تۋىندىداعى وقيعا جەلىسىنە ارقاۋ بولعان دۇنيە – التايدان اتتانىپ, جولاي تيبەتتى كوكتەي ءوتىپ, بۇلاناي (گيمالاي) تاۋدىڭ ادام اياعى تيمەگەن اسقارالى جوتاسىنان اسىپ, كاشميرگە تابان تىرەپ توقتاعان قازاق كوشىنىڭ تۇركياعا ورنىققانعا دەيىنگى ازاپتى سۇرلەۋى.
– اتالمىش كينونى ءتۇسىرۋ بارىسىندا, − دەيدى دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ, قىتاي جانە ۇلىبريتانيا ەلدەرىنەن دەرەكتەر تاپتىق, سونىمەن قاتار بەس مىڭ شاقىرىمعا سوزىلعان كوش سۇرلەۋىنىڭ تۇركيادا تۇراتىن ءتىرى كۋاگەرلەرىنىڭ اڭگىمەلەرى ارقاۋ بولدى.
ءبىز ءوزىمىزدىڭ قولداعى مالىمەتتەرگە جۇگىنسەك, 1930 جىلداردىڭ سوڭىندا التايدان اۋا كوشكەن 36 مىڭ ادامنىڭ 3039-ى 1941 جىلى ۇندىستانعا ءتىرى جەتسە, ارادا ءبىر جىل وتكەندە 2000-عا تارتا ادام جەرسىنبەي قايتىس بولعان. وسىلاردان 1942 جىلى 1150 ادام ءتىرى قالىپتى. بۇلارعا 1951 جىلى شىڭجاڭ ولكەسىنەن اۋعان ەكىنشى قازاق كوشىنىڭ ادامدارى قوسىلىپ, جيىنى 1850 ادامعا جەتكەن.
بريتان مۇراعاتىندا ساقتالعان ءبىر قۇجاتتا: بوسقىنداردىڭ تۇركياعا قونىستانۋىن كاشمير بيلىگى جانە امەريكا فيلانتروپ قوعامى, اقش-تاعى حريستوس شىركەۋلەر كەڭەسى سىندى ۇيىمدار قارجىلاندىرىپتى. وسىلاي 1952 جىلدىڭ 13 ناۋرىزىندا تۇركيا پرەزيدەنتى جالەل بايار مەن ۇكىمەت باسشىسى ادنان مەندەرەس «بوسقىن قازاقتاردى ءوز ەلدەرىنە كوشىرىپ الۋ» تۋرالى قۇجاتقا قول قويعان. ناتيجەسىندە ەكى مىڭعا تارتا قازاق انادولىلىق اعايىندارعا بارىپ قوسىلعان.
جوعارىدا تۇساۋى كەسىلگەن دەرەكتى فيلمدە ءبىز ايتقان وقيعالار قاداۋ-قاداۋ بولسا دا كورىنىس تاۋىپتى. بىراق تاريحي وقيعانى جۇيەلى ءارى تولىق قامتي الماعانى اڭعارىلادى. بولاشاقتا بۇل تۋىندىنى ىندەتە وتىرىپ, ۇلت تاريحىنىڭ بەلگىسىز ءبىر پۇشپاعىن تۇگەندەيتىن كولەمدى دۇنيە جاساۋعا نەگىز بار.
بەكەن قايرات ۇلى,
«ەگەمەن قازاقستان»
