«2GIS» اقپاراتتىق ورتالىعى قازاقستاننىڭ 11 قالاسىندا بار. اتىراۋ تەگىن ءموبيلدى قوسىمشا ەنگىزىلگەن وبلىس ورتالىقتارىنىڭ اراسىندا 12-ءنشى بولىپ وتىر.
- قازىر ءوندىرىس بولىمىنە قىزمەتكەرلەر جيناپ جاتىرمىز, قالانى سالىستىرا تەكسەرۋدى, مەكەمەلەر تۋرالى اقپارات جيناپ, بىرىڭعاي كارتاعا ەنگىزۋدى ۇيرەتۋدەمىز. دايىندىق جۇمىستارى ناۋرىزعا دەيىن جالعاسادى. ناۋرىزدان باستاپ ءموبيلدى قوسىمشا ىسكە قوسىلادى, ونى اتىراۋلىق تۇرعىندار قولدانا الادى, دەيدى
اتىراۋداعى «2GIS» جشس باسشىسى ساعات نۇرماعانبەتوۆ.
قالالىق اقپاراتتىق ورتالىق وكىلدەرىنىڭ ايتۋلارىنشا, جاڭا قوسىمشا اتىراۋلىق تۇرعىندارعا عانا ەمەس, قالا قوناقتارىنا دا كومەكشى قۇرال بولادى.
- «2GIS» - قالانىڭ ەلەكتروندى انىقتامالىعى. وعان بارلىق عيماراتتار مەن ولاردا ورنالاسقان مەكەمەلەر ەنەدى. ناۆيگاتور مەن جولسىلتەۋشى رەتىندە جۇمىس ىستەيدى. ول ءۇشىن قوسىمشانى تەلەفونعا نەمەسە باسقا ءموبيلدى قۇرىلعىعا جۇكتەپ, ايىنا 1 رەت جاڭارتىپ تۇرۋ كەرەك. مەكەمەلەر تۋرالى مالىمەتتەر تەگىن ەنگىزىلەدى - دەيدى ساعات نۇرماعانبەتوۆ.
ايتا كەتەيىك «2GIS» - حالىقارالىق كارتوگرافيالىق كومپانيا, وسى اتاۋمەن 1999 جىلدان بەرى قالالاردىڭ كارتالارى بار ەلەكتروندى انىقتامالىقتار شىعارادى. «2GIS» باس كەڭسەسى رف نوۆوسيبيرسك قالاسىندا ورنالاسقان. كومپانيا رەسەيدىڭ كوپتەگەن قالالارىنىڭ جانە قازاقستان, يتاليا, چەحيا, چيلي, باە, قىرعىزستان, ۋكراينا, كيپردىڭ انىقتامالارىن جاساعان.
كومپانيانىڭ 2018 جىلدىڭ شىلدەسىندەگى مالىمەتى بويىنشا «2GIS» كارتا-انىقتامالارى 350-دەن استام قالادا جۇمىس ىستەيدى, ايلىق اۋديتورياسى 40 ملن تۇتىنۋشىدان اسادى. سەرۆيس تاۋلىگىنە 2,2 ملن ىزدەۋ ساۋالىن وڭدەيدى.
