كورنەكتى مەملەكەت جانە قوعام قايراتكەرى, پۋبليتسيست, ەلىمىزدىڭ ءبىلىم, مادەنيەت جانە ونەرىنىڭ دامۋىنا ايشىقتى ۇلەس قوسقان تەمىربەك جۇرگەنوۆتىڭ ەسىمى قازاق مادەنيەتى تاريحىندا التىن ارىپتەرمەن جازىلعان.
ۇلت قايراتكەرىنىڭ 1937 جىلى 3 تامىزدا «حالىق جاۋى» دەگەن جالعان ايىپپەن ۇستالىپ, اتۋ جازاسىنا كەسىلگەنى بەلگىلى. ەسكە الۋعا جيىنىنا قاتىسقان باۋىرى بيجان جۇرگەنوۆ, ت.جۇرگەنوۆ اتىنداعى قوعامدىق قوردىڭ توراعاسى ساپەن اڭساتوۆ, قر ەڭبەك سىڭىرگەن قايراتكەرى داريعا تۇرانقۇلوۆا, كينورەجيسسەر ەركىن راقىشەۆ, ت.ب. وسى ءبىر قارالى جىلداردا تەمىربەك جۇرگەنوۆتىڭ باسىنا تۇسكەن قيىن-قىستاۋ كەزەڭدى, جارى دامەش ەرمەكوۆانىڭ تاعدىرى تۋرالى, 1957 جىلى اقتالعاننان كەيىن تەرمىربەكتەي تۇلعانىڭ تاريحتاعى ورنىنا قاتىستى ادىلەتتىلىكتى قالپىنا كەلتىرۋ, ەسىمىن ۇلىقتاۋداعى ىزگى ىستەرىنە قاتىستى مازمۇندى مالىمەتتەردى ورتاعا سالدى.
تەمىربەك جۇرگەنوۆ 1898 جىلى قاراشا ايىندا اقتوبە وبلىسى ىرعىز اۋدانىندا دۇنيەگە كەلگەن. 1913 جىلى ورىس-قازاق مەكتەبىن ءتاماماداپ, 1917 جىلى قىزىلورداداعى سۋحانسكي اتىنداعى ۋچيليششەدە ءبىلىمىن جالعاستىرادى. تەمىربەكتەي تۇلعا قازاقستاننىڭ حالىق اعارتۋ كوميسسارياتى جۇمىسىنا س.اسفەندياروۆتى, ق.جۇبانوۆتى, ع.مۇسىرەپوۆتەي تۇلعالاردى تارتىپ, «قازاقستاندا مەكتەپ جۇيەسىن رەتتەۋ جانە قازاق ورتا مەكتەپتەرىنىڭ سانىن كوبەيتۋ تۋرالى» قاۋلىنىڭ قابىلدانىپ, جۇزەگە اسۋىنا جاردەمدەسكەنى, قازاقستاننىڭ العاشقى مۋزىكالىق تەاترىن ۇيىمداستىرۋعا ۇلەس قوسقاندىعى, (قازىرگى اباي اتىنداعى قازاق مەملەكەتتىك وپەرا جانە بالەت تەاترى) بىرنەشە ءتىلدى مەڭگەرگەن ۇستازدىڭ قازاقتىڭ اۋىزشا ءارى جازباشا اقىندىق شىعارمالارىن جيناقتاپ,1924 جىلى «تەرمە» اتتى ولەڭدەرىن شىعارعاندىعى جايىنداعى مالىمەتتەر ايتىلدى.
حالىق اقىندارىنان, جىرشى-جىراۋلاردان, حالىق انشىلەرىنەن, اڭىزشىلاردان ەستىگەن تاريحي دەرەكتەر, ەپوستىق شىعارمالار, تاريحي كۇيلەر, ليريكالىق اندەردى دارىپتەيتىن حالىق اندەرىنىڭ ماڭىزى زور.
ەسكە الۋعا جينالعان كوپشىلىك كوپتەگەن مازمۇندى دەرەكتەردى ورتاعا سالىپ, قايراتكەر ءومىرى مەن قىزمەتىنە ارنالعان كىتاپ كورمەسىن تاماشالادى.
بۇگىندە ت.جۇرگەنوۆتىڭ ەسىمى الماتى قالاسىنداعى قازاق ۇلتتىق ونەر اكادەمياسىنا, ەلىمىزدەگى مەكتەپتەر مەن كوشەلەرگە بەرىلگەن.
ەلۆيرا سەرىكقىزى,
«ەگەمەن قازاقستان»
الماتى
