جيىندى اشقان ەكونوميكالىق ساياسات جونىندەگى كەڭەس توراعاسى, ءماجىلىس دەپۋتاتى بەيبىت مامراەۆ ءوز سوزىندە مەملەكەت باسشىسى نۇرسۇلتان نازارباەۆ قازاقستان حالقىنا ارناعان بيىلعى جولداۋىندا ەلىمىزدى تسيفرلاندىرۋ كەڭىستىگىن كەڭەيتە ءتۇسۋ جونىندە تاپسىرما بەرگەندىگىن ەسكە سالدى.
ال نەگىزگى بايانداماشى اقپارات جانە كوممۋنيكاتسيالار ءمينيسترىنىڭ ورىنباسارى دينارا ششەگلوۆا ەلىمىزدەگى تسيفرلاندىرۋ باعدارلاماسىنىڭ باستى باعىتتارى بويىنشا اتقارىلىپ جاتقان ءىس-شارالار تۋرالى ايتىپ بەردى.
ماسەلەن, ونىڭ ايتۋىنشا, مەملەكەتتىك باعدارلاما باستى بەس باعىت پەن 17 باستامادان تۇرادى. اتاپ ايتقاندا, ەكونوميكا سالالارىن تسيفرلاندىرۋ, تسيفرلى مەملەكەتكە كوشۋ, تسيفرلى جىبەك جولىن ىسكە اسىرۋ, ادام كاپيتالىن دامىتۋ جانە يننوۆاتسيالىق ەكوجۇيەنى قۇرۋ سالالارىندا ايتارلىقتاي ىلگەرىلەۋشىلىكتەر انىقتالعان.
– قازىردىڭ وزىندە «تسيفرلى قازاقستان» مەملەكەتتىك باعدارلاماسىنىڭ ءىس-شارالارىن ورىنداۋ بويىنشا جوعارى ناتيجەلەر بايقالۋدا, – دەگەن ۆيتسە-مينيستر بەس باعىتتىڭ ارقايسىسى بويىنشا ناقتى كورسەتكىشتەرگە توقتالدى.
ماسەلەن, مۇنايدى بارلاپ, ءوندىرۋ پروتسەستەرى تسيفرلاندىرۋمەن قامتىلعان. وسىنىڭ ناتيجەسىندە زياتكەرلىك كەن ورىندارىن ەنگىزۋ ارقىلى الىناتىن مۇناي كوەففيتسيەنتىن 5 پايىزعا ارتتىرۋعا جانە وپەراتسيالىق شىعىنداردى 10 پايىزعا جانە جوندەۋ ارالىق كەزەڭدى 8 پايىزعا قىسقارتۋعا قول جەتكىزىلگەن. مۇنداي ۇدەرىسپەن قامتىلعان اتوم وندىرىسىنەن باستاپ, مەملەكەتتىك قىزمەت, اۋىل شارۋاشىلىعى, دەنساۋلىق ساقتاۋ, ءبىلىم, ساۋدا سالالارىندا شىعىندار ازايىپ, ەڭبەك ونىمدىلىگى مەن تابىس ارتىپ كەلەدى.
– قازىرگى كەزدە تسيفرلاندىرۋدى قاجەت ەتەتىن بەس باسىم باعىت انىقتالدى. بۇل – ءبىلىم بەرۋ, دەنساۋلىق ساقتاۋ, قاۋىپسىزدىك, تۇرعىن ءۇي جانە كوممۋنالدىق شارۋاشىلىق سالالارى, – دەدى د.ششەگلوۆا.
كەڭەس وتىرىسىندا ينۆەستيتسيالار جانە دامۋ ءمينيسترىنىڭ ورىنباسارى ا.قابىكەنوۆ, «اتامەكەن» ۇلتتىق كاسىپكەرلەر پالاتاسى توراعاسىنىڭ ورىنباسارى و.ورداباەۆ تسيفرلاندىرۋ باعدارلاماسىنىڭ ىسكە اسىرىلۋى بويىنشا اقپاراتتارىمەن ءبولىستى. سونداي-اق اتىراۋ قالاسىندا ورنالاسقان «ەمبىمۇنايگاز» اق دەپارتامەنتىنىڭ ديرەكتورى ب.نىسانباەۆ جينالعاندارعا «زياتكەرلىك كەن ورنى» جوباسى تۋرالى ايتىپ بەردى.
وتىرىستى قورىتىندىلاي كەلە ب.مامراەۆ تسيفرلاندىرۋدىڭ حالىقارالىق ستاندارتتارعا ساي قوعامنىڭ الەۋمەتتىك وسۋىنە دە, ەكونوميكالىق ماسەلەلەردى كەشەندى شەشۋگە دە باعىتتالعان يندۋستريالىق-يننوۆاتسيالىق دامۋ باعدارلاماسىن ىسكە اسىرۋدا ماڭىزدى ءرول اتقاراتىندىعىن اتاپ ءوتتى.
كەڭەس وتىرىسىنىڭ قورىتىندىسى بويىنشا «تسيفرلى قازاقستان» مەملەكەتتىك باعدارلاماسىن ىسكە اسىرۋ بويىنشا مەملەكەتتىك جانە باسقا دا جاۋاپتى ورگاندارعا ۇسىنىستار قابىلداندى.
سەرىك ابدىبەك,
«ەگەمەن قازاقستان»
