جيىندى تۇركيانىڭ قازاقستانداعى توتەنشە جانە وكىلەتتى ەلشىسى ن.ۋيانىك اشتى. بريفينگ بارىسىندا تۇركيا رەسپۋبليكاسىنىڭ پرەزيدەنتتىك جۇيەگە كوشۋىنە قاتىستى «باستاماشىل جانە گۋمانيتارلىق سىرتقى ساياساتى» كەڭىنەن ءسوز بولدى.
«گۋمانيتارلىق سىرتقى ساياسات تەورياسى ارقىلى ەلىمىزدىڭ الەۋمەتتىك ماسەلەلەرىنىڭ وڭ شەشىم تابۋىن كوزدەيمىز. بۇل ارقىلى قوعامداعى ءار تۇلعانىڭ ادامي قۇندىلىقتارى, ار-وجدانى, ادام ءومىرى سىندى ماسەلەلەر ەل ىشىندە جانە حالىقارالىق دەڭگەيدە قورعالىپ كەلەدى. بۇگىندە بۇۇ بوسقىندار ىستەرى جونىندەگى جوعارعى كوميسسارى باسقارماسى ۇسىنعان كورسەتكىشكە سايكەس, تۇركيا الەمدەگى ەڭ كوپ بوسقىن قابىلداپ وتىرعان ەل سانالادى. قازىر ەلىمىزدە 600 مىڭنان استام سيريالىق بالالار ءبىلىم الۋدا. ولاردىڭ 97%-ى باستاۋىش سىنىپ جاسىنداعى بالا. سونداي-اق سيريالىق 20 مىڭنان اسا جاس ءبىزدىڭ مەملەكەتىمىزدە جوعارى وقۋ ورىندارىندا ءبىلىم الىپ جاتىر», دەدى ن.ۋيانىك.
جيىندا بەلگىلى بولعانداي, تۇركيا رەسپۋبليكاسى گۋمانيتارلىق كومەك كورسەتۋ بويىنشا «Global Humanitarian Assistance-2018 (GHA) باعدارلاماسىنىڭ «عالامدىق گۋمانيتارلىق كومەك» ەسەبىنە سايكەس بيىل الەم بويىنشا ءبىرىنشى ورىنعا شىققان. قايىرىمدىلىق جاساۋ ىسىنە تۇركيا تاراپىنان بيىل 8,07 ميلليارد اقش دوللارى جۇمسالعان.
سونداي-اق تۇركيا پالەستينالىق بوسقىندار ءۇشىن كومەك كورسەتۋشى UNRWA (پالەستينالىق بوسقىندار ىسىمەن اينالىساتىن تاياۋ شىعىس اگەنتتىگى ) اگەنتتىگىنە دەمەۋ بولىپ كەلەدى. اتالعان ۇيىمعا 2017 جىلدىڭ ىشىندە تۇرىك بيۋدجەتىنەن 1,5 ميلليون اقش دوللارى بولىنگەن. اتالعان اگەنتتىك بوسقىنداردىڭ ءتۇرلى الەۋمەتتىك ماسەلەلەرىن شەشۋگە كومەكتەستى. بۇل ۇيىمعا, سونداي-اق قازاقستان رەسپۋبليكاسى دا قولۇشىن سوزدى. جيىن بارىسىندا تۇركيانىڭ قازاقستانداعى توتەنشە جانە وكىلەتتى ەلشىسى قازاقستاننىڭ UNRWA ۇيىمىنا كورسەتكەن كومەگى ءۇشىن العىس ءبىلدىردى. سونداي-اق مەملەكەتتىك دارەجەدە ىسكە اسىرىلعان شارالارعا ەكىجاقتى جانە كوپجاقتى ىنتىماقتاستىقتى كۇشەيتۋگە ارنالعان قادامداردىڭ جالعاسىپ كەلە جاتقانىن اتاپ ءوتتى.
«استانا پروتسەسىنىڭ ارقاسىندا ۋاقىتشا دوستىق ءبىتىمىنىڭ كۇشەيتىلۋى, شيەلەنىستى ازايتۋ مەموراندۋمىنىڭ ورناتىلۋى جانە جانجالدى تاراپتار اراسىندا سەنىمدى ارتتىرۋ شارالارىنىڭ قابىلدانۋى سياقتى ماسەلەلەر بويىنشا ايتارلىقتاي العا جىلجۋ بايقالادى. قازاقستان رەسپۋبليكاسى سيريا داعدارىسىنا قاتىستى استانا پروتسەسىن ۇيىمداستىرىپ, ماڭىزدى قولداۋ كورسەتۋدە. بۇل قولداۋ ءۇشىن ەرەكشە ريزاشىلىعىمىزدى بىلدىرەمىز», دەدى ەلشى.
سونداي-اق ن.ۋيانىك TIKA مەن KazAID اراسىنداعى ىنتىماقتاستىقتىڭ ودان ءارى كۇشەيۋىنە تىلەكتەس ەكەنىن ءبىلدىردى.
مارجان تىلەۋبەك,
«ەگەمەن قازاقستان»
