قولدا 46 جولداما
ءدۇبىر
بيىل ۇلىبريتانيانىڭ استاناسى لوندون قالاسىندا ءتورت جىلدا ءبىر اينالىپ كەلەتىن, جۇمىر جەردەگى سپورت جانكۇيەرلەرىنىڭ اسىعا كۇتەتىن جارىسى, جارىسى ەمەس, ونىڭ تورەسى – جازعى وليمپياداسىنىڭ جالاۋى جەلبىرەيدى.
ءدۇبىر
بيىل ۇلىبريتانيانىڭ استاناسى لوندون قالاسىندا ءتورت جىلدا ءبىر اينالىپ كەلەتىن, جۇمىر جەردەگى سپورت جانكۇيەرلەرىنىڭ اسىعا كۇتەتىن جارىسى, جارىسى ەمەس, ونىڭ تورەسى – جازعى وليمپياداسىنىڭ جالاۋى جەلبىرەيدى.
بۇل ءتورت جىلدىقتىڭ باستى دوداسى 27 شىلدە مەن 12 تامىز ارالىعىندا لوندون مەن ونىڭ اينالاسىنداعى قالالاردا وتەدى. وليمپيادانىڭ نەگىزگى جارىستارى لوندوننىڭ وزىندە وتسە, فۋتبولدان تۋرنيرلەر مەن ەسكەك ەسۋ, اكادەميالىق ەسكەك, جەلكەندى سپورت جانە ماۋنتينبايكتەن جارىستاردى بيرمينگەم, نيۋكاسل, مانچەستەر, كوۆەنتري, گلازگو جانە كارديفف قالالارىندا ءوتكىزۋ جوسپارلانۋدا.
جالپى, لوندوندا وليمپيا ويىندارى وسىمەن ءۇشىنشى رەت وتكىزىلگەلى وتىر. بۇل ەلدە وليمپيادا العاش رەت 1908 جىلى, ودان كەيىن 1948 جىلى وتكەن بولاتىن. ەندى, مىنە, اراعا 64 جىل سالىپ, تۇماندى البيون تاعى دا بايراقتى باسەكەگە قاتىسۋشىلاردى قارسى الاتىن بولادى. بۇعان دەيىن 2012 جىلعى وليمپيادانى وتكىزۋگە لوندوننان باسقا گاۆانا, ىستامبۇل, لەيپتسيگ, مادريد, ماسكەۋ, نيۋ-يورك, پاريج بەن ريو-دە-جانەيرو نيەت بىلدىرگەن ەدى. الايدا سولاردىڭ اراسىنان تاڭداۋ لوندون قالاسىنا ءتۇستى. بيىلعى وليمپيادا قاتىسۋشى ەلدەر مەن سپورتشىلاردىڭ سانى جاعىنان ەڭ كوپ ويىندار رەتىندە تاريحتا قالعالى تۇر.
