ەلباسى تاپسىرمالارىن ورىنداۋعا باعىتتالعان
دەنساۋلىق ساقتاۋ ماسەلەسىنە قاتىستى زاڭ جوباسى مەديتسينالىق ۇيىمداردا كورپوراتيۆتىك باسقارۋ جۇيەسىن جەتىلدىرۋ, دونور جانە ترانسپلانتاتسيالاۋ ينستيتۋتىن دامىتۋ, مەديتسينالىق ءبىلىم بەرۋ جۇيەسىن دامىتۋ جانە مەديتسينا كادرلارىن دايارلاۋ ساپاسىن ارتتىرۋعا باعىتتالعان. سونىمەن قاتار وندا مىندەتتى الەۋمەتتىك مەديتسينالىق ساقتاندىرۋ جۇيەسىن ودان ءارى جەتىلدىرۋ مەن تەگىن مەديتسينالىق كومەكتىڭ كەپىلدىك بەرىلگەن كولەمىنىڭ جاڭا مودەلىن ەنگىزۋ قاراستىرىلعان.
اتالعان زاڭ جوباسى بويىنشا بايانداما جاساعان دەنساۋلىق ساقتاۋ ءمينيسترى ەلجان ءبىرتانوۆ دەپۋتاتتار تالقىسىنا ۇسىنىلعان قۇجاتقا ەنگىزىلگەن وزگەرتۋلەر ارقىلى مەملەكەت مىندەتتەمەلەرىنىڭ ناقتى شەگى ايقىندالاتىندىعىن, مەديتسينا قىزمەتكەرلەرىنىڭ تولەماقى دەڭگەيى مەن مامانداردىڭ باسەكەگە قابىلەتتىلىگى وسەتىندىگىن, حالىققا كورسەتىلەتىن مەديتسينالىق كومەكتىڭ قولجەتىمدىلىگى مەن ساپاسى ارتاتىندىعىن, دەنساۋلىق ساقتاۋ جۇيەسىن قارجىلاندىرۋ كولەمىن ارتتىرۋ ناتيجەسىندە حالىقتىڭ «قالتا» شىعىستارىنىڭ تومەندەيتىندىگىن, مەديتسينالىق ۇيىمدار نارىعىنىڭ اشىقتىعى ارتىپ, نارىققا قاتىسۋشى ۇيىمداردىڭ اراسىنداعى باسەكەلەستىك كۇشەيەتىندىگىن اتاپ ءوتتى.
– سونداي-اق زاڭ جوباسى دونورلىق ينستيتۋتتى, تۋبەركۋلەزبەن اۋىراتىن ناۋقاستارعا مەديتسينالىق كومەك كورسەتۋدى, مىندەتتى الەۋمەتتىك مەديتسينالىق ساقتاندىرۋ جۇيەسىن ودان ءارى جەتىلدىرۋگە جانە ۇلتتىق دەنساۋلىق ساقتاۋ شوتتارى جۇيەسىن ەنگىزۋگە, كەيبىر اكىمشىلىك جانە قىلمىستىق قۇقىق بۇزۋشىلىقتاردىڭ قۇرامىن قايتا قاراۋعا, سونىمەن قاتار دەنساۋلىق ساقتاۋ جۇيەسى ماسەلەلەرى بويىنشا قولدانىستاعى زاڭناماداعى كەمشىلىكتەردى جويۋعا باعىتتالعان, – دەدى دەنساۋلىق ساقتاۋ ءمينيسترى.
ءوز كەزەگىندە ءماجىلىس توراعاسى نۇرلان نىعماتۋلين دەنساۋلىق ساقتاۋ تۋرالى زاڭ جوباسى مەملەكەت باسشىسىنىڭ كەپىلدەندىرىلگەن مەديتسينالىق كومەكتىڭ جاڭا مودەلىن ەنگىزۋ تۋرالى تاپسىرمالارىن ورىنداۋعا باعىتتالعانىن اتاپ ءوتتى.
پالاتا توراعاسى اتالعان قۇجات ازاماتتارعا مەديتسينالىق قىزمەتتەردىڭ قولجەتىمدىلىگىن ارتتىرۋدى عانا ەمەس, اقىلى مەديتسينالىق قىزمەتتەرگە مەملەكەتتىك شىعىنداردى قىسقارتۋدى كوزدەيتىنىنە توقتالدى. بۇل زاڭ جوباسى مەديتسينالىق ۇيىمداردا كورپوراتيۆتىك باسقارۋ جۇيەسىن جەتىلدىرۋ, دونور جانە ترانسپلانتاتسيالاۋ ينستيتۋتىن دامىتۋ, مەديتسينالىق ءبىلىم بەرۋ جۇيەسىن جەتىلدىرۋ جانە مەديتسينا كادرلارىن دايارلاۋ ساپاسىن ارتتىرۋعا ارنالعان.
