كونكي سپورتى
كونكي سپورتىنان الەم كۋبوگى جاپونيادا باستالىپ, اقش-تا ءوز مارەسىنە جەتەدى. حالىقارالىق كونكيشىلەر وداعى (ISU) جاريالاعان كۇنتىزبە بويىنشا العاشقى كەزەڭ 14-18 قاراشا ارالىعىندا جاپونيانىڭ وبيحيرو قالاسىندا وتەدى. بەس كەزەڭگە سوزىلاتىن الەم كۋبوگىنىڭ ۇشەۋى ەۋروپا, ەكەۋى ازيا قۇرلىعىندا ۇيىمداستىرىلادى. 1-كەزەڭ – جاپونيا (16–18 قاراشا), 2-كەزەڭ – قىتاي (23–25 قاراشا), 3-كەزەڭ – گەرمانيا (7–9 جەلتوقسان), 4-كەزەڭ – نيدەرلاندى (14–16 جەلتوقسان), 5-كەزەڭ – نورۆەگيا (1–3 اقپان).
بىلتىرعى الەم كۋبوگىندا قازاقستاندىق كونكيشىلەر اراسىندا ەڭ ۇزدىك ناتيجەگە ەكاتەرينا ايدوۆا قول جەتكىزدى. ول 1000 مەترلىك سايىستا 131 ۇپاي جيناپ, 12-ورىنعا تابان تىرەگەن. كوماندالىق جارىس بويىنشا قازاقستان قۇراماسى 9 جانە 12-ورىن يەلەنگەن-ءدى.
شاڭعى جارىسى
شاڭعىشىلار بيىلعى ماۋسىمدى 25 قاراشا كۇنى فينليانديانىڭ رۋكا قالاسىنان باستايدى. 23 كەزەڭگە جالعاساتىن بايراقتى باسەكە 2019 جىلدىڭ 24 ناۋرىزىندا كانادانىڭ كۆەبەك قالاسىندا ءوز مارەسىنە جەتەدى. سونداي-اق وسى ارالىقتاعى نەگىزگى جارىس الەمنىڭ 10 ەلىندەگى 18 قالادا وتەدى. ولاردىڭ اراسىندا ليللەحاممەر, وسلو (نورۆەگيا), داۆوس (شۆەيتساريا), درەزدەن (گەرمانيا) جانە تاعى باسقا ءىرى قالالار بار.
وتكەن ماۋسىمدا قازاقستاندىق شاڭعىشى الەكسەي پولتورانين يتاليا, فينليانديا جانە سلوۆەنيادا وتكەن 15 شاقىرىمدىق قاشىقتىقتا توپ جاردى. سونىمەن قاتار ءبىر رەت كۇمىس جۇلدە, ءبىر رەت قولا مەدال يەلەندى. الەم كۋبوگىنىڭ قورىتىندىسى بويىنشا پولتورانين 796 ۇپاي جيناپ, الەمدەگى ەڭ ۇزدىك 7 شاڭعىشىنىڭ قاتارىنان كورىندى.
فريستايل (موگۋل)
فريستايلدىڭ موگۋل تۇرىنەن الەم كۋبوگى 2018 جىلدىڭ 7 جەلتوقسانىندا فينليانديانىڭ رۋكا قالاسىندا باستالىپ, 2019 جىلدىڭ 3 ناۋرىزىنداعى الماتىداعى شىمبۇلاقتا اياقتالادى. شىمبۇلاق – تۇڭعىش رەت الەم كۋبوگىن قابىلدايدى. مۇنىڭ ءوزى قازاقستاننىڭ موگۋل سپورتىنان ءباسى بيىك ەكەنىن بىلدىرەدى. ويتكەنى بىلتىرعى ماۋسىمدا ەرلەر اراسىندا وتانداسىمىز دميتري رەيحەرد ءتورت رەت ەكىنشى ورىن, ءۇش رەت قولا جۇلدە السا, پاۆەل كولماكوۆ ءبىر رەت ۇزدىك ۇشتىكتىڭ قاتارىنان كورىندى. ال قىزدار اراسىندا يۋليا گالىشەۆا ءبىر رەتتەن التىن, كۇمىس, قولا جۇلدە يەلەندى. سونداي-اق 2018 جىلعى وليمپيا ويىندارىندا قولا جۇلدەگە قول جەتكىزدى. بيىلعى الەم كۋبوگى جارىسى قىتاي, كانادا, اقش جانە جاپونيادا وتەدى.
