ورتالىق ازيانىڭ كوشپەلى حالىقتارى ءۇشىن «رەفورماتسيا» جانە «رەفورماتور» دەگەن ۇعىمدار بەيتانىس ءارى بوتەندەۋ تۇسىنىك ەدى. مۇندا تىرشىلىكتىڭ ءداستۇرلى, بۇلجىماس ىرعاعى مىڭداعان جىلدارعا دەيىن وزگەرىسسىز كەلدى. بۇل ءۇردىس جاڭا ءداۋىر تۋىپ, كوشپەلىلەر ءومىرى بىرتىندەپ وزگەرە باستاعانعا دەيىن جالعاستى. بۇل وزگەرىس سوتسياليستىك جۇيە مەن قۇندىلىقتارعا نەگىزدەلگەن جاڭا قوعام قۇرۋدى ماقسات ەتكەن كەڭەس وكىمەتىنىڭ ىقپالىمەن جاسالعانى بەلگىلى. ۇجىمدىق رەفورماتورلىقتىڭ تىزگىنىن كوممۋنيستەر پارتياسى ءوز قولىنا الدى دا, پارتيا جەتەكشىلەرى بۇل شىرعادا تەك ۇجىمدىق ماقساتتىڭ اتقارۋشىلارى دارەجەسىندە قالدى. ولاردىڭ سوتسياليزم قۇرىلىسىنا قوسقان جەكە ۇلەستەرى تاريحي پروتسەستى دامىتۋداعى حالىقتىڭ ماڭىزدى ءرولى كونتسەپتسياسىمەن شەكتەلىپ, ساياسات ساحناسىنا كورنەكتى تۇلعالاردىڭ كوتەرىلۋى تەك تاريحي زاڭدىلىق رەتىندە عانا قارالدى. بىراق حح عاسىردىڭ اياعىندا كسرو مەن كوممۋنيستىك بلوكتىڭ قۇلاۋ پروتسەسى بۇرىنعى كەڭەستىك رەسپۋبليكالار مەن حالىقتىڭ تاعدىرىن رەسپۋبليكالار باسشىلىعىنداعى تۇلعالارعا تىكەلەي تابىستاعانى ءسوزسىز. پوستكەڭەستىك قوعامنىڭ كورنەكتى رەفورماتورلارىنىڭ قاتارىندا قازىر ءوز ەلىن كوپتەگەن كەڭەستىك كورشىلەرىمەن سالىستىرعاندا دامۋدىڭ داڭعىل جولىنا ءساتتى الىپ شىعا العان قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ەسىمى اتالىپ ءجۇر. قازاقستان تمد ەلدەرىنىڭ ىشىندە حالىق تابىسىنىڭ ءوسۋ دەڭگەيى بويىنشا رەسەي فەدەراتسياسىنان كەيىنگى ەكىنشى ورىنداعى ەل.
قاراپايىم ەڭبەك ادامىنىڭ وتباسىنان شىققان نازارباەۆ ينجەنەرلىك-تەحنيكالىق ءبىلىم العان سوڭ بارلىق كەڭەستىك لاۋازىمدار باسپالداعىنان وتكەننەن كەيىن ەڭ جاس كەڭەستىك پرەمەر اتاندى. ول كەڭەستىك باسشىلاردىڭ قاساڭ ساياساتى مەن كونسەرۆاتورلىعىمەن كۇرەسە ءجۇرىپ, قايتا قۇرۋ داۋىرىندە ءوزىن تالانتتى جەتەكشى رەتىندە كورسەتە ءبىلدى, وسىنىڭ ناتيجەسىندە الىپ كەڭەستىك ساياسات ءوليمپىنىڭ بيىگىنە كوتەرىلدى. نازارباەۆ ءۇشىن بيلىككە بارار جول سونشالىقتى كەدەرگىسىز, اۋەل باستان دايىندالىپ, شەشىلىپ قويعان ەدى دەۋگە بولا قويماس. جان-جاقتى الەۋەتتى قارسىلاستارىمەن كۇرەستە تولىق جەڭىسكە جەتكەن سوڭ نازارباەۆ كۇيرەگەن وكىمەت بيلىگىن ءوز قولىنا شوعىرلاندىردى دا, قوعام ءومىرىنىڭ بارلىق سالالارىندا بىرقاتار باتىل رەفورمالار جاسادى, وسىنىڭ ناتيجەسىندە الەمدەگى كۇشتى, تاۋەلسىز, بەدەلدى قازاق مەملەكەتىن قۇرۋدا تەڭدەسسىز تابىستارعا قول جەتكىزدى.
