ءححى عاسىردىڭ ادامى ءۇشىن ۋاقىت – ەڭ قىمبات قازىنا. ال ۋاقىتتى ءتيىمدى پايدالانۋ ەڭ كەرەكتى, ەڭ پايدالى ونەرگە اينالىپ وتىر. دەنساۋلىق ساقتاۋ جۇيەسىندە اقپاراتتىق تەحنولوگيانى, ءموبيلدى تسيفرلى قوسىمشالاردى بەلسەندى پايدالانۋ, ەلەكتروندى دەنساۋلىق تولقۇجاتىن ەنگىزۋ جانە «قاعازسىز» اۋرۋحانالارعا كوشۋ ارقىلى مەديتسينالىق كومەكتىڭ قولجەتىمدىلىگى مەن تيىمدىلىگىن ارتتىرۋ – مەملەكەت باسشىسىنىڭ جىل باسىنداعى جولداۋىندا ارنايى ايتىلعان ماسەلە بولاتىن. ياعني مەملەكەتتىك دارەجەدە كوڭىل ءبولىنىپ وتىرعان باستاما دەگەن ءسوز.
باتىس قازاقستان وبلىسى مەديتسينالىق قۇجاتتاردى قاعازسىز جۇرگىزۋگە ەنگىزۋ قاناتقاقتى رەجىمدە 2018 جىلدىڭ قاڭتارىنان باستالدى. جوبا شەڭبەرىندە وڭىردەگى مەديتسينا ۇيىمدارىندا «Kazmedinform» مەديتسينالىق اقپاراتتىق جۇيەسى, ورال قالاسىنداعى 6 ەمحانادا ەلەكتروندى كەزەكتى باسقارۋ جۇيەسى, جەدەل مەديتسينالىق جاردەمدى باسقارۋدىڭ «اديس» اۆتوماتتاندىرىلعان جۇيەسى ەنگىزىلدى.
موبيلدىك قوسىمشا ارقىلى دارىگەرلەردىڭ جۇمىس كەستەسىمەن تانىسۋعا, تۇرعىلىقتى جەرى بويىنشا تىركەلگەن ۋچاسكەنى انىقتاۋعا, دارىگەر كارتوچكاسىن قاراۋعا, وبلىستىڭ مەديتسينالىق ۇيىمدارىن قاراۋعا جانە ولاردى كارتادان تابۋعا, دارىگەردى ۇيگە شاقىرۋعا, دارىگەردىڭ قابىلداۋىنا جازىلۋعا جانە قاجەت بولعان جاعدايدا جازىلۋ ۋاقىتىن وزگەرتۋگە بولادى. وعان قوسا Push حابارلامالار جانە دارىگەرگە بارۋ جونىندە ەسكەرتۋ فۋنكتسيالارى بار.
دارىگەردىڭ قابىلداۋىنا جازىلۋعا ارنالعان k-vrachu.kz ۆەب-پورتالىندا تىركەلگەن ۋچاسكەنى ىزدەۋگە, دارىگەردىڭ (جالپى, تاجىريبەلىك دارىگەر) قىزمەت كورسەتەتىن اۋدانىن قاراۋعا, دارىگەردى ۇيگە شاقىرۋعا, دارىگەردىڭ قابىلداۋىنا ونلاين جازىلۋعا, دارىگەردىڭ كەستەسىن, ونىڭ بىلىكتىلىگىن قاراۋعا, دارىگەردى باعالاۋعا بولادى.
مەديتسينالىق-سانيتاريالىق العاشقى كومەك ۇيىمدارىندا كەزەكتى ازايتۋ ءۇشىن قالانىڭ بارلىق ەمحاناسىندا «ەلەكتروندى تابلو» ەلەكتروندى كەزەكتى باسقارۋ باعدارلاماسى ەنگىزىلگەن. قالانىڭ 6 ەمحاناسىندا جانە «دەركول» دارىگەرلىك امبۋلاتورياسىندا «كازمەدينفورم» مەديتسينالىق اقپاراتتىق جۇيەسىمەن ينتەگراتسيالاندىرىلعان ەلەكتروندى كەزەكتى باسقارۋ جۇيەسى جۇمىس ىستەپ تۇر.
قازىرگى تاڭدا وڭىردەگى 121 نىساننىڭ 105-ءى قاعازسىز قىزمەت كورسەتۋگە كوشىرىلگەن.