وليمپيادا جارىستارى وتەتىن جەرلەر ءۇش ايماققا بولىنگەن. ولار وليمپيادالىق, وزەن-سۋلى جانە ورتالىق دەپ اتالادى. ونىڭ ءبىرىنشىسى جارىستىڭ اشىلۋى مەن جابىلۋى وتەتىن وليمپيادالىق ستاديون بولسا, ەكىنشىسى لوندوننىڭ سۋ ورتالىعى, قالالىق ۆەلوپاركى, كونكي ورتالىعى, باسكەتبول ارەناسى, گاندبول ارەناسى, گرينۆيچ ارەناسى, كورمە ورتالىعى, ۋەمبلي ستاديونى, لاۋن تەننيس پەن كروكەت كلۋبى, ريدجەنتس ساياباعى, حورس گاردس پەرەد, گايد پارك, ەرلس كورت, ەسكەك سلالومى ورتالىعى, دورني لەيك جانە جەلكەندى سپورتتىڭ ۇلتتىق اكادەمياسى. ءۇشىنشى وتەتىن جەر لوندوننىڭ ماڭىنداعى نيۋكاسل, مانچەستەر, بيرمينگەم, كوۆەنتري مەن ۋەلستىڭ كارديفف پەن شوتلانديانىڭ گلازگو قالالارى. سونىمەن بىرگە, انگليانىڭ تەما وزەنى دە جارىستاردى وتكىزۋگە دايىن تۇر. مىنە, وسى جەرلەردىڭ ءبارىندە وليمپيادا كەزىندە الەمنىڭ 205 ەلىنەن 12 500 سپورتشى قاتىسىپ, سپورتتىڭ 33 تۇرىنەن 303 مەدال جيىنتىعىن ساراپقا سالادى. وندا ەڭ كوپ جۇلدەلەر ادەتتەگىدەي جەڭىل اتلەتيكا (47) مەن جۇزۋدەن (34) تاراتىلادى. باسقا سپورت تۇرلەرىندە, ماسەلەن, كۇرەس تۇرلەرىندە (18), ۆەلوسپورتتا (18), ەسكەك ەسۋدە (16), نىسانا كوزدەۋدە (15), اۋىر اتلەتيكادا (15), دزيۋدودا (14), اكادەميالىق ەسۋدە (14), تاەكۆاندودا (8), ات سپورتىندا (6), بادمينتوندا (5), تەننيستە (5), ساداق اتۋدا (4), ۆولەيبولدا (4), ۇستەل تەننيسىندە (4), ءۇشسايىس, باسكەتبول, سۋ دوبى, باتۋتتا سەكىرۋدە, بەسسايىستا, كوركەم گيمناستيكا, كوگالداعى حوككەي, سينحروندى ءجۇزۋ مەن فۋتبولدا جۇلدەلەر ەكى-ەكىدەن ساراپقا سالىنادى.
ەندى ءبىزدىڭ ەلدىڭ تاۋەلسىزدىك العان كەزدەن بەرى وليمپيا ويىندارىندا كورسەتكەن ونەرلەرىنە قىسقاشا توقتالساق, قازاقستان تاۋەلسىز ەل رەتىندە وليمپياداعا 1996 جىلى قاتىسا باستادى. وسى ويىنداردا ءبىزدىڭ ەل الەمگە ءوزىن تاعى ءبىر قىرىنان تانىتتى. اتلانتادا ءبىزدىڭ سپورتشىلار 3 التىن, 4 كۇمىس جانە 4 قولا مەدال يەلەنىپ, جالپىكوماندالىق ەسەپتە 24-ورىنعا تابان تىرەدى. بۇل سىندا بوكسشىمىز ۆاسيلي جيروۆ, گرەك-ريم كۇرەسىنىڭ شەبەرى يۋري مەلنيچەنكو مەن بەسسايىسشى الەكساندر پارىگين التىننان القا تاقتى.
2000 جىلى سيدنەيدە وتكەن وليمپيادادا قازاقستان سپورتشىلارى 3 التىن, 4 كۇمىس مەدال الىپ, 22-ورىنعا يە بولدى. وندا بوكسشىلار بەكزات ساتتارحانوۆ پەن ەرماحان ىبىرايىموۆ, جەڭىل اتلەت ولگا شيشيگينا التىن جۇلدەنى جەڭىپ الدى. وسى ارادا 1996 جانە 2000 جىلدارى التىن مەدال الماسا دا, ەكى ءبىردەي وليمپياداعا قاتىسىپ, كۇمىس جۇلدە يەلەنگەن بوكسشىمىز بولات ءجۇمادىلوۆتىڭ ەڭبەگىن اتاپ وتكەنىمىز ءجون. قازىر الەمدە ەكى رەت وليمپياداعا قاتىسىپ, ەكەۋىندە دە فينالعا شىققان سپورتشىلار از. مىنە, سولاردىڭ قاتارىندا ءبىزدىڭ بولات ءجۇمادىلوۆ بار.
2004 جىلى افينادا وتكەن وليمپيادادا قازاقستان جالعىز عانا التىن جۇلدەنى قاناعات تۇتتى. ونى بوكسشى باقتيار ارتاەۆ جەڭىپ الدى. بۇل سىندا ودان باسقا ەلىمىز ءتورت كۇمىس جانە 3 قولا مەدال يەلەندى. ءسويتىپ, جالپىكوماندالىق ەسەپتە 40-ورىنعا تابان تىرەدى.