نازارباەۆقا ءتۇرلى كوزقاراستار تۇرعىسىنان قاراۋعا بولادى: جاقتاستارى ونى بارلىق جاعىنان ماداقتاسا, قارسىلاستارى ول تۋرالى اڭگىمەلەردى سان-ساققا جۇگىرتىپ, قاتاڭ سىنايدى. بۇل ورايدا ول دا بارلىق ۋاقىتتا ميلليونداعان ادامداردىڭ نازارىندا بولعان ۇلى تۇلعالار تاعدىرىنان قاشىپ قۇتىلا المايتىن شىعار... الەكساندر ماكەدونسكي, گاي يۋلي تسەزار, گاننيبال, ناپولەون, لي كۋان يۋ, موحاتحير موحاممەد ت.ب. وسى جولدان وتپەدى مە. ۇلى تۇلعالار تۋرالى داقپىرتتار, اڭىزدار مەن ءاپسانالار وتە كوپ بولادى. ال قىزىقسىز تۇلعالار توڭىرەگىندە مۇنداي اڭگىمەلەر ايتىلمايدى. ادامزات جاراتىلىسى وسىنداي.
ساياسي جانە رەفورماتورلىق قايراتكەرلىگىنەن وزگە نازارباەۆ ادەبيەتشى, عالىم رەتىندە دە تانىمال. اسا قاراپايىمدىلىعى مەن ايقىندىعىنىڭ ارقاسىندا ونىڭ شىعارمالارى ساياسي ادەبيەت كلاسسيكاسىنىڭ قاتارىنا ەندى ءارى قازاق ءتىلىن وقىپ-ۇيرەنۋدە كەڭىنەن قولدانىلۋدا.
نازارباەۆ تۋرالى كوپتەگەن كىتاپتار مەن ماقالالار جازعان اۆتورلاردىڭ بارلىعى دا ونىڭ الىمدىلىعىن, يننوۆاتسيالىق ارەكەتتەرگە بەيىمدىلىگىن, كۇرت وزگەرىستەرگە تەز يكەمدەلىپ, سوڭىنان دەرەۋ ورىندالۋى ءتيىس شەشىمدەردى جىلدام قابىلداي الاتىنىن اتاپ كورسەتەدى. پرەزيدەنت نازارباەۆتىڭ ينجەنەرلىك, ەكسپەريمەنتتىك ويلاۋ جۇيەسىن, كەلەشەكتى, قاجەتتى شارالار ءمودۋلىن, يدەيانى كورە ءبىلۋ قاسيەتىن, حالىققا تۇسىنىكتى جانە قاناتتاندىراتىن ماقساتتار مەن مىندەتتەردى جوسپارلاپ, ونى جۇزەگە اسىرۋعا قول جەتكىزە الاتىنىن ايرىقشا ايتا كەتۋ كەرەك. ەۋرازيالىق يدەياسى, قازاقستاندىق دامۋ جولىن تاڭداۋ, استانانى الەمدىك وركەنيەتتەر كىندىگىنە اينالدىرۋ, ازياداعى قاۋىپسىزدىك جۇيەسىن قۇرۋ, ازيالىق كونتينەنتتى يادرولىق قارۋدان ازات ايماققا اينالدىرۋ سياقتى نازارباەۆ يدەيالارى مەن باستامالارى ادامزات يدەالىنا, ءوز حالقىنا ادال قىزمەت ەتۋدىڭ, الەمدە بەيبىتشىلىكتى ساقتاۋدىڭ بىردەن ءبىر رۋحتاندىرۋشى ۇلگىسى بولىپ تابىلماق!
زاينيدين قۇرمانوۆ,
قىرعىز جوگوركۋ كەنەشىنىڭ ەكس-سپيكەرى,
تاريح عىلىمدارىنىڭ دوكتورى, پروفەسسور