شورت-ترەك
شورت-ترەكتەن الەم كۋبوگىنىڭ العاشقى كەزەڭى 2 قاراشا كۇنى كانادانىڭ كالگاري قالاسىندا باستالىپ, وتانداسىمىز ابزال اجعاليەۆ 500 مەترلىك باسەكەدە فينالعا دەيىن القىنباي جەتىپ, كۇمىس مەدالدى يەلەندى. ول كانادادا 40.136 سەكۋند ناتيجە كورسەتىپ, قازاقستاننىڭ جاڭا رەكوردىن تىركەدى. سونىمەن قاتار ابزال بىلتىرعى ماۋسىمدا ءدال وسى قاشىقتىقتا دا كۇمىس جۇلدە العان. ال 1000 مەتردە نۇربەرگەن جۇماعازيەۆ مارەگە ءۇشىنشى كەلىپ, قولانى قاناعات تۇتقان-دى.
جالپى شورت-ترەكتەن 2018-2019 ماۋسىم التى كەزەڭنەن تۇرادى. ەڭ قىزىعى, الەم كۋبوگىنىڭ ءۇشىنشى كەزەڭى تۇڭعىش رەت قازاقستاندا, 7-9 جەلتوقسان كۇندەرى الماتى قالاسىندا وتەدى.
بياتلون
بياتلون سپورتىنان 2018-2019 ماۋسىمىنداعى الەم كۋبوگى جارىسىنىڭ العاشقى كەزەڭى 2018 جىلدىڭ 2–9 جەلتوقسان ارالىعىندا سلوۆەنيانىڭ پوكليۋكا قالاسىندا باستالىپ, 18–24 ناۋرىزدا نورۆەگيانىڭ حولمەنكوللەن قالاسىنداعى 9-كەزەڭمەن اياقتالادى. الەم كۋبوگىنىڭ بيىلعى كەستەسى مىناداي: 2-كەزەڭ – اۋستريا (10–16 جەلتوقسان), 3-كەزەڭ – چەحيا (17–23 جەلتوقسان), 4-كەزەڭ – گەرمانيا (7–13 قاڭتار), 5-كەزەڭ – گەرمانيا (14–20 قاڭتار), 6-كەزەڭ – يتاليا (21–27 قاڭتار), 7-كەزەڭ – كانادا (4–10 اقپان), 8-كەزەڭ – اقش (11–17 اقپان). ال الەم چەمپيوناتى شۆەتسيانىڭ ەستەرسۋند قالاسىندا 7–17 ناۋرىز ارالىعىندا وتەدى.
ايتا كەتەيىك, بىلتىر شۆەتسيانىڭ ەستەرسۋند قالاسىندا وتكەن الەم كۋبوگىنىڭ العاشقى كەزەڭىندەگى ارالاس ەستافەتادا وتانداستارىمىز ماكسيم براۋن مەن گالينا ۆيشنەۆسكايا مارە سىزىعىن ءۇشىنشى كەسىپ, بياتلون سپورتىنداعى العاشقى قولا جۇلدەنى ەل قورجىنىنا سالعان ەدى.
مانەرلەپ سىرعاناۋ
مانەرلەپ سىرعاناۋ سپورتىنان جىلدىڭ نەگىزگى ءىرى تۋرنيرلەرى تامىز ايىندا باستالدى. بۇگىنگە دەيىن Lombardia Trophy, U.S. International Figure Skating Classic, Skate America جانە Skate Canada سەكىلدى حالىقارالىق باسەكەلەرى ءوتتى. قازاقستاندىق سپورتشىلار اراسىنان ەليزابەت تۇرسىنباەۆا ءۇش حالىقارالىق تۋرنيرگە قاتىسىپ ۇلگەردى. سلوۆاكيادا وتكەن Ondrej Nepela Trophy-2018 تۋرنيرىندە ەكى باعدارلاما بويىنشا 192.30 ۇپاي جيناپ, ەكىنشى ورىننان كورىنسە, اراعا 20 كۇن سالىپ فينليانديادا ۇيىمداستىرىلعان Finlandia Trophy باسەكەسىندە كۇمىس جۇلدەگەر اتاندى. بۇل تۋرنيردە وتانداسىمىز 200,74 ۇپاي جينادى. ال Skate Canada تۋرنيرىندە بەسىنشى ورىن يەلەندى.
الداعى ۋاقىتتا وتاندىق مانەرلەپ سىرعاناۋشىلاردى Alpen Trophy (اۋستريا), Trophée de France (فرانتسيا), Golden Spin (حورۆاتيا), گران-پري جارىسىنىڭ فينالى (كانادا), ءتورت قۇرلىق چەمپيوناتى (اقش), الەم چەمپيوناتى مەن كوماندالىق الەم چەمپيوناتى (جاپونيا) كۇتىپ تۇر.
ءالي بيتورە,
«ەگەمەن قازاقستان»
