فورۋم اياسىندا الماتى وبلىسىنداعى ءتۋريزمدى دامىتۋ ماقساتىندا اشىلعان Zhetisu Travel ورتالىعىنىڭ تۇساۋكەسەرى جاسالىپ, ۇلتتىق تاعامداردىڭ «توي قازان» VI فەستيۆالى دە كەلۋشىلەر نازارىنا ۇسىنىلدى.
– مەملەكەت باسشىسى جاقىندا جاريالانعان جولداۋىندا سىرتتان كەلەتىن جانە ىشكى ءتۋريزمدى دامىتۋعا ەرەكشە كوڭىل ءبولۋدى جانە سالالىق مەملەكەتتىك باعدارلاما قابىلداۋدى تاپسىرعان بولاتىن. وسى رەتتە مەملەكەتتىك باعدارلاما جوباسىنا الاكول جاعالاۋى, ىلە الاتاۋىنىڭ تاۋ كلاستەرى, شارىن شاتقالى سياقتى وبلىستىڭ ءىرى تۋريستىك رەكرەاتسيالىق اۋماقتارىن دامىتۋ باعىتىنداعى ۇسىنىستار ەنگىزىلىپ, جوسپارلارى ازىرلەنىپ جاتىر, – دەدى فورۋمدا ءسوز العان وبلىس اكىمىنىڭ ءبىرىنشى ورىنباسارى لاززات تۇرلاشوۆ.
سونداي-اق حالىقارالىق شاراعا ارنايى كەلگەن قىتاي حالىق رەسپۋبليكاسى مادەنيەت جانە تۋريزم مينيسترلىگىنىڭ ورتالىق ازياداعى وكىلى ۆان شۋلين جەتىسۋ ءوڭىرىنىڭ تۋريستىك تارتىمدىلىعى الەمنىڭ نازارىن اۋدارىپ وتىرعانىن, ء وز جەرلەستەرىنىڭ دە جىل سايىن مۇندا كەلىپ دەمالۋعا ىنتالى ەكەنىن ايتسا, قازاقستان تۋريستىك قاۋىمداستىعىنىڭ اتقارۋشى ديرەكتورى, قازاقستاندىق قوناقۇيلەر مەن مەيرامحانالار قاۋىمداستىعىنىڭ پرەزيدەنتى راشيدا شايكەنوۆا وتاندىق ءتۋريزمنىڭ الەۋەتى مەن قىزمەت كورسەتۋ سالاسىنداعى ماسەلەلەردى ءسوز ەتتى.
– حالىقارالىق تۋريزم نارىعىندا باسەكەگە قابىلەتتى بولۋ ءۇشىن ءبىز ەڭ الدىمەن بۇل سالادا باي تاريحىمىزدى, مادەنيەتىمىز بەن سالتىمىزدى كورسەتە ءبىلۋىمىز كەرەك, – دەدى راشيدا شايكەنوۆا ءوز سوزىندە.
مۇنان بولەك مامان سالانى تسيفرلاندىرۋدىڭ مۇمكىندىكتەرىنە توقتالدى. ونىڭ ايتۋىنشا, بۇگىندە وتاندىق تۋريستىك نىسانداردىڭ تەك 17 پايىزى عانا ءوز قىزمەتتەرىن جارنامالاۋ مەن ساتۋ ارناسى رەتىندە ينتەرنەت پەن الەۋمەتتىك جەلىنى پايدالانىپ وتىرعان كورىنەدى.
جالپى, تۋريستىك الەۋەتتى ارتتىرۋ باعىتىنداعى حالىقارالىق شارانىڭ تالدىقورعاندا وتكىزىلۋى تەگىن ەمەس. قازىر وبلىس ءتۋريزمنىڭ تابىستىلىعى جونىنەن ەلىمىز بويىنشا العاشقى ورىندا. قازىرگى ۋاقىتتا الماتى وبلىسىنا كەلەتىن تۋريستەر قاتارى ماۋسىم سايىن كوبەيىپ كەلەدى, دەرەك بويىنشا ول لەك جىلىنا 20-30 پايىزعا كوبەيۋ ۇستىندە ەكەن. مىسالعا, وسى جىلى جەتىسۋدىڭ اسەم تابيعاتىن تاماشالاپ, جاعاجاي اۋماعىنداعى دەمالىس ورىندارىنا كەلگەن تۋريستەر سانى 2 ملن ادامعا جەتكەن. ال ەسەپ بويىنشا الماتى وبلىسىنا ءتۋريزمنىڭ دامۋىنان تۇسكەن قارجى 10 ملرد تەڭگە شاماسىندا بولماق.
قالماحانبەت مۇقامەتقالي,
«ەگەمەن قازاقستان»
الماتى وبلىسى
