− مەكتەپ اسحاناسىنداعى بالالارعا بەرىلەتىن استىڭ دۇرىس بولۋىن قاداعالايتىن ارنايى مونيتورينگتىك توپ قۇردىق, − دەدى سەمەي قالالىق ءبىلىم ءبولىمىنىڭ باستىعى ناتاليا فەسەنكو, − اتا-انالاردى وسى توپ قۇرامىنا ەنۋگە شاقىرامىز.
سەمەيدەگى مەكتەپ بىتىرگەن تۇلەكتەر جىل سايىن توپ-توبىمەن رەسەيگە كەتىپ جاتىر. بۇل جاستاردىڭ قازاقستانداعى جوعارى وقۋ ورنىنا تۇسۋگە مۇمكىندىگى جوق. سەبەبى ۇبت-دا جيناعان بالى تومەن. وسى ورايدا اتا-انالاردىڭ ءبىرى ليليا ۆيكتوروۆنا وقۋشىلاردىڭ جىل بويى مەكتەپىشىلىك ۇبت ەمتيحاندارىن 90-نان جوعارى بالعا تاپسىرعانىمەن, جوعارى وقۋ ورنىنا بارعاندا جينايتىن بالى تومەندەپ قالاتىنىن, سوندىقتان بۇل شاكىرتتەردىڭ ەلىمىزدە قالۋىنا ءبىر امال جاساۋ كەرەكتىگىن جەتكىزدى.
− ءيا, مۇنداي پروبلەما بار, − دەدى ن.فەسەنكو, − سەمەيدە مەكتەپ بىتىرگەندەر رەسەيدىڭ كورشى بارناۋل قالاسىنا وقۋعا ءتۇسۋدى ادەتكە اينالدىرعان. وندا ءبىلىم بەرۋ دەڭگەيى ممۋ-مەن بىردەي ەمەس. قازاقستاندىق وقۋشىلاردىڭ تۋعان جەرىندە ءبىلىم الۋى ءۇشىن جىل بويى مەكتەپتە تاپسىرعان ەمتيحاندارى دا ەسەپكە الىنۋى ءتيىس. مۇنى ءبىز قولدايمىز. بولاشاقتا ءبىر وڭتايلى شەشىمى جاسالادى.
سول سياقتى قالا ماڭىنداعى پريگورود ورتا مەكتەبىنەن كەلگەن مەيرامگۇل ەسىمدى اتا-انانىڭ ايتۋىنشا, بالالارعا ارنالعان تەگىن ۇيىرمە, سپورتتىق سەكتسيالار بولعانىمەن, وندا ساباق بەرەتىن تۇراقتى ادام جوق. ەگەر كۇزدە ۇيىرمە جەتەكشىسى ءبىر اي ەڭبەك دەمالىسىنا شىقسا, قىس تۇسە اياز باستالىپ, سىرتقا شىعۋ مۇمكىن بولماي قالادى. سوندىقتان تۇرمىسى تومەن وتباسىلاردىڭ بالالارى ءۇشىن تەگىن ۇيىرمە, سەكتسيالار ۇزبەي جۇمىس ىستەپ تۇرۋى ءتيىس. بۇل بالالاردىڭ, جاسوسپىرىمدەردىڭ اراق پەن تەمەكىدەن, باسقا دا لاس ارەكەتتەردەن, بوس جۇرىستەردەن اۋلاق بولىپ, ۋاقىتتارىن ماڭىزدى وتكىزۋىنە سەپ بولماق.
راۋشان قابجانقىزى,
«ەگەمەن قازاقستان»
سەمەي
