جاسوسپىرىمدەر, جاستار جانە ەرەسەكتەر اراسىندا وتكەن جارىستا قازاقستاننىڭ تۋى استىندا بىرنەشە كوماندا ونەر كورسەتتى. سولاردىڭ اراسىنان الماتىنىڭ «سارباز» كلۋبىنىڭ وكىلدەرى اسقان شەبەرلىك تانىتىپ, كوپشىلىكتىڭ قوشەمەتىنە بولەندى. تانىمال جەكپە-جەك شەبەرى قۇرمەت نۇكەنوۆ جەتەكشىلىك ەتەتىن ايتۋلى كوماندا مۇشەلەرى 4 التىن, 3 كۇمىس جانە 6 قولا مەدالعا يەلىك ەتتى. بارلىعى – 13 جۇلدە.
بىشكەكتەگى باسەكەدە 70 كيلو سالماقتاعى ەركىن بەگەنوۆ (2001 جىلى تۋعان) پەن دوسجان كەنجەباەۆ (2000 جىلى تۋعان), 84 كيلو سالماقتاعى اسىلجان جەڭىس (2000 جىلى تۋعان) جانە 120 كيلو سالماقتا بەكنۇر بەكقۇل ۇلى (1999 جىلى تۋعان) بىردە-ءبىر قارسىلاسىنا بەت قاراتپاي, جەڭىس تۇعىرىنىڭ ەڭ بيىك ساتىسىنا كوتەرىلدى. سونداي-اق, 52 كيلو سالماقتا عاني نۇرعازى (2002 جىلى تۋعان), 54 كيلو سالماقتا المات ۇزاق (2004 جىلى تۋعان) جانە 110 كيلو سالماقتا رۋسلان يمانبەكوۆتىڭ (2003 جىلى تۋعان) دە ءدال وسىنداي قۇرمەتكە بولەنۋىنە مۇمكىندىكتەرى بولدى. الايدا شەشۋشى تۇستا ولار وزگە ەلدىڭ ورەندەرىنە ەسە جىبەرىپ, كۇمىس مەدالدى قاناعات تۇتتى. تاعى التى سپورتشىمىز قولا جۇلدەنى يەلەندى.
جوعارىدا اتالعان نۇسقا بويىنشا بىلتىر ءبىز تۇڭعىش رەت الماتىدا ازيا چەمپيوناتىن ۇيىمداستىرعان ەدىك. سول كەزدە بىرنەشە مەملەكەت جانە رەسپۋبليكامىزدىڭ ءار ايماعىنان كەلگەن 500-دەي سپورتشى كۇش سىناسىپ, كوماندالىق ەسەپتە «ساربازدىڭ» جىگىتتەرى باس جۇلدەنى جەڭىپ الدى. بىشكەكتە وتكەن جارىسقا دا جان-جاقسى دايارلىقپەن باردىق. جارىس جولىنا شىققان جەرلەستەرىمىزدىڭ بارلىعى دا جانكەشتىلىك تانىتىپ, ءوز جانكۇيەرلەرىن قۋانتۋ ءۇشىن ەش ايانىپ قالعان جوق. ناتيجەسىندە ەلگە مول ولجامەن ورالدىق, – دەيدى قۇرمەت نۇكەنوۆ.
قازاقستاندىق جەكپە-جەك شەبەرلەرى 12 جۇلدەدەن بولەك, باسقا دا اتالىمدار بويىنشا ءتۇرلى سىيلىقتارعا يە بولدى. ال ەلىمىزدىڭ جاسوسپىرىمدەر قۇراماسى كوماندالىق ەسەپتە توپ جارىپ, ارنايى كۋبوكقا يە بولدى.
عالىم سۇلەيمەن,
«ەگەمەن قازاقستان»
