كەشەگى كەڭەستىك كەر زاماندا ءتىلىمىزدى, ءدىلىمىزدى تۇنشىقتىرىپ, بار كۇش-قايراتىن قازاقتى قان قاقساتۋعا, باسىپ-جانشۋعا جۇمساعان ۆوروشيلوۆ, دزەرجينسكي, وردجونيكيدزە, كالينين, كۋيبىشەۆ سەكىلدى قىزىل كوسەمدەر بىرتىندەپ وسكەمەن كوشەلەرىندەگى «جىلى ورىندارىن» بوساتا باستادى. وسىدان ءبىراز ۋاقىت بۇرىن وبلىس ورتالىعىنداعى ۇلكەن كوشەلەردىڭ ءبىرى ۆوروشيلوۆ بيىل 160 جىلدىعى اتالىپ ءوتىپ جاتقان ويشىل شاكارىمگە بەرىلەتىنىن گازەتىمىزدە سۇيىنشىلەپ جازعانبىز. رەسپۋبليكالىق ونوماستيكالىق كوميسسيا وڭ باتاسىن بەرسە, ول كۇنگە دە جەتەرمىز. ايتايىن دەگەنىمىز باسقا. 12 قاراشا كۇنى وسكەمەن قالالىق اكىمدىگىندە قوعامدىق تىڭداۋ ءوتىپ, شاھارداعى 16 كوشەنىڭ (تورتەۋىنە جاڭا اتاۋ بەرۋ) اتاۋىن وزگەرتۋ ماسەلەسى قارالدى. ەڭ اۋەلى اتاۋسىز 4 كوشەگە جاڭا اتاۋ بەرۋ جايى قارالىپ, ول كوشەلەرگە ۇلاعاتتى ۇستاز جاقيا ءشايجۇنىسوۆ, كورنەكتى عالىم لەۆ گۋميلەۆ, ارمانداستار جانە مەيىرىم اتاۋلارى ۇسىنىلدى.
سودان سوڭ وكتيابر كوشەسىن قوعام قايراتكەرى, الاش ارداقتىسى مۇحامەدجان تىنىشپاەۆ, كرۋپسكايا كوشەسىن ونەرتانۋشى ەۆگەني برۋسيلوۆسكي, رەۆوليۋتسيوننايا كوشەسىن قازاقتىڭ كلاسسيك جازۋشىسى قاليحان ىسقاق, سوۆەتسكايا كوشەلەرىن ساياحاتشى, پولياك رەۆوليۋتسيونەرى ادولف يانۋشكەۆيچ پەن مۋزىكا زەرتتەۋشىسى الەكساندر زاتاەۆيچ, دزەرجينسكي كوشەسىن بيىل 130 جىلدىعى اتالىپ جاتقان ايگىلى ءانشى امىرە قاشاۋباەۆ, كيروۆ كوشەسىن ورىس جازۋشىسى انتون چەحوۆ, وردجونيكيدزە كوشەسىن تاۋەلسىز قازاقستاننىڭ تۇڭعىش قورعانىس ءمينيسترى ساعادات نۇرماعامبەتوۆ, كۋيبىشەۆ كوشەسىن نارىن, كالينين كوشەسىن شىڭعىستاۋ, گولوۆكوۆ كوشەسىن بەيبىتشىلىك, ىزعۇتتى ايتىقوۆ كوشەسىن اسار, وكتيابر ارالىنداعى اتاۋسىز ساياباقتى سامال دەپ اتاۋ جونىندەگى ۇسىنىستار تالقىعا ءتۇستى. قالالىق ءماسليحات دەپۋتاتتارىنىڭ باسىم كوپشىلىگى بۇل ۇسىنىستارعا قولداۋ ءبىلدىرىپ, قولدارىن كوتەردى. ءبىر-ەكى دەپۋتاتتىڭ قول كوتەرمەي, قالىس قالعانىن دا بايقادىق. قوعامدىق تىڭداۋدا قالاداعى قوسارلانعان كوشەلەرگە دە جاڭا اتاۋ ۇسىنىلدى (ىزعۇتتى ايتىقوۆ پەن سوۆەتسكايا).
جيىندا 2002 جىلى اتاۋ بەرىلگەن ميحايل گولوۆكوۆ كوشەسىنىڭ اتىن وزگەرتۋ ماسەلەسى دە قارالدى. بۇعان ەرەكشە توقتالىپ وتىرعانىمىز, قوعامدىق تىڭداۋدا ءسوز سويلەگەن قوعام قايراتكەرى, «التاي اسۋى» قوعامدىق بىرلەستىگىنىڭ تەڭ توراعاسى ءتۇسىپحان تۇسىپبەكوۆ بۇل كىسى ەلىمىز تاۋەلسىزدىگىن جاريالاعان جىلدارى شىعىس قازاقستاننىڭ ءبىر بولىگىن رەسەيگە قوسىپ بەرۋ تۋرالى ۇسىنىس ايتىپ, حالىقتىڭ بەرەكە-بىرلىگىنە سەلكەۋ تۇسىرگەنىن, كەيىن جوعارعى كەڭەس دەپۋتاتى بولعاندا قازاق تىلىنە مەملەكەتتىك ءتىل مارتەبەسىن بەرۋگە قارسىلىق تانىتقانىن جەتكىزىپ: «ەلدىڭ اراسىنا ىرىتكى سالعان ادامنىڭ اتىنداعى كوشەگە بەيبىتشىلىك اتاۋىنىڭ بەرىلۋىن ادىلدىكتىڭ ورناۋى دەپ ءتۇسىنۋ كەرەك», – دەدى.
قالالىق ءماسليحات دەپۋتاتى, «نۇر وتان» پارتياسى وسكەمەن قالالىق فيليالى توراعاسىنىڭ ورىنباسارى مايرا ەكىباسوۆا جۇرگىزگەن جيىندا الىبەك قاڭتارباەۆ, ءتۇسىپحان تۇسىپبەكوۆ, سەرىك قۇسانباەۆ, بوريس ششەرباكوۆ, سايلاۋحان اۋحاديەۆ, گۇلبارشىن ابىلعازينا باستاعان, ءادىل قاراتاي, مۇراتحان كەنجەحان ۇلى قوستاعان وسكەمەندىك زيالى قاۋىم وكىلدەرى, اقساقالدار, جاستار ءوز پىكىرلەرىن ايتىپ, بەلسەندىلىك تانىتتى. ەندى بۇل ۇسىنىستار رەسپۋبليكالىق ونوماستيكالىق كوميسسيانىڭ قاراۋىنا جىبەرىلەدى.
ازامات قاسىم,
«ەگەمەن قازاقستان»
وسكەمەن