وبلىستىق جەدەل مەديتسينالىق جاردەم قىزمەتى ونلاين رەجىمىندە جۇمىس ىستەۋى ءۇشىن سيتۋاتسيالىق ورتالىق ورناتىلىپ, اۆتوماتتاندىرىلعان جۇيە جاڭعىرتىلدى. قالالىق جەدەل جاردەم ستانساسى 32 دانا موبيلدىك ارم پلانشەتتەرمەن 100% قامتىلعان. ال وبلىس بويىنشا 138 دانا سانيتارلىق اۆتوكولىك تۇگەلىمەن GPS-مونيتورينگكە قوسىلعان.
تاعى دا سانداردى سويلەتسەك, وڭىردەگى مەديتسينالىق ۇيىمدار كومپيۋتەرلىك تەحنيكامەن 100% جاراقتالعان, بۇل دەگەنىڭىز − 4500-دەي كومپيۋتەر! قاي سالاعا دا اۋاداي قاجەتتى قۇرالعا اينالعان بۇل تەحنيكانى جاڭارتىپ وتىرۋعا وبلىس باسشىلىعى جىل سايىن كوڭىل ءبولىپ كەلەدى. ءتىپتى «باتىس قازاقستان وبلىسىندا دەنساۋلىق ساقتاۋ باسقارماسىن تسيفرلاندىرۋ جونىندەگى جول كارتاسى» اتتى ارنايى باعدارلاما ازىرلەنىپ, ونىڭ ورىندالۋىن وبلىس اكىمىنىڭ ورىنباسارى قاداعالايدى.
ارينە پروبلەما دا جوق ەمەس. سونىڭ ءبىرى – ورتالىقتان شالعاي ەلدى مەكەندەردىڭ ينتەرنەتپەن تولىق قامتىلماۋى. بۇگىندە 383 مەديتسينالىق مەكەمەنىڭ 120-سى ينتەرنەت جەلىسىنە قوسىلا الماي وتىر. بۇلار نەگىزىنەن الىستاعى شەكارالاس اۋدانداردىڭ مەديتسينالىق, فەلدشەرلىك-اكۋشەرلىك پۋنكتتەرى. تاياۋدا وڭىردە بولعان اقپارات جانە كوممۋنيكاتسيالار ۆيتسە-ءمينيسترى نۇرگۇل ماۋبەرلينوۆا شەكارالىق ەلدى مەكەندەردى ساپالى بايلانىس, ينتەرنەت جۇيەسىمەن قامتاماسىز ەتۋ ماسەلەسىن شەشۋ ءۇشىن رەسپۋبليكالىق دەڭگەيدە جۇمىس اتقارىلىپ جاتقانىن ايتقان بولاتىن. ەندەشە كەشىكپەي بۇل تۇيتكىلدىڭ دە ءتۇيىنى تارقاتىلار.
– ورال قالالىق №3 ەمحاناسى ءبىر كەزەكتە 100 ناۋقاستى قابىلداۋعا ارنالعانىمەن, تولىق قۋاتى 320 پاتسيەنتتى بىردەن قابىلداۋعا جەتەدى, – دەيدى ەمحانا ديرەكتورى ساندۋعاش كەڭەسوۆا. – وبلىس ورتالىعىنىڭ تاريحي اۋماعىندا ورنالاسقان مەكەمە 46 500 ادامعا قىزمەت كورسەتەدى.
ءبىر ەرەكشەلىگى وسى اۋماقتا 11 مەكتەپ, 10 بالاباقشا, 4 كوللەدج, ءبىر مەملەكەتتىك ۋنيۆەرسيتەت ورنالاسقان. سوندا بۇل ەمحاناعا بالاباقشانىڭ 1639 تاربيەلەنۋشىسى, 6837 وقۋشى, 8212 ستۋدەنت قارالادى. ەمحانادا قىزمەت ەتەتىن 305 دارىگەردىڭ يىعىنداعى جاۋاپكەرشىلىك جۇگىن باعامداي بەرىڭىز.
وڭىردەگى بارلىق مەديتسينالىق مەكەمە سياقتى №3 ەمحانا دا جىل باسىنان باستاپ قاعازسىز قۇجات جۇرگىزۋگە كوشكەن. بۇل ءۇشىن بارلىق جاعداي جاسالعان. دارىگەرلەر دە, ناۋقاستار دا دەنساۋلىق ساقتاۋ سالاسىنا جاڭا جۇيەنىڭ, اقپاراتتىق تەحنولوگيانىڭ ەنۋىن قۋانا قۇپتاپ وتىر.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