سونىمەن قاتار مىندەتتى الەۋمەتتىك مەديتسينالىق ساقتاندىرۋ جۇيەسىن ودان ءارى جەتىلدىرۋ مەن تەگىن مەديتسينالىق كومەكتىڭ كەپىلدىك بەرىلگەن كولەمىنىڭ جاڭا مودەلىن ەنگىزۋ قاراستىرىلعان.
اتاپ ايتقاندا, دونورلاردى اقىلى نەگىزدە تارتىپ, زاڭ جوباسىندا ناۋقاسقا بەرىلەتىن دارىلىك زاتتارعا قوسىمشا اقى تولەۋ تەتىكتەرى ەنگىزىلگەن. ءماجىلىس توراعاسى وسى نورمالاردىڭ قاجەتتىگى تۋرالى كەلىسە وتىرىپ, سىبايلاس جەمقورلىق پەن قۇقىق بۇزۋشىلىقتار قاۋپىن بولدىرماۋ ءۇشىن تولەۋدىڭ ايقىن ءتارتىبىن رەتتەيتىن بارلىق ەرەجەلەرگە ناقتى جانە تۇسىنىكتى تۇزەتۋلەر ەنگىزۋدىڭ ماڭىزدىلىعىن اتاپ ءوتتى.
بەكىتىلگەن ەرەجەلەر تۋرالى اقپارات مەديتسينالىق مەكەمەلەردە, ينتەرنەت-رەسۋرستاردا ورنالاستىرىلىپ, جۇرتشىلىق ءۇشىن قولجەتىمدى بولۋىنا نازار اۋدارعان ءماجىلىس توراعاسى, ايتىلعان پىكىرلەردى ەكىنشى وقىلىمعا دەيىن ەسكەرۋدى ۇسىندى.
يندۋستريالىق ايماقتارعا جەر ءبولۋ ءتارتىبى جەڭىلدەيدى
سونىمەن قاتار جالپى وتىرىستا «ارنايى ەكونوميكالىق جانە يندۋستريالىق ايماقتار تۋرالى» زاڭ جوباسى ىلەسپە تۇزەتۋلەرىمەن ءبىرىنشى وقىلىمدا ماقۇلداندى.
زاڭ جوباسى بويىنشا بايانداما جاساعان ينۆەستيتسيالار جانە دامۋ ءمينيسترى جەڭىس قاسىمبەكتىڭ ايتۋىنشا, باسقارۋشى كومپانيالاردان ارنايى ەكونوميكالىق ايماقتار مەن يندۋستريالىق ايماق قاتىسۋشىلارىنا جەر ۋچاسكەلەرىن ۇسىنۋدىڭ جاڭا مەحانيزمى ەنگىزىلمەك.
– بۇگىندە قولدانىستاعى زاڭناما نورمالارىنا سايكەس جەر ۋچاسكەسىن الۋ پروتسەسى كۇردەلى. وعان شامامەن 6-9 اي ۋاقىت كەتەدى. سونىڭ سالدارىنان جوبالاردى ىسكە قوسۋ مەرزىمى سوزىلادى. ينۆەستورلار دا ۋاقىت جوعالتادى. سوڭىندا ماتەريالدىق شىعىنعا ۇشىرايدى. بۇدان بولەك, قازىرگى «قازاقستان رەسپۋبليكاسىنداعى ارنايى ەكونوميكالىق ايماقتار تۋرالى» زاڭدا جانە جەر كودەكسىندە قاراستىرىلعان جەر قاتىناستارىن رەگلامەنتتەۋ قيىن جانە زاڭنامالىق اكتىلەر اراسىنداعى ەرسىلى-قارسىلى سىلتەمە نورمالارىمەن سيپاتتالادى. وسىعان بايلانىستى, زاڭ جوباسى قاتىسۋشىلاردىڭ قىسقا مەرزىمدە جانە جەڭىل پروتسەدۋرالار ارقىلى جەر ۋچاسكەلەرىن الۋ ءتارتىبىن وڭتايلاندىرۋعا باعىتتالعان, – دەدى ج.قاسىمبەك.
