ەلباسى ءوزىنىڭ قۇتتىقتاۋ سوزىندە «نۇر وتان» پارتياسىنىڭ 20 جىلدىق مەرەيلى بەلەسىنە وراي وتكىزىلىپ وتىرعان باستاۋىش پارتيا ۇيىمدارى ءى فورۋمىنىڭ اشىلۋىمەن قۇتتىقتاپ, بۇل ايتۋلى وقيعا پارتيانىڭ ەڭ باستى رەسۋرسى ونىڭ مۇشەلەرى, ياعني وتانىمىزدىڭ دامۋىنا, وركەندەپ, گۇلدەنە تۇسۋىنە ەلەۋلى ۇلەس قوسىپ كەلە جاتقان قوعامنىڭ ەڭ بەلسەندى ءارى جاۋاپتى وكىلدەرى ەكەنىن كورسەتەتىنىن اتاپ وتكەن.
«بۇگىندە ءبىزدىڭ الدىمىزدا قازاقستاندى الەمدەگى باسەكەگە قابىلەتتى 30 مەملەكەتتىڭ قاتارىنا ەنگىزەتىن جاڭا دامۋ مودەلىن قالىپتاستىرۋ مىندەتى تۇر. مەن بيىلعى جولداۋىمدا ەلىمىزدىڭ دامۋ دەڭگەيى ءاربىر ازاماتىمىزدىڭ ءال-اۋقاتىمەن ولشەنەتىنىن اتاپ ءوتتىم. «نۇر وتان» پارتياسى جەتەكشى ساياسي كۇش رەتىندە دامۋدىڭ لوكوموتيۆى بولىپ قانا قويماي, سونىمەن بىرگە ءار قازاقستاندىقتىڭ مەملەكەتتىڭ الەۋمەتتىك ساياساتىنىڭ يگىلىگىن سەزىنۋىنىڭ كەپىلى دە بولۋى ءتيىس. بۇل ماقساتتارعا قول جەتكىزۋ ءۇشىن پارتيامىزدىڭ ءوزى دە جەتىلىپ, زاماناۋي ۇردىستەر مەن تالاپتارعا ساي جۇمىس ىستەۋگە بەيىمدەلگەنى ءجون», دەلىنگەن مەملەكەت باسشىسىنىڭ قۇتتىقتاۋ حاتىندا.
سونداي-اق پارتيا توراعاسى ساياسي كەڭەستىڭ بيىلعى ماۋسىم ايىنداعى كەڭەيتىلگەن وتىرىسىندا پارتيانىڭ جۇيەلى جاڭعىرۋ ۇدەرىسى باستالعانىنا جانە ونىڭ باستى باعىتتارىنىڭ ءبىرى – باستاۋىش پارتيا ۇيىمدارىنىڭ جۇمىسىن جانداندىرۋ ەكەنىنە نازار اۋدارعان.
«بۇگىنگى باسقوسۋ پارتيا قىزمەتىنە تىڭ سەرپىن بەرىپ, جۇمىس تاسىلدەرىن جەتىلدىرۋ جولىنداعى ماڭىزدى قادام بولادى دەپ سەنەمىن. تاجىريبەسى مول جەرگىلىكتى ساياسي كوشباسشىلار جەتەكشىلىك ەتىپ وتىرعان باستاۋىش پارتيا ۇيىمدارى – كادرلىق رەزەرۆتى قالىپتاستىرۋدىڭ نەگىزگى كوزى. ولار سونداي-اق ازاماتتارمەن جانە قوعامدىق ۇيىمدارمەن ىقپالداستىق ورناتۋدىڭ دا ماڭىزدى بۋىنى بولۋى ءتيىس. پارتيامىزدىڭ الدىندا تۇرعان جاڭعىرۋ ۇدەرىسىن تابىستى جۇزەگە اسىرۋ – سىزدەردىڭ كۇش-جىگەرلەرىڭىزگە تىكەلەي بايلانىستى. بارشاڭىزعا ەل يگىلىگى مەن حالقىمىزدىڭ ءال-اۋقاتىن ارتتىرۋ جولىندا جاڭا جەتىستىكتەر تىلەيمىن», – دەلىنگەن ەلباسىنىڭ قۇتتىقتاۋىندا.
جيىندا اتالعان فورۋم پارتيانىڭ 20 جىلدىعىنا ارنالعان شارالاردىڭ باسى ەكەنى دە ايتىلدى.
