الاتاۋ باۋرايىندا اتالمىش كلۋبتىڭ ىرگەتاسىن قالاعان ەرەجەسىز جەكپە-جەك ونەرىنىڭ حاس شەبەرلەرى – اعايىندى نازاروۆتار ەكەنىن جانكۇيەر قاۋىم جاقسى بىلەدى. جاس كەزىنەن وسى سپورتتى سەرىك ەتكەن ارداق قۇتتىقوجا ۇلى كوپتەگەن بايراقتى باسەكەدە قازاق ەلى نامىسىن ابىرويلى قورعاپ, تالاي مارتە جەڭىس تۇعىرىنىڭ ەڭ بيىك ساتىسىنا كوتەرىلدى. بىرنەشە رەت الەم چەمپيونى اتانىپ, الاشتىڭ ماقتان تۇتار ۇلىنا اينالدى. ارداقتىڭ تۋعان ءىنىسى – بەيبىت تە وسى ونەرگە مىقتاپ دەن قويىپ, بىرقاتار حالىقارالىق تۋرنيرلەردە توپ جاردى. ول دا دۇنيەجۇزى چەمپيونى اتاندى. قازىرگى كەزدە «الەم فايتەرس» دەپ اتالاتىن كاسىپقوي سپورت كلۋبىن قۇرعان اعايىندىلار جاستار مەن جاسوسپىرىمدەرگە ەرەجەسىز جەكپە-جەك ونەرىنىڭ قىر-سىرىن ۇيرەتۋدە.
اعايىندى ارداق پەن بەيبىت نازاروۆتىڭ ارنايى شاقىرتۋىمەن داڭقتى بالۋان حادجيمۇرات گاتسالوۆ ءوز ارىپتەستەرىمەن بىرگە «الەم فايتەرس» كلۋبىندا قوناقتا بولىپ, وسى جەردە شەبەرلىكتەرىن شىنداپ جۇرگەن ورەندەرمەن ەمەن-جارقىن جۇزدەستى. 35 جاستاعى سولتۇستىك وسەتيانىڭ تۋماسى شەبەرلىك ساباعىن وتكىزىپ, جاس جەتكىنشەكتەرگە ءوزىنىڭ وڭ جامباسىنا كەلەتىن وڭتايلى ءادىس تاسىلدەردى ۇيرەتتى. كوپشىلىك تاراپىنان قويىلعان ساۋالدارىنا جاۋاپ بەرىپ, ءوزىنىڭ سپورت سالاسىنداعى زور تاجىريبەسىمەن ء بولىستى.
ەرەجەسىز جەكپە-جەك الەمىندەگى ەڭ بەلدى نۇسقا – UFC ەكەنى وزدەرىڭىزگە جاقسى ءمالىم. اتالمىش ۇيىمنىڭ اسا اۋىر سالماقتاعى چەمپيوندىق اتاعىن قازىرگى كەزدە 39 جاستاعى اقش-تىڭ ءاپايتوسى دەنيەل كورمە يەمدەنىپ وتىر. كەزىندە ەركىن كۇرەسپەن شۇعىلدانعان سول ساڭلاق 2004 جىلى افينى وليمپياداسىنىڭ جارتىلاي فينالىندا ءدال وسى حادجيمۇرات گاتسالوۆپەن كۇش سىناستى. ودان كەيىن ولاردىڭ جولى تاعى ءبىر مارتە قيىستى. ەكى رەتىندە دە وسەتين بالۋانىنىڭ ۇستەمدىگى ەش كۇمان تۋعىزعان جوق. «الەم فايتەرستە» وتكەن كەزدەسۋ بارىسىندا اتاعى الىسقا جايىلعان ايتۋلى قوس بالۋان اراسىنداعى بەلدەسۋدىڭ قالاي وربىگەنى جايىندا دا ءبىراز اڭگىمە بولدى.
وسى ءماندى دە ماعىنالى كەزدەسۋدەن كەيىن ەرەجەسىز جەكپە-جەكتەن الەمنىڭ بىرنەشە دۇركىن چەمپيونى ارداق نازاروۆ داڭقتى بالۋان حادجيمۇرات گاتسالوۆ پەن ونىڭ دوستارى – ەدۋارد بازروۆ جانە دانيار كارىمجاننىڭ يىعىنا قازاقتىڭ شاپانىن جاپتى.
ءسوز ورايى كەلگەندە, 15 جىلدان اسا رەسەيدىڭ تۋى استىندا تابىستى ونەر كورسەتىپ, كوپتەگەن ءدۇبىرلى دودالاردا جەڭىس تۇعىرىنىڭ ەڭ بيىك ساتىسىنا كوتەرىلگەن ايگلى سپورتشى حادجيمۇرات گاتسالوۆ بۇل كۇندەرى قازاقستاندا ەڭبەك ەتىپ, ەلىمىزدىڭ ەركىن كۇرەس شەبەرلەرىن باپتاپ جۇرگەنىن ايتا كەتۋدى ءجون كورىپ وتىرمىز.
عالىم سۇلەيمەن,
«ەگەمەن قازاقستان»
الماتى
