ۇرپاق ساباقتاستىعى ۇزىلۋگە شاق تۇر
جاستار جىلىنىڭ اياسىندا اتقارىلۋعا ءتيىس ۇلكەن جۇمىستىڭ ءبىرى – اۋىل جاستارىن جۇمىسپەن قامتۋدى جولعا قويۋ. مۇنى ارنايى باعدارلاما ەتىپ قابىلداسا نۇر ۇستىنە نۇر بولار ەدى. ءوزىم بىلەتىن جاعداي بويىنشا ايتسام, قازىر اۋىلدىق وڭىردەگى مادەنيەت سالاسىنىڭ دامۋى ءوز دەڭگەيىندە ەمەس. مەن ارنايى ءبىلىمدى مامان, جۇمىس كۇشىنە قاتىستى ايتىپ وتىرمىن. قىزمەتكەرلەردىڭ دەنى قارتايعان. سالاداعى ۇرپاق ساباقتاستىعى ۇزىلۋگە شاق تۇر. الدىڭعى بۋىننىڭ ءىزىن باسار جاستار قالاعا كەتكەن.
ءوزىم وسىدان 2 جىل بۇرىن استاناداعى جالاقىسى جاقسى جۇمىسىمدى تاستاپ اۋىلعا ورالدىم. ەل ءىشى التىن بەسىك قوي, ادام نەسىبەسىن ايماقتا ءجۇرىپ تە تاباتىنى انىق. بىراق, قازىرگى جاستاردىڭ اۋىلدا دا, قالادا دا الدىنان شىعاتىن باستى پروبلەماسى باسپانا بولسا كەرەك. الگىندە ايتقانداي, اۋىلعا قىزمەتكە كەلەتىن جاستاردى قولداۋ باعىتىنداعى ارنايى باعدارلاما بولسا, سوندا باسپانا, جۇمىس, جالاقىعا قاتىستى ىنتالاندىرۋ جاعى ناقتى بەلگىلەنسە. «ديپلوممەن اۋىلعا!» دەگەن باعدارلاما بار. وسى جوبادا قامتىلاتىن ماماندىقتاردى كوبەيتسە. «ەل ءىشى – ونەر كەنىشى» دەگەندەي, اۋىلدا تالانتتى ۇرپاق ءوسىپ جاتىر. ال ىنتاسى زور, تالانتتى بالانى باۋليتىن كاسىبي مامان بولماسا, ءداستۇر قالاي ساباقتاسپاق؟
جالپى, ءوز باسىم ەلباسى بۇل باستامانى جاريالاي وتىرىپ, بىزگە مۇمكىندىگىمىزدى كورسەتۋگە, بولاشاققا دەگەن سەنىمىمىزدى نىعايتۋعا جول نۇسقادى دەپ ويلايمىن. سول سەنىم ۇدەسىنەن شىعا بىلەيىك.
جارقىن باراقباي,
قاراكەمەر بالالار تەاترىنىڭ ديرەكتورى
الماتى وبلىسى,
ەڭبەكشىقازاق اۋدانى
ونەر ادامدارىن قولداۋ – كوكەيكەستى ماسەلە
«جاستار» جىلىنىڭ جاريالانۋى ءبىز سياقتى ونەرپاز جاستاردىڭ قۋانىشىن ەسەلەپ وتىر. ويتكەنى ونەر ادامىنىڭ حالىق پەن مەملەكەتتەن باسقا ارقاسۇيەرى جوق. ءبىزدى وسىرەتىن دە, وشىرەتىن دە – تىڭدارماندارىمىز. انشىلەردىڭ ونەرگە ادال بولۋدان باسقا ماقساتى بولمايدى. سول سەبەپتەن دە ءبىزدىڭ الەۋمەتتىك جاعدايىمىز باسقا سالا ماماندارىنا قاراعاندا, وزگەشەلەۋ بولىپ جاتادى. قازىر مادەنيەت سالاسىنداعى تابىسى ەڭ تومەن ماماندىق يەسىنىڭ ءبىرى ءبىز بولساق كەرەك. ءوزىم قاتارلى جاستاردىڭ ەڭ كوپ تاپقانى 80-100 مىڭ تەڭگەنىڭ اينالاسى. وسىدان بارىپ انشىلەردىڭ ونەرىن ساۋدالاپ, توي قۋالاپ كەتۋىنە ماجبۇرلىك تۋادى. وسى تۇستا ونەر ادامدارىن, اسىرەسە جاستاردى قولداۋدىڭ تەتىگىن قايتا ءبىر قاراۋ كەرەك سياقتى. جالاقىنىڭ ازدىعىنان بولەك, باسپاناسىزدىقتىڭ دا زاردابىن تارتىپ جۇرگەن جايىمىز بار.