ال سوڭعى بەيجىڭ وليمپياداسىندا ەلىمىز 2 التىن, 4 كۇمىس جانە 7 قولا مەدالدى يەلەنگەنى بەلگىلى. مۇندا قازاقستان سپورتشىلارىنىڭ ىشىنەن زىلتەمىرشى يليا يلين مەن بوكسشى باقىت سارسەكباەۆ قانا قۇرمەت تۇعىرىنىڭ ەڭ بيىك ساتىسىنان كورىندى. ال جالپىكوماندالىق ەسەپتە ەلىمىز 204 ەلدىڭ اراسىنان 29- ورىندى يەلەندى.
ەندى لوندون وليمپياداسىندا سپورتشىلارىمىزدىڭ قانشا جۇلدەنى جەڭىپ الاتىندارىن ايتۋ قيىن. جاقىندا استانادا ءوتكەن تۋريزم جانە سپورت مينيسترلىگىنىڭ ەسەپتىك جيىنىندا لوندون وليمپياداسىنا دايىندىق ماسەلەسى تالقىلانىپ, وندا ەلىمىزدىڭ وزىق 25 مەملەكەتتىڭ قاتارىنا كىرۋ ءۇشىن تالاساتىنى ايتىلدى. ءبىزدىڭ مەجەمىز 4 نەمەسە 5 التىن جۇلدە ەكەن. سونىڭ ىشىندە اۋىر اتلەتيكاعا كوبىرەك سەنىم ارتىلاتىن سەكىلدى. سونىمەن بىرگە, بوكس, گرەك-ريم, ەركىن كۇرەس, دزيۋدو مەن جەڭىل اتلەتيكادان دا التىن جۇلدەگە ءۇمىتتىمىز. وسى جيىندا ۆيتسە-مينيستر ەلسيار قاناعاتوۆ بۇگىنگى ۋاقىتقا دەيىن ءبىزدىڭ سپورتشىلاردىڭ جازعى وليمپيا ويىندارىنا 46 جولدامانى جەڭىپ العانىن, 2012 جىلى نەگىزگى ليتسەنزيالىق جارىستاردىڭ وتكىزىلەتىنىن ەسكەرسەك, قازاقستان ءوز جولدامالارىنىڭ سانىن بەيجىڭ وليمپياداسىنا العان ليتسەنزيالار سانىنان اسىرۋدى جوسپارلاپ وتىرعانىن اتاپ ءوتتى. ونىڭ ايتۋىنشا, وتاندىق سپورتشىلار جوعارى سپورتتا وتە بيىك جەتىستىكتەرگە جەتىپ ءجۇر. وليمپيالىق سپورت تۇرلەرىنەن وتكەن الەم چەمپيوناتتارىندا وتاندىق سپورتشىلار جەڭىپ العان مەدالداردىڭ رەكوردتىق سانى تىركەلدى. «قىسقا ۋاقىت ءىشىندە قانجىعامىز 15 مەدالمەن تولىقتى. الەم رەيتينگىندە قازاقستان التىن مەدالداردىڭ سانى بويىنشا 22-ورىنعا, ال ءجۇلدە سانى بويىنشا 14-ورىنعا ورنالاسىپ وتىر. بۇرىن-سوڭدى وسىنداي ۋاقىت ىشىندە مۇنشاما مەدال ءتۇسىپ كورمەگەن. بۇل وتاندىق سپورتشىلاردىڭ لوندون وليمپياداسى قارساڭىنداعى دايىندىق دەڭگەيىنىڭ جوعارى ەكەندىگىن كورسەتەدى», – دەدى ول.