اتاپ ايتقاندا, ارنايى ەكونوميكالىق ايماق قۇرىلاتىن مەملەكەت مەنشىگىندەگى جەر ۋچاسكەلەرى قازاقستان رەسپۋبليكاسىنىڭ جەر زاڭناماسىنا سايكەس باسقارۋشى كومپانيالارعا قايتارىمدى نەگىزدە ۋاقىتشا پايدالانۋعا بەرىلەتىن بولادى. ال جەكەمەنشىكتەگى جەر ۋچاسكەلەرى ۋاقىتشا پايدالانۋ كەلىسىمشارتىنا سايكەس بەرىلەدى.
ءوز كەزەگىندە, باسقارۋشى كومپانيالار بۇل ۋچاسكەلەردى وزدەرى سەگمەنتتەپ, ارنايى ەكونوميكالىق ايماق قاتىسۋشىلارىنا ۇسىنادى.
ءمينيستردىڭ بايانداۋىنشا, زاڭ جوباسىن قابىلداۋ ارنايى ەكونوميكالىق ايماقتار مەن يندۋستريالىق ايماقتاردىڭ جۇمىسىن جانداندىرۋعا, 2022 جىلعا دەيىن قوسىمشا 10 مىڭ جۇمىس ورنىن اشۋعا جانە 150-دەن استام جاڭا جوبالاردى ىسكە قوسۋعا مۇمكىندىك بەرمەك.
دەپۋتاتتار زاڭ جوباسىمەن جۇمىس ىستەۋى بارىسىندا «يننوۆاتسيالىق تەحنولوگيالار پاركى» ارنايى ەكونوميكالىق ايماعىن رەسپۋبليكالىق ماڭىزى بار الماتى قالاسىنىڭ جەرگىلىكتى اتقارۋشى ورگانىنىڭ باسقارۋىنا بەرۋ جونىندەگى ناقتىلاۋشى نورمالاردى ەنگىزۋدى, ەلوردانىڭ جەرگىلىكتى اتقارۋشى ورگانىنىڭ «استانا – جاڭا قالا» ارنايى ەكونوميكالىق ايماعىن باسقارۋ بولىگىندەگى قۇزىرەتىن الىپ تاستاۋ جونىندەگى نورمالاردى ناقتىلاۋدى, «قورعاس» شەكارا ماڭى ىنتىماقتاستىعى حالىقارالىق ورتالىعى» ارنايى ەكونوميكالىق ايماعىنىڭ جۇمىس ىستەۋ ەرەكشەلىكتەرىن وسى ورتالىقتىڭ ارنايى ەكونوميكالىق ايماق مارتەبەسىن الۋىنا بايلانىستى زاڭنامالىق دەڭگەيدە بەكىتۋدى, ۋاكىلەتتى ورگاننىڭ ۇكىمەتكە ارنايى ەكونوميكالىق ايماقتى قۇرۋ, ونىڭ جۇمىس ىستەۋ مەرزىمىن ۇزارتۋ نەمەسە تاراتۋ تۋرالى ۇسىنىستار ەنگىزۋ جونىندەگى قۇزىرەتىن كەڭەيتۋ سياقتى جانە باسقا دا تۇزەتۋلەر ەنگىزگەن.
وندىرىسكە الىندى
وتىرىس بارىسىندا ءماجىلىس «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بيزنەس-ورتانى دامىتۋ جانە ساۋدا قىزمەتىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن, قازاقستان مەن قىتاي حالىق رەسپۋبليكاسىنىڭ ۇكىمەتتەرى اراسىنداعى قحر-دىڭ جەڭىلدىكتى كرەديت بەرۋى تۋرالى نەگىزدەمەلىك كەلىسىمدى راتيفيكاتسيالاۋ تۋرالى جانە قازاقستان مەن رەسەي فەدەراتسياسىنىڭ ۇكىمەتتەرى اراسىنداعى م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ قازاقستاندىق فيليالىنىڭ جۇمىس ىستەۋى تۋرالى كەلىسىمدى راتيفيكاتسيالاۋ تۋرالى زاڭ جوبالارىن جۇمىسقا الدى.
جالپى وتىرىس سوڭىندا دەپۋتاتتار گ.بيجانوۆا, ج.نۇرمانبەتوۆا, م.تەمىرجانوۆ, ت.ياكوۆلەۆا, ب.جىلقىشيەۆ, م.قازبەكوۆا, ە.بارلىباەۆ, ا.پەرۋاشەۆ, ي.سميرنوۆا, ۆ.كوسارەۆ, ش.حاحازوۆ, ر.كيم دەپۋتاتتىق ساۋالدار جولدادى.
سەرىك ابدىبەك,
«ەگەمەن قازاقستان»