ارينە, ناعىز ونەر يەسىن حالىقتىڭ ماحابباتى وسىرەدى. تىربانىپ, تالاپتانىپ, ونەرىمىزدى شىڭداۋدان بولەك, الەۋمەتتىك جاعدايىمىزدى دا ءوز بەتىمىزشە وڭالتۋعا تىرىسىپ كەلەمىز. بىراق, ءبىز وسىنداي تۇرمىستىق پروبلەمامەن باس قاتىرىپ جۇرگەن كەزەڭدە ونەرپازدىڭ التىن ۋاقىتى ءوتىپ جاتىر. ونەردى, ۇزدىك, وزىق ونەردى تۋعىزىپ, ەل نازارىنا ۇسىناتىن شاقتى وتكىزىپ الۋ تالانت ءۇشىن دە, ونەر ۇشىندە كەشىرىلمەيتىن كۇنا. وسى تۇرعىدان العاندا ءبىز مەملەكەتتىڭ قولداۋىنا مۇقتاجبىز. شۇكىر, قازىر بارلىق تاراپتان قولداۋ بار, قامقورلىق بار. ونەرپازدىڭ ءبارىن جارىلقاپ تاستاۋ مۇمكىن دە ەمەس شىعار. الايدا, جاستارعا قاتىستى بۇل تالاپ ءبىرىنشى ورىندالۋى كەرەك سياقتى.
ەلباسى 2019 جىلدى جاستارعا باسىرە رەتىندە اتاعاندا ءوز باسىم بۇكىل ماسەلەمىز شەشىلەتىن ءسات جاقىنداعانداي قۋاندىم. ۇزاعىنان بولعاي.
بەيبىت مۇساەۆ,
الماتى وبلىستىق ءسۇيىنباي اتىنداعى فيلورمانيانىڭ ءانشىسى, «مەن – قازاقپىن-2017» بايقاۋىنىڭ باس جۇلدەگەرى
ينفراقۇرىلىم تۇزەلسە دەيمىن
جاستار جىلىنان كۇتەرىمىز كوپ. كوپتەگەن جوبالاردىڭ جۇزەگە اسارى انىق. سول جوبالار ءبىر جىلدىق قانا بولماي, ەلىمىزدىڭ ودان كەيىنگى ۋاقىتتاعى يگىلىگىنە اينالسا دەگەن تىلەگىم بار. قازىر اۋىل شارۋاشىلىعىنا كوپتەگەن ماماندار جەتىسپەيدى, بىراق جاستار از بارادى. سەبەبى ولاردىڭ اۋىلدا تۇرعىسى كەلمەيدى. مامان بولماسا اۋىل شارۋاشىلىعى كوتەرىلمەيدى. ەلباسى بۇل سالانى ەكونوميكانىڭ درايۆەرىنە بالاعان بولاتىن. جاستار جاپپاي اۋىلعا بارۋ ءۇشىن ولارعا الدىمەن جاعداي جاسالۋى ءتيىس. مەملەكەتتىك باعدارلاما بويىنشا باسپانا سالىنسا, اۋىز سۋ, كوگىلدىر وتىنمەن قامتىلعان ينفراقۇرىلىم تۇزەلسە دەيمىن. وقۋ بىتىرگەن جاستاردىڭ اۋىلعا بارۋعا تارتىنشاقتايتىنىن مەن تۇسىنەمىن. جاعداي بولماسا جاستار دا قالاعا تىعىلا تۇسەدى. جاستار جىلى اۋىلدى كوتەرۋگە اتتانىس باستالسا, قانەكەي.
اباي دۇيسەكوۆ,
قوستاناي يندۋستريالىق-پەداگوگيكالىق كوللەدجى ديرەكتورىنىڭ جاستار ءىسى جونىندەگى ورىنباسارى
قوستاناي وبلىسى
ۇسىنىستار ۇلى ىستەرگە باستايدى
مەملەكەت باسشىسى ەل بولاشاعى – جاستاردى ەشقاشان نازاردان تىس قالدىرعان ەمەس. مەن ءوزىم جاستار ساياساتى سالاسىندا قىزمەت اتقاراتىندىقتان ەلباسىنىڭ جاستارعا ايتاتىن وي-پىكىرلەرى مەن تالاپ-تىلەكتەرىن ايرىقشا دەن قويىپ قابىلدايمىن.
ءبىز ءومىر ءسۇرىپ جاتقان ۋاقىت – بەيقامدىق پەن شاباندىقتى كەشىرمەيتىن كەزەڭ. بۇگىن جاسالۋى ءتيىس دۇنيەنى ەرتەڭگى كۇنگە ىعىستىرعان ادام كوشتىڭ سوڭىندا قالارى انىق. وسىنى ەسكەرگەن ەلباسى جاستاردى بەلسەندى بولۋعا, بارلىق ىسكە جاۋاپكەرشىلىكپەن قاراۋعا, باتىل ارەكەتتەر جاساۋعا ۇندەپ وتىر. كەلەر جىلدىڭ «جاستار جىلى» رەتىندە جاريالانۋى جاس بۋىننىڭ رۋحىن كوتەرەدى, جىگەرىن جانيدى. باسەكەگە قابىلەتتى ەل بولۋدىڭ داۋ تۋدىرماس نەگىزى – الدىمەن, سول ەلدىڭ جاستارىن سوعان لايىقتى تۇرعىدا تاربيەلەۋ. ەندەشە, جاستاردىڭ جالىنداپ جاناتىن, بىلەك سىباناتىن, بيىك بەلەستەردى باعىندىرۋعا ۇمتىلاتىن شاعى تۋدى.