– وزدەرىڭىزگە بەلگىلى, كەلەسى جىلى پارتيامىزدىڭ مەرەيتويىن اتاپ وتەمىز. وسى جىلدار ىشىندە ءبىزدىڭ پارتيامىز ەلىمىزدەگى جەتەكشى ساياسي ۇيىم رەتىندە قالىپتاسۋ جولىنان سۇرىنبەي ءوتتى. پارتيا نەگىزى قالانعان كۇننەن باستاپ ەكونوميكالىق, الەۋمەتتىك جانە ساياسي سالاداعى ەلباسى ساياساتىنىڭ باستى ءارى نەگىزگى ورىنداۋشىسى بولىپ كەلەدى. سودان بەرى ءبىز بارشا قازاقستاندىقتاردى پرەزيدەنت رەفورمالارىن قولداۋعا جۇمىلدىرىپ, اۋقىمدى جۇمىستاردى اتقاردىق دەپ ايتۋعا تولىق نەگىز بار. بۇل ىستە باستاۋىش ۇيىمدارىمىزدىڭ ماڭىزى زور, – دەدى م.اشىمباەۆ.
بۇگىندە «نۇر وتاننىڭ» 17 ايماقتىق جانە 230 اۋماقتىق فيليالى مەن 6 مىڭعا جۋىق باستاۋىش پارتيا ۇيىمى بار.
«نۇر وتان» پارتياسى توراعاسىنىڭ ءبىرىنشى ورىنباسارى جاھاندىق سىن-قاتەرلەرگە لايىقتى توتەپ بەرۋ ماقساتىندا ەلباسى ناقتى ماقسات-مىندەتتەردى ايقىنداپ بەرگەنىن, ولاردى ناتيجەلى جۇزەگە اسىرۋ ءۇشىن الدىمەن پارتيانىڭ ءوزى ءححى عاسىردىڭ بارلىق تالاپتارىنا ساي, ءتيىمدى, جوعارى تەحنولوگيالى, يننوۆاتسياعا بەيىم, باسەكەگە قابىلەتتى ساياسي ۇيىم بولۋى ءتيىس ەكەنىن جەتكىزدى. سونداي-اق ول وسى ماقساتتا قولعا الىنعان پارتيا قىزمەتىن جاڭعىرتۋ باستاماسىنىڭ العاشقى ناتيجەلەرىنە نازار اۋداردى. وتكەن ماۋسىم ايىندا باستاۋ العان پارتيالىق جاڭعىرۋ اياسىندا بۇگىندە ەلىمىزدە جاستارىمىزدىڭ باعدارلامالاۋ, روبوت تەحنيكاسى, 3D-مودەلدەۋ نەگىزدەرىن جەتىك مەڭگەرىپ, وسى سالادا تەرەڭ ءبىلىم الۋىنا مۇمكىندىك بەرەتىن 761 ءىت-سىنىپ اشىلىپ, وندا 22 مىڭنان استام مەكتەپ وقۋشىسى ءبىلىم الۋدا. ودان بولەك, پارتيانىڭ باستاماسىمەن ەلىمىز بويىنشا 24 ءىت-ورتالىق اشىلىپ, وندا 1600-دەن استام ازامات جاڭا تەحنولوگيالار بويىنشا ءبىلىم الدى. باسقا پارتيالىق جوبالار بويىنشا دا ايتارلىقتاي ناقتى ناتيجەلەرگە قول جەتكىزىلگەن. ماسەلەن, ەل كولەمىندە مەكتەپ جانىنداعى 47 سپورت الاڭى جاڭارتىلىپ, قايتا جابدىقتالدى. كىتاپحانالار بازاسىندا 120-عا جۋىق زاماناۋي ءبىلىم ورتالىعى اشىلدى. سونىڭ ىشىندە اۋىلدىق جەرلەردەگى كىتاپحانالاردى دا ەرەكشە اتاپ وتكەن ءجون.
– بۇل جوبالاردىڭ ءبارى – ەلباسىمىزدىڭ ينتەللەكتۋالدى, دەنى ساۋ جانە باسەكەگە قابىلەتتى ۇلت قالىپتاستىرۋ جولىنداعى يگى باستامالارىنىڭ لايىقتى جالعاسى جانە اجىراماس ءبىر بولىگى, – دەدى م.اشىمباەۆ.
پارتيا توراعاسىنىڭ ءبىرىنشى ورىنباسارى ۇيىمنىڭ ورتالىق اپپاراتى مەن بارلىق فيليالدارىنىڭ جانە باستاۋىش پارتيا ۇيىمدارىنىڭ الدىندا تۇرعان باسىم باعىتتارعا توقتالىپ ءوتتى.