جالپى, تاۋەلسىزدىك العان كەزدەن بەرى وليمپيا ويىندارىندا 9 التىن, 17 كۇمىس جانە 14 قولا مەدال يەلەنگەن ەلىمىز لوندون وليمپياداسىندا جۇلدەلەر سانىن الدىڭعى جارىستاردان گورى كوبەيتۋدى ماقسات ەتىپ وتىر. قازىر ءبىزدىڭ ەلىمىزدە وليمپيادانىڭ 46 جولداماسى, ونىڭ ىشىندە جەڭىل اتلەتيكادان – 12, اۋىر اتلەتيكادان – 8, بوكستان – 6, ەركىن كۇرەستەن – 4, كانوە جانە ەسكەك ەسۋدەن – 4, گرەك-ريم كۇرەسىنەن – 3, تاەكۆاندودان – 3, ايەلدەر كۇرەسىنەن – 2, ۆەلوشوسسەدەن – 2, نىسانا كوزدەۋ مەن سلالوم جانە كانوە مەن بايداركادا ەسكەك ەسۋدەن ءبىر-ءبىر جولداما بار.
بيىلعى وليمپيادانىڭ ءبىر ەرەكشەلىگى – وندا تۇڭعىش رەت وليمپيادا باعدارلاماسىنا ايەلدەر بوكسى ەندى. بۇل سىندا قىز-كەلىنشەكتەر ءۇش سالماق دارەجەسىندە قولعاپ تۇيىستىرەدى. بۇگىندە ءبىزدىڭ بوكستان ايەلدەر قۇراماسى وليمپيادا جولداماسى ءۇشىن وتەتىن جارىستارعا دايىندالىپ, سول ءۇش سالماقتا قولعاپ ءتۇيىستىرۋدى ماقسات ەتۋدە.
ارعى جاقتان ءبىر جاڭالىق
ۇلىبريتانيانىڭ الەمگە ايگىلى ۆۆس تەلەارناسى لوندوندا وتەتىن وليمپيا ويىندارىنان تىكەلەي اقپارات تاراتۋ ماقساتىندا ۋاقىتشا راديوستانسا اشۋ تۋرالى شەشىم قابىلدادى.
راديوستانسا 20 كۇن جۇمىس ىستەيتىن بولادى. تەلەارنا باسشىلىعى ونى اشۋ ءۇشىن 200 مىڭ فۋنت ستەرلينگتىڭ جۇمسالاتىنىن حابارلادى. وسى سوماعا راديوستانسانىڭ ينتەرنەت نۇسقاسىن اشۋعا جۇمسالاتىن قارجى دا كىرەدى. بۇدان باسقا ۆۆس باسشىلىعى وليمپيا ويىندارى كەزىندە جاستارعا ارنالعان ۆۆس-3 تەلەارناسىنىڭ جارىستى كورسەتەتىن باستى اقپارات قۇرالى بولاتىنىن مالىمدەدى. ازىرشە بۇل ارنا تەك كەشكىلىك حابارلاردى كورسەتىپ كەلەدى ەكەن. ويىندار باستالعاندا ول كۇندىزگى ەفيرگە شىعاتىن بولادى. وليمپيادا كەزىندە ۆۆس-3 تەلەارناسى 4,5 ملن. فۋنت ستەرلينگ تابىس تۇسىرەدى دەپ بولجانعان.
لوندوندا وليمپيا ويىندارىنىڭ بيلەتتەرى رەسمي تۇردە قايتا ساتىلىپ جاتىر. بۇعان دەيىن ۇلىبريتانيا پارلامەنتى الىپساتارلىقپەن اينالىسقان ادامنىڭ 20 مىڭ فۋنت ستەرلينگ (31 مىڭ اقش دوللارى) ايىپپۇل تولەيتىنى تۋرالى شەشىم قابىلداعان بولاتىن. الايدا ۋاقىت وتە كەلە, پارلامەنت قوعامنىڭ كوڭىل-كۇيىنە بايلانىستى وليمپياداعا بارا المايتىن ادامداردىڭ ساتىپ العان بيلەتتەرىنىڭ كۇيىپ كەتپەۋى ءۇشىن ولارعا بيلەتتەردى قايتا ساتۋعا رۇقسات بەرۋ تۋرالى شەشىم شىعاردى.
داستان كەنجالين.
