ونكۇندىك اياسىندا مەكتەپ وقۋشىلارى اراسىندا ەرۋديت, ەسسە جازۋ سايىستارى, ءماريام اپانىڭ ءومىرى مەن شىعارماشىلىعىنا ارنالعان تانىمدىق دوڭگەلەك ۇستەل وتىرىستارى ت.ب. ءىس-شارالار ءوتتى. ءماريام حاكىمجانوۆانىڭ ولەڭدەرىن جاتتاپ, مانەرلەپ وقۋدان قالالىق مەكتەپ وقۋشىلارى اراسىندا وتكەن بايقاۋ اقىننىڭ تۋعان كۇنىنە سايكەستەندىرىلدى جانە ونكۇندىكتى قورىتىندىلادى.
«ونكۇندىكتى ۇيىمداستىرعان سەبەبىمىز, بالالار مەكتەپتىڭ اتىن يەلەنگەن اقىننىڭ ءومىرى مەن شىعارماسىن جاقسى ءبىلسىن دەگەن ماقساتىمىز بولدى», دەيدى مەكتەپ ديرەكتورى حانزادا شىمبولاتوۆا. بايقاۋعا وبلىس ورتالىعىنداعى قازاق جانە ورىس مەكتەپتەرىنەن 32 وقۋشى قاتىستى. قاتىسۋشىلار نەگىزىنەن ءماريام اپانىڭ ولەڭدەرىن جاتقا ايتتى. كەلەسى ءبىر توپ ءماريام اپاعا ارناعان بالعىن ولەڭدەرىن وقىدى.
ءادىل-قازىلار القاسىنىڭ شەشىمى بويىنشا, ءماريام وقۋلارىن جاتقا مانەرلەپ وقۋدان قازاق مەكتەپتەرى اراسىنان ءبىرىنشى ورىندى №115 مەكتەپتىڭ وقۋشىسى قاراقات قابدىراحيم السا, ورىس مەكتەپتەرى اراسىنان فيزيكا-ماتەماتيكا ليتسەيىنىڭ وقۋشىسى كارينە مناتساكانيان جەڭىمپاز بولدى. ال ءماريام اپاعا ءوز ولەڭىن ارناعان بالاپان قانات اقىندار اراسىندا ءبىرىنشى ورىندى قازاق مەكتەپتەرى اراسىنان №20 مەكتەپتىڭ وقۋشىسى راحات سەيتقان السا, №17 ورىس مەكتەبىنەن كەلگەن دياس تالعاتوۆ ۇزدىك دەپ تانىلدى. قالعان وقۋشىلار اراسىنان وزا شاپقاندار شەبەرلىكتەرى مەن دايىندىقتارىنا قاراي ەكىنشى, ءۇشىنشى ورىنداردى ءبولىستى.
«بايقاۋدا ورىس مەكتەپتەرىنەن قاتىسقان 13 وقۋشىنىڭ قازاق اقىنى ولەڭدەرىن مانەرلەپ وقۋعا دەگەن دايىندىعى مەن ىنتا-ىقىلاسى قازىلار القاسىن ريزا ەتتى. كارينە مناتساكانيان ءماريام اپانىڭ 20 ولەڭىن جاتقا ايتتى, مۇدىرمەيدى, تىلىندە ءبىر مۇكىس جوق. بۇل مەملەكەتتىك ءتىلدىڭ بولاشاعى بۇگىنگى جاس ۇرپاقتا دەگەن سەنىمدى نىعايتا تۇسەدى», دەدى قازىلار القاسىنىڭ مۇشەسى, وبلىستىق تىلدەردى دامىتۋ باسقارماسىنىڭ ءبولىم باسشىسى باقىتگۇل سۇلەيمەنوۆا.
ءنازيرا جارىمبەت,
«ەگەمەن قازاقستان»
قوستاناي