وسى ورايدا, كوڭىل تورىندەگى كورىكتى ويلاردى شىندىققا اينالدىرۋ ماقساتىندا بارلىق ساناتتاعى جاستاردى قامتيتىن تومەندەگىدەي الەۋمەتتىك مازمۇنداعى شارالاردى اتقارۋ قاجەت دەپ ەسەپتەيمىن.
العاشقى كەزەكتە, ەڭبەك نارىعىنداعى سۇرانىستى ەسكەرە وتىرىپ, كاسىبي باعدار بەرۋ جۇمىستارىن شيراتۋ, تيىسىنشە, جوو تۇلەكتەرىنىڭ تولىققاندى جۇمىسپەن قامتىلۋىن قامتاماسىز ەتۋ. بۇل رەتتە وقۋ ورىندارىن «سەرپىن» جوباسى بويىنشا تامامداعان (العاشقى لەك 2019 جىلى بىتىرەدى) جاستارعا ەرەكشە كوڭىل ءبولىنۋى ءتيىس. بارلىق جەرلەردە جاستارعا جان-جاقتى قولداۋ كورسەتۋ ماقساتىندا كوۆوركينگ-ورتالىقتار اشىلۋى كەرەك.
بيىل جاستار رەسۋرستىق ورتالىعى جانىنان اشىلعان «Good Zone» كوۆوركينگ-ورتالىعى جاستاردىڭ ەرەكشە ىقىلاسپەن باس قوساتىن الاڭىنا اينالدى. وسىنداي زامان تالابىنا ساي كوۆوركينگ-ورتالىقتاردى اۋداندار مەن قالالاردا اشۋ ءوز ناتيجەسىن بەرەرى ءسوزسىز.
ەكىنشىدەن, اۋدان اكىمدەرىنىڭ اۋىل جاستارىنىڭ كاسىپكەرلىگىن دامىتۋعا ارنالعان گرانتتارىنىڭ سانى مەن سوماسىن كەزەڭ-كەزەڭىمەن ۇلعايتۋ. اۋىل مارتەبەسىن ارتتىرۋدىڭ تىڭ ءتاسىلى رەتىندە كەلەسى جىلى ۇلىتاۋ اۋدانىندا اۋىل جاستارىنىڭ حالىقارالىق فورۋمى وتكىزىلمەكشى. ول تمد ەلدەرىنىڭ 2020 جىلعا دەيىنگى حالىقارالىق ارىپتەستىگى ستراتەگياسى اياسىندا ۇيىمداستىرىلاتىن بولادى.
ۇشىنشىدەن, جولداۋدا تۇرعىن ءۇي يپوتەكاسىنىڭ قولجەتىمدىلىگىن ارتتىرۋ جايى اتالىپ ءوتىلدى. ونىڭ باستى قۇرالى – ەلباسى باستاماشىسى بولعان «7-20-25» باعدارلاماسى. دەمەك, ءبىزدىڭ مىندەتىمىز – ەكىنشى دەڭگەيلى بانكتەرمەن بىرگە, وبلىستىڭ جاس تۇرعىندارىن اتالعان باعدارلامانىڭ تەتىكتەرى تۋرالى كەڭ كولەمدە حاباردار ەتۋ.
تورتىنشىدەن, دەنەشىنىقتىرۋ جانە سپورت, ءبىلىم باسقارماسىمەن تىزە قوسا وتىرىپ, وبلىس وڭىرلەرىنىڭ سپورت عيماراتتارىمەن جانە قولدانىستاعى عيماراتتاردىڭ زاماناۋي قۇرال-جابدىقتارمەن قامتاماسىز ەتىلۋ جاعدايىنا تالداۋ جاساۋ – كەزەك كۇتتىرمەيتىن مىندەت. ونىڭ ناتيجەسى بويىنشا ناقتى ۇسىنىستار تۇزىلەتىن بولادى. قازىرگى تاڭدا اۋلالارداعى سپورت الاڭدارىنىڭ سانى مەن ساپاسىن ۇلعايتۋ, اۋلا كلۋبتارى جەلىسىن ودان ءارى كەڭەيتە ءتۇسۋ قاجەتتىلىگى بەلەڭ الىپ وتىر. ماسەلەن, وڭىرلەردە پايدالانۋعا بەرىلۋى جوسپارلانعان تۇرعىن ۇيلەردەن اۋلا كلۋبتارى ءۇشىن مەكەن-جاي ءبولۋ (اۋماعى – 60-100 شارشى مەتر) مۇمكىندىكتەرى بار.
اقجول قۇرمانسەيىت,
قاراعاندى وبلىستىق جاستار رەسۋرسى ورتالىعىنىڭ ديرەكتورى
قاراعاندى
