كونفەرەنتسيا جۇمىسىنا مادەنيەت جانە سپورت ءمينيسترى ارىستانبەك مۇحامەدي ۇلى, پارلامەنت دەپۋتاتتارى, ەلىمىزدەگى جەتەكشى ساراپشىلار مەن عىلىمي قىزمەتكەرلەر قاتىستى. جيىندى اشقان ارىستانبەك مۇحامەدي ۇلى ەلباسى باستاماسىمەن جۇرگىزىلىپ جاتقان «تسيفرلى قازاقستان» مەملەكەتتىك باعدارلاماسى اياسىندا «ەلەكتروندى قۇجاتتاردىڭ بىرىڭعاي ءارحيۆى» اقپاراتتىق جۇيەسىن قۇرۋ جانە ەنگىزۋ بويىنشا اتقارىلىپ جاتقان جۇمىستاردىڭ اۋقىمدىلىعىنا توقتالدى. «مەملەكەت باسشىسى بيىلعى جولداۋىندا تسيفرلاندىرۋدى قازاقستاننىڭ ءۇشىنشى جاڭعىرۋىنىڭ ارقاۋى دەپ اتاپ, تسيفرلى تەحنولوگياعا كوشۋ تۋرالى ناقتى نۇسقاۋلار بەردى.
بۇگىندە قازاقستان ارحيۆ ءىسىن دامىتۋدىڭ جاڭا كەزەڭىنە كوشىپ وتىر. ارحيۆتىك قۇجاتتاردى ساندىق جەتكىزگىشتەرگە اۋدارۋ, عىلىمي-انىقتامالىق اپپارات پەن ارحيۆ قورلارىنىڭ اۆتوماتتاندىرىلعان دەرەكقورىن قۇرۋ اقپارات ساپاسىن جوعالتپاي ۇزاق ۋاقىت ساقتاۋدى قامتاماسىز ەتەدى. مەملەكەتتىك ورگانداردا «ەلەكتروندى قۇجاتتار قويماسى» سەرۆيستىك باعدارلامالىق ءونىمى ەنگىزىلىپ جاتىر. بۇل ەلەكتروندى قۇجاتتاردىڭ ۇلكەن كولەمىن ساقتاۋعا جانە باسقارۋعا ارنالعان زاماناۋي باعدارلامالىق-اپپاراتتىق كەشەن», دەگەن مينيستر ارحيۆ سالاسىنىڭ قىزمەتكەرلەرىن قازاقستان رەسپۋبليكاسى «ۇلتتىق ارحيۆ قورى مەن ارحيۆ تۋرالى» زاڭىنىڭ قابىلدانعانىنا جيىرما جىل تولۋىمەن قۇتتىقتادى.
ۇلتتىق ارحيۆ قورىنداعى قۇجاتتاردى جيناقتاۋ, تىزىمگە الۋ, ساقتاۋ جانە پايدالانۋ سىندى ارحيۆ قىزمەتىنىڭ نەگىزگى باعىتتارىن اتاپ وتكەن ۇلتتىق ارحيۆ ديرەكتورى جانگەلدى ماحاشوۆ ەلەكتروندى قۇجات اينالىمىنا تولىق كوشۋدىڭ وڭتايلى تۇستارى تۋرالى باياندادى.
– ۇلتتىق ارحيۆتە مادەني, ساياسي جانە ونەر قايراتكەرلەرىنە تيەسىلى 6 مىڭعا جۋىق ساقتاۋ بىرلىگىنەن تۇراتىن جەكە تەكتىك قۇجاتتار ساقتاۋلى. تسيفرلى كوشىرمەلەر قاعاز تۇپنۇسقانىڭ ۇزاق ۋاقىت ساقتالۋىنا مۇمكىندىك بەرسە, ەكىنشى جاعىنان قۇجاتتىق ارحيۆ مۇراسىن جاپپاي تسيفرلاندىرۋ كوپتەگەن زەرتتەۋشىلەرگە – جەرگىلىكتى ولكەتانۋشىلارعا, تاريحشىلارعا, جۋرناليستەرگە جۇمىس ىستەۋگە ىڭعايلى. جەلىلىك تەحنولوگيالار ارقاسىندا قۇجات قوعامعا قولجەتىمدى بولادى, – دەدى ارحيۆ ديرەكتورى.
ديرەكتوردىڭ ايتۋىنشا, مادەنيەت جانە سپورت مينيسترلىگىنىڭ باستاماسىمەن 2014 جىلدان بەرى مەملەكەتتىك ورگانداردا قۇجاتتاردى ەلەكتروندى قۇجاتتار قويماسىنا كوشىرۋ جۇمىستارى كەزەڭ-كەزەڭىمەن اتقارىلىپ كەلەدى. ارحيۆ ءىسى بويىنشا الىس جانە جاقىن شەت مەملەكەتتەرمەن 12 حالىقارالىق كەلىسىمشارتقا, 3 مەموراندۋمعا قول جەتكىزىلگەن.
حالىقارالىق عىلىمي-تاجىريبەلىك كونفەرەنتسيا شەڭبەرىندە ارحيۆ مەكەمەلەرى قىزمەتىنىڭ باستى باعىتتارى بويىنشا پىكىرتالاس جۇرگىزىلىپ, ساقتاۋ قورىنان الىنعان تاريحي ماڭىزى زور مەملەكەتتىك قۇجاتتاردىڭ كورمەسى ءوتتى. سونداي-اق مادەنيەت جانە سپورت ءمينيسترى ارىستانبەك مۇحامەدي ۇلى 40-قا تارتا ۇزدىك قىزمەتكەردى قازاقستاننىڭ ارحيۆ سالاسىنىڭ دامۋىنا ەلەۋلى ۇلەس قوسقانى ءۇشىن ماراپاتتادى.
ايتا كەتەيىك, قازاقستان رەسپۋبليكاسىنىڭ ۇلتتىق ءارحيۆى 11 جىلدان بەرى حالىقارالىق ارحيۆتەر كەڭەسىنىڭ ەۋروازيالىق وڭىرلىك بولىمشەسىنىڭ مۇشەسى. رەسپۋبليكادا بارلىعى 219 مەملەكەتتىك ارحيۆتە 3 185 قىزمەتكەر جۇمىس اتقارادى. بۇل ارحيۆتەردە 24 ميلليون ساقتاۋ بىرلىكتەرى بار. 760 كينوقۇجات, 4 957 بىرلىك فوتوقۇجات, 981 فونوقۇجات بار. بۇگىنگە دەيىن 39 340 ساقتاۋ بىرلىكتەرى تسيفرلاندىرىلدى.
ايا ءومىرتاي,
«ەگەمەن قازاقستان»
