ەكى جىلدا ءبىر رەت وتكىزىلەتىن ايتۋلى فەستيۆالگە بيىل وسكەمەننىڭ ءوز تەاترلارىنان بولەك, استانا, الماتى, قاراعاندى, پەتروپاۆل, پاۆلودار, سەمەي قالالارى مەن تۇركىستان وبلىسىنىڭ جەتىساي تەاترىنان بارلىعى 9 ونەر ۇجىمى قاتىسىپ, باق سىنادى. ءار تەاتردىڭ اكەلگەن سپەكتاكلدەرى تاقىرىپتىق قانا ەمەس, جانرلىق, مازمۇندىق ءھام فورمالىق تۇرعىدا سان الۋان. ءۇش كۇن بويى قالا تۇرعىندارى مەن قوناقتارى ساف ونەرمەن سۋسىندادى, فەستيۆالگە قاتىسۋشى تەاترلار تاجىريبە الماسىپ, جاڭا تۋىندىلارىن تالعامى جوعارى ونەرسۇيەر قاۋىم – كاسىبي تەاتر سىنشىلارى مەن كوزى قاراقتى كورەرمەن نازارىنا ۇسىندى.
فەستيۆال قورىتىندىسى بويىنشا, جۇزدەن جۇيرىك, مىڭنان تۇلپار شىققان ۇزدىك قويىلىمدار ارناۋلى اتالىمدار بويىنشا ماراپاتتالدى. قازىلار القاسىنىڭ شەشىمىمەن, باس جۇلدە – گران پري رەجيسسەر باتىربەك شامبەتوۆ قويعان ماعجان جۇماباەۆتىڭ «شولپاننىڭ كۇناسى» دراماسى ءۇشىن س. مۇقانوۆ اتىنداعى قازاق سازدى دراما تەاترىنىڭ ەنشىسىنە بۇيىردى.
ال رۇستەم ەسداۋلەتوۆ اتىنداعى ارنايى سىيلىق الماتى قالاسى مەملەكەتتىك قۋىرشاق تەاترىنىڭ «مەدەيا» (ەۆريپيد) سپەكتاكلىنە جانە «ۇزدىك رەجيسسۋرا» اتالىمىنداعى جۇلدە اتالعان قويىلىمنىڭ رەجيسسەرى ايدىن سالبانوۆقا تابىستالدى. استانا قالاسى اكىمدىگىنىڭ م.گوركي اتىنداعى مەملەكەتتىك اكادەميالىق ورىس دراما تەاترىنىڭ اكتەرى سەرگەي ماتۆەەۆ «ناەدينە س پۋشكينىم» مونوسپەكتاكلىندەگى ىزدەنىسى ءۇشىن «فەستيۆالدىڭ ۇزدىك اكتەرى» اتانسا, ب.وماروۆ اتىنداعى «جاس ساحنا» تەاترى ۇسىنعان ە.ءشميتتىڭ «موي مالەنكي وسكار» قويىلىمىنداعى وسكار ءرولى ءۇشىن مارياننا پوكروۆسكايا «فەستيۆالدىڭ ۇزدىك اكتريساسى» اتالىمىندا توپ جاردى.
«ەكىنشى پلانداعى ەر ادام ءرولى» استانا قالاسىنىڭ جاستار تەاترى اتىنان قاتىسقان «تاسباقا ءۇمىت» (ن. كوليادا) قويىلىمىنداعى تاسباقا ءرولى ءۇشىن بەيبىت قۇسانباەۆقا, ال «ەكىنشى پلانداعى ايەل ادام ءرولى» اتالىمىنداعى جۇلدە ج.ايماۋىتوۆ اتىنداعى پاۆلودار وبلىستىق قازاق مۋزىكالىق دراما تەاترىنىڭ «اتاۋ كەرە» (و. بوكەي) دراماسىنداعى نۇركە ءرولى ءۇشىن روزا تاجىباەۆاعا تابىس ەتىلدى. «كورەرمەن كوزايىمى» اتالىمىندا س. سەيفۋللين اتىنداعى قاراعاندى وبلىستىق قازاق دراما تەاترىنىڭ اكتريسالارى: «قايران جاس داۋرەن» قويىلىمىنداعى ر. پەسوچينسكايا ءرولى ءۇشىن گۇلسارا راشقاليەۆا, ۆورونكوۆا ءرولى ءۇشىن بيجامال كەمالوۆا جانە بارابانوۆا ءرولى ءۇشىن نۇرجىبەك جانسۇگىروۆا ماراپاتتالادى. سونىمەن قاتار ش.ايتماتوۆتىڭ ء«جاميلا» سپەكتاكلىندەگى سەيىت ءرولى ءۇشىن ق.جانداربەكوۆ اتىنداعى جەتىساي دراما تەاترىنىڭ اكتەرى ساعيتجان اريپحانوۆ ء«ۇمىت», ال سەمەي قالاسى ف. دوستوەۆسكي اتىنداعى مەملەكەتتىك ورىس دراما تەاترىنىڭ «نيوتكۋدا س ليۋبوۆيۋ» قويىلىمى «شىعارماشىلىق ىزدەنىس» نوميناتسياسىنا يە بولدى.
نازەركە جۇماباي,
«ەگەمەن قازاقستان»
