مەملەكەت باسشىسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا كوممۋنالدىق قىزمەت پەن تابيعي مونوپوليالاردى رەتتەۋ سالالارىندا ءتاريفتىڭ جاسالۋى جانە تۇتىنۋشىلاردان جينالعان قارجىنىڭ جۇمسالۋى ءالى كۇنگە دەيىن اشىق ەمەستىگى تۋرالى ايتىپ, اتالعان سالادا ناقتى شەشىمدەر قابىلداۋ تۋرالى تاپسىرما بەردى.
مالىمەتكە سۇيەنسەك, ماڭعىستاۋ وبلىسىنىڭ تۇرعىن ءۇي قورى 1 654 كوپ- قاباتتى تۇرعىن ءۇيدى قۇرايدى. ونىڭ ىشىندە 981 ءۇي اقتاۋ قالاسىنا, 262 ءۇي جاڭاوزەن قالاسىنا جانە 411 ءۇي اۋداندارعا تيەسىلى. ۇيلەردىڭ ساپاسى دا ءارالۋان. سول سەبەپتى ايماق بويىنشا 290 ءۇي كۇردەلى جوندەۋ جۇرگىزۋدى قاجەت ەتسە, اقتاۋ قالاسىندا 6, جاڭاوزەن قالاسىندا 2 ءۇي اپاتتىق جاعدايداعى ۇيلەر ساناتىندا. ماڭعىستاۋ وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ مىندەتىن اتقارۋشى ج.ساليموۆتىڭ ايتۋىنشا, وڭىردە كوندومينيۋم نىساندارىن باسقارۋ بويىنشا بىرقاتار ماسەلە بار. ماسەلەن تىركەلگەن كوندومينيۋمدار سانى تومەن دەڭگەيدى كورسەتەدى. تۇرعىن ۇيلەردىڭ تەحنيكالىق پاسپورتتارى مەن جەر ۋچاسكەلەرىنە ارنالعان اكتىلەردىڭ بولماۋى سالدارىنان وبلىس بويىنشا 1654 كوپقاباتتى تۇرعىن ءۇيدىڭ تەك 529-ى تەحنيكالىق پاسپورتتارىن تىركەگەن.
اقتاۋ قالاسى بويىنشا 34 جاۋاپكەرشىلىگى شەكتەۋلى سەرىكتەستىك, 17 جەكە كاسىپكەر, 19 پاتەر يەلەرى كووپەراتيۆى, 8 پاتەر يەلەرىنىڭ تۇتىنۋ كووپەراتيۆى, 1 قوعامدىق بىرلەستىك, 1 پاتەر يەلەرىنىڭ قوعامدىق بىرلەستىگى, 1 تۇرعىن ءۇي قۇرىلىس كووپەراتيۆى سىندى كوندومينيۋم نىساندارىن باسقارۋ ورگاندارى بار, الايدا ولاردىڭ سانىنىڭ كوپتىگى كورسەتىلەتىن قىزمەتتىڭ ساپاسىنا جاۋاپ بەرە الماي كەلەدى.
قۇزىرلى ورىندارعا ۇجىمدىعى بار, جەكەسى بار ايىنا ەكى-ءۇش ارىز-شاعىم تۇسسە, ءبىر اي ىشىندە تۇرعىن ءۇي ينسپەكتسياسى بولىمىنە شامامەن 400 شاعىم كەلىپ تۇسكەن. وتىز كۇندە 400 ارىزدىڭ ءتۇسۋى – سالاداعى ماسەلەنىڭ قانشالىقتى ماڭىزدىلىعىن, كۇردەلىلىگىن اڭعارتادى.
– جەكە پاتەر يەلەرى كووپەراتيۆتەرىنىڭ قىزمەتىندە ماسەلە بارشىلىق. تۇتىنۋشىلاردان جينالعان قاراجاتتى پايدالانۋدا اشىقتىق جوق. بۇگىندە پيك-تەر ءوز قىزمەتكەرلەرىنە جوعارى جالاقى بەلگىلەيدى, شتاتتى نەگىزسىز ءوسىرۋ فاكتىلەرى بار. بۇل – ولاردىڭ تاريفتەردەن جينالعان قاراجاتتى پايدالانۋدا اشىق ساياسات جۇرگىزبەيتىندىگىن كورسەتەدى. حالىقتان تاريفتەردىڭ كۇرت ءوسۋى بويىنشا كوپتەگەن شاعىم كەلىپ تۇسۋدە, دەدى تۇرعىن-ءۇي كوممۋنالدىق شارۋاشىلىق سالاسىنىڭ وزەكتى ماسەلەلەرىنە ارنالعان جيىندا ءوڭىر باسشىسى.
مەملەكەتتىك ساۋلەت-قۇرىلىستى قاداعالاۋ باسقارماسى جاڭادان سالىنعان ۇيلەردىڭ تەحنيكالىق پاسپورتتارىن قۇرىلىس سالۋشى ەسەبىنەن جاساقتاپ, 2018 جىلدىڭ 1 جەلتوقسانىنا دەيىن قالا جانە اۋدان اكىمدەرى تىركەلمەي قالعان كوپقاباتتى ۇيلەردى بيۋدجەت قاراجاتى ەسەبىنەن مەملەكەتتىك تىركەۋدەن وتكىزۋى ءتيىس. سونداي-اق قالا جانە اۋدان اكىمدەرى كوپقاباتتى ۇيلەردىڭ اۋلاسىن اباتتاندىرىپ, قولدانىستاعى بالالارعا ارنالعان سپورتتىق جانە ويىن الاڭشالارىن قالپىنا كەلتىرۋى جانە جاڭادان سالۋى, ولاردىڭ جاۋاپكەرشىلىگىن كوندومينيۋم نىساندارىن باسقارۋ ورگاندارىنا بەرىپ, ودان ءارى كۇتىپ ۇستاۋدى قامتاماسىز ەتۋى قاجەت دەپ شەشىلدى.
تۇرعىندار تولەگەن اقشاسىنا ساي ساپالى قىزمەت كورسە, ارىز-شاعىمنىڭ بولمايتىنى بەلگىلى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
