپورتتىڭ بۇقارالىق سيپاتقا يە بولعانى سونشا, ونىمەن ادامدار بالا كەزىنەن باستاپ وقۋ, ءبىلىم الۋمەن قاتار اينالىسادى. ياعني, وليمپيادا الەمدەگى ءتورت تەڭىز توعىسقان قالادا وتكىزىلىپ جاتسا, حالىق ونى وزدەرىنىڭ ىستىق ىقىلاستارىمەن كوتەرىپ الادى دەگەن ءسوز. بۇعان ءبىز 2005 جىلى ورتالىق ازيا ەلدەرىنىڭ ءبىر توپ باق وكىلدەرىمەن ىستامبۇل قالاسىنا بارعانىمىزدا كوز جەتكىزگەن ەدىك. قالادا «گالاتاساراي» مەن «بەشيكتاش» فۋتبول كلۋبتارىنىڭ ستاديوندارىنان باسقا بىرنەشە الىپ سپورت ارەنالارى بار. بۇل جەرلەردىڭ بارىندە سپورتتىڭ بىرنەشە تۇرلەرىنەن ءبىر مەزەتتە جارىستار وتكىزۋگە بولادى. ال قالانى قۇشاعىمەن قىسىپ تۇرعان ءتورت تەڭىز سپورت جارىستارىن وتكىزۋگە ەڭ قولايلى جەر بولىپ ەسەپتەلەدى.
ىستامبۇل – بۇعان دەيىن ءتورت وليمپيادانى قابىلداۋعا ءۇمىتكەر بولعان قالا. ەندى بۇل ونىڭ بەسىنشى قادامى بولىپ وتىر. ەگەر انادولى ەلىنىڭ ساۋلەتى مەن داۋلەتى دامىعان قالاسى 2020 جىلى جازعى وليمپيا ويىندارىن وتكىزەتىن قالا بولىپ تانىلسا, بۇل ءبىزدىڭ استانا مەن الماتى سياقتى تۇركىتىلدەس ەلدەر اراسىندا كەشەندى جارىستاردى قابىلداۋدى ءوزىنىڭ موينىنا العان قالا رەتىندە سانالاتىن بولادى.
قازىر ازيا قۇرلىعىنداعى الاقانداي كاتار دا ولمپيادانى ءوتكىزۋگە باستى ۇمىتكەر ەل بولىپ سانالادى. ونىڭ استاناسىندا 2010 جىلى جازعى ازيا ويىندارى ءوتكىزىلگەن بولاتىن. سول كەزدە جازعى ازيادانىڭ اشىلۋ سالتاناتىنا قاتىسقان ارىپتەستەرىمىز تاريحتا جارىستاردىڭ ىشىندە ەڭ عاجاپ, ەڭ ادەمى اشىلۋ سالتاناتىنا كۋا بولعاندارىن ايتقان ەدى. «مۇنداي اشىلۋ سالتاناتىن ءبىز ومىرىمىزدە كورگەن ەمەسپىز. ويىنداردىڭ اشىلۋ ءراسىمى عاجاپ, كەرەمەت بولدى!», دەگەن ەدى ولار.
تاعى ءبىر ايتاتىن نارسە, 2022 جىلى فۋتبولدان الەم چەمپيوناتى دا وسى كاتار ەلىندە وتەدى. بۇل ەلدىڭ ەكى قوياندى ءبىر وقپەن اتۋعا تالپىنىپ جاتقانى دا سوندىقتان بولار. قولدا بار ءمالىمەتتەرگە قاراعاندا, قازىر كاتار حانزادالارى ادام ويىنا كەلمەيتىن سپورت كەشەندەرىن سالۋدا. دايىندىق قازىردەن باستالدى دەگەنىمىز وسى.
ال ازەربايجاننىڭ باكۋ قالاسى بولسا, وعان جوعارىدا اتالعان قالالارمەن سالىستىرعاندا وليمپيادانى وتكىزۋگە ءالى ەرتە دەپ ويلايمىز. بۇعان ءبىزدىڭ بىلتىر باكۋدە بوكستان ەرەسەكتەر اراسىندا وتكەن الەم چەمپيوناتىندا كوزىمىز جەتكەن بولاتىن. راس, قازىر باكۋدە بۇرىنعى توفيك باحراموۆ اتىنداعى ورتالىق ستاديون بۇزىلىپ, ونىڭ ورنىنا جاڭادان سپورت ارەناسى سالىنۋدا. بىراق سوعان قاراماستان, ونىڭ ءتورت جىلدا ءبىر كەلەتىن ءدۇبىرلى دودانى لايىقتى دەڭگەيدە ءوتكىزە الامىز دەگەنىنە سەنە المايمىز. دەگەنمەن, مۇنايدان تۇسەتىن تابىستار 2020 جىلعى وليمپيادانىڭ استاناسىن انىقتاعاندا, باكۋگە اجەپتاۋىر ىقپال جاساۋى ابدەن مۇمكىن. ويتكەنى, حالىقارالىق وليمپيادا كوميتەتى ءۇشىن 2011 جىلى قىسقى ازيا ويىندارى وتكەن استانا مەن الماتى, 2014 جىلى قىسقى وليمپيادانى قابىلدايتىن رەسەيدىڭ سوچي قالاسى مەن 2017 جىلى قىسقى ۋنيۆەرسيادا وتەتىن الماتى قالاسى سياقتى ازەربايجاننىڭ باكۋ قالاسى ۇلكەن سپورتتىق جارىستاردىڭ الاڭى بولىپ سانالادى.
داستان كەنجالين.