– بىرىنشىدەن, ەلباسى جولداۋىنىڭ ستراتەگيالىق ماڭىزىن ەسكەرە وتىرىپ, «نۇر وتان» پارتياسى ونىڭ ءتيىمدى جۇزەگە اسىرىلۋىن قامتاماسىز ەتەتىن نەگىزگى كۇشكە اينالۋى ءتيىس. وسى باعىتتا قوعامدىق باقىلاۋ جۇمىستارىن كۇشەيتىپ, ونىڭ ءمانى مەن ماڭىزىن ءار قازاقستاندىققا جەتكىزۋدە بەلسەندى ارەكەت ەتۋىمىز كەرەك. ەكىنشىدەن, پارتيانىڭ كادرلىق الەۋەتىن ارتتىرۋ ءۇشىن باستاۋىش ۇيىمداردىڭ بەلسەندى مۇشەلەرى مەن كوشباسشىلارىنىڭ بىلىكتىلىگىن مولىنان پايدالانۋىمىز كەرەك. پارتيانىڭ كادرلىق رەزەرۆىن قالىپتاستىرۋدا وسى ماسەلەنى مىندەتتى تۇردە ەسكەرگەن ءجون. ۇشىنشىدەن, باستاۋىش ۇيىمدارىمىزدىڭ حالىقپەن جۇمىس تيىمدىلىگىن ودان ءارى ارتتىرۋ قاجەت. ول ءۇشىن جەتەكشىلەردىڭ وزدەرى ساياسي تاجىريبەگە باي, يدەولوگيا, مەنەدجمەنت, پسيحولوگيا سياقتى سالالاردا ساۋاتتى بولۋى ءتيىس. تورتىنشىدەن, باستاۋىش پارتيا ۇيىمدارىنىڭ ماتەريالدىق-تەحنيكالىق بازاسىن كۇشەيتۋ كەرەك. بەسىنشىدەن, پارتيا جۇمىسىندا تسيفرلى تەحنولوگيالاردى كەڭىنەن قولدانىپ, «تسيفرلى پارتيا» جوباسىن جۇزەگە اسىرۋدا بەلسەندى ارەكەت ەتۋگە ءتيىسپىز. التىنشىدان, بەلسەندى ازاماتتار مەن جاستاردى جۇمىلدىرۋ ارقىلى پارتيا جۇمىسىن كۇشەيتۋدىڭ ماڭىزى زور, – دەدى ماۋلەن اشىمباەۆ.
ەرەكشە اتاپ وتەر جايت, ەلباسى – پارتيا توراعاسىنىڭ باستاماسىمەن بۇدان بىلاي باستاۋىش پارتيا ۇيىمدارىنىڭ فورۋمى داستۇرگە اينالىپ, ەكى جىلدا ءبىر رەت وتكىزىلىپ تۇراتىن بولدى. بۇل پارتيا جۇمىسىنا قاتىستى كەز كەلگەن ماسەلەنى تالقىلاپ, پىكىر الماسۋعا مۇمكىندىك بەرەتىن جاڭا الاڭ بولماق.
بارلىق ۇسىنىستار جيىن كەزىندە قاتىسۋشىلار تاراپىنان قولداۋ تاپقان باستاۋىش پارتيا ۇيىمدارىنىڭ قىزمەتىن جانداندىرۋ تۇجىرىمداماسىندا ەسكەرىلەتىن بولادى. اتالعان قۇجاتتا باستاۋىش ۇيىمداردىڭ جۇمىسىن جەتىلدىرۋ, ساپالى پارتيالىق اكتيۆ پەن كاسىبي كادرلىق رەزەرۆ قالىپتاستىرۋ, وزەكتى ماسەلەلەردى انىقتاۋ تەحنولوگيالارى مەن ولاردى شەشۋدىڭ ءتيىمدى تەتىكتەرى, تسيفرلى تەحنولوگيالار مەن اقپاراتتىق-كوممۋنيكاتسيالىق جۇمىستى جانداندىرۋ جانە باستاۋىش ۇيىمداردىڭ باسقارۋ جۇيەسىندە جاڭا جۇمىس فورماتتارىن ەنگىزۋدىڭ ۇتىمدى جولدارى ايقىن كورسەتىلگەن.
جيىن سوڭىندا «ۇزدىك باستاۋىش پارتيا ۇيىمدارى» رەسپۋبليكالىق بايقاۋىنىڭ جەڭىمپازدارى مەن جۇلدەگەرلەرى ماراپاتتالدى.
جولدىباي بازار,
«ەگەمەن قازاقستان»
