حالىقارالىق كونفەرەنتسياعا ورتالىق جانە جەرگىلىكتى مەملەكەتتىك ورگانداردىڭ, حالىقارالىق جانە ۇكىمەتتىك ەمەس ۇيىمداردىڭ وكىلدەرى, وتاندىق جانە شەتەلدىك عالىمدار مەن ساراپشىلار قاتىستى. ادام كاپيتالىنىڭ ساپاسى يننوۆاتسيالىق-زياتكەرلىك ەكونوميكانى دامىتۋدىڭ ماڭىزدى فاكتورى جانە قازاقستاننىڭ الەۋمەتتىك-ەكونوميكالىق ساياساتىنىڭ نەگىزگى باسىمدىعى بولىپ تابىلادى. وسى ورايدا, قوعامدىق دامۋ مينيسترلىگى ازاماتتىق قوعام ىستەرى كوميتەتى توراعاسىنىڭ ورىنباسارى باقىتجان نارىمبەتوۆ, ءبىلىم جانە عىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم دەپارتامەنتى ديرەكتورىنىڭ ورىنباسارى بانۋ ناربەكوۆا ادام كاپيتالىنا قاتىستى بايانداما وقىپ, اتالعان ۆەدومستۆولاردىڭ وتكەن جىلى ۇيىمداستىرعان شارالارى مەن جۇمىستارىنا توقتالدى. پەداگوگيكا عىلىمدارىنىڭ دوكتورى الەكساندر تەسلەنكو «كامەلەتكە تولماعانداردى زەرتتەۋ» ورتالىعىنىڭ جاستار اراسىنداعى قۇندىلىقتاردىڭ قايسىسى ماڭىزدى ەكەندىگىنە بايلانىستى ساۋالناما جۇرگىزگەنىن ايتتى. ونىڭ ايتۋىنشا, جاستاردىڭ باسىم كوپشىلىگى ءبىلىمدى تاڭداسا, قالعان بولىگى مانساپ پەن وتباسىنى جوعارى باعالايدى.
حالىقارالىق كونفەرەنتسياعا قاتىسۋشىلار تالقىلاۋ بارىسىندا عىلىمي-تالداۋ ورتالىقتارىنىڭ, قوعامدىق ينستيتۋتتاردىڭ, ديپلوماتتار مەن ساراپشىلاردىڭ ىنتىماقتاستىعى ەۋرازيا كەڭىستىگىندە قول جەتكىزگەن سەنىم دەڭگەيىن جوعارىلاتادى جانە قوعامدىق ديپلوماتيانى دامىتادى جانە تەرەڭدەتەدى دەگەن قورىتىندىعا كەلدى. جيىن سوڭىندا قاتىسۋشىلار قارار قابىلدادى. ول بويىنشا حالىقارالىق عىلىمي كونفەرەنتسيا ماتەريالدارى مەن ماقالالارىنىڭ جيناعىن دايىنداپ, باسىپ شىعارۋ ءىسىن جوسپارلادى.
اقمارال اعزامقىزى,
«ەگەمەن قازاقستان»
