مۇرات قالقاباەۆتىڭ سۋرەتشىلىك ونەرى تەرەڭنەن تامىر تارتادى. ونىڭ اجەسى ون ساۋساعىنان ونەر تامعان ادام بولىپتى. ول كىسىنىڭ قولىنان شىققان تەكەمەتتەر مەن سىرماقتار سۇلۋلىعىمەن كوز جاۋىن العان. بالا مۇرات جاستايىنان اجەسىنىڭ جانىندا ءجۇرىپ, وسى ونەردىڭ ۋىزىنا قانىپ وسكەن. سودان دا بولار, ماماندىق تاڭداۋعا كەلگەندە ول كوپ ويلانا قويماعان: بىردەن الماتى كوركەمونەر ۋچيليششەسىنە تۇسكەن. ونەر جولىن بولاشاق سۋرەتشى تەكەمەت, سىرماق جانە گوبەلەن جاساۋدان باستاپتى. قىلقالام شەبەرىنىڭ اعاسى توقبولات توعىزباەۆ تا سۋرەتشى بولعان. وتكەن عاسىردىڭ 60-شى جىلدارى جاڭا قازاق ونەرىن قالىپتاستىرۋشىلاردىڭ ءبىرى اتانعان. مامانداردىڭ ايتۋىنشا, اعايىندى ەكەۋىنىڭ تۋىندىلارى دا ءبىر-بىرىنە ۇقساس كەلەدى ەكەن.
سۋرەتشى كيىز باسۋ وندىرىسىندە العاشقى بولىپ ستانوكتىك ءادىستى ەنگىزگەن. تەكەمەتتەر مەن سىرماقتار ءۇشىن سيۋجەتتى ششەبەر ۇلتتىق فولكلوردان الادى. ەڭ باستىسى, ول قولعا العان تاقىرىپتى ءوزىنىڭ قيالىنداعى الۋان ءتۇرلى مازمۇندىق ەرەكشەلىكەرمەن بايىتا ءبىلۋدى جوعارى دارەجەدە مەڭگەرگەن كاسىبي مامان.
مۇرات قالقاباەۆ سان قىرلى تالانت يەسى. ونىڭ كەڭىستىكتى ەركىن سەزىنە وتىرىپ دۇنيەگە كەلتىرگەن تۋىندىلارى وسىعان ايعاق. مىسالى, شەبەردىڭ «قوبىز», «قازا بولعان شاحتەرلەر ەسكەرتكىشى», «قۋعىن-سۇرگىن جىلدارى قازاقستاندا قازا بولعاندارعا ارنالعان ەسكەرتكىش», «ستاليندىك قۋعىن-سۇرگىنگە ۇشىراعان رەسەيلىكتەرگە ارنالعان ەسكەرتكىش» اتتى مۇسىندەرى جوعارى كوركەمدىك تەبىرەنىسپەن سومدالعان ونەر تۋىندىلارى رەتىندە كەزىندە جوعارى باعا العان.
كسرو جانە قازاقستان سۋرەتشىلەر وداعىنىڭ مۇشەسى, قازاقستان رەسپۋبليكاسىنىڭ ەڭبەك سىڭىرگەن قايراتكەرى مۇرات قالقاباەۆتىڭ ۇزدىك تۋىندىلارى اقش, يزرايل, كانادا, گەرمانيا, وڭتۇستىك كورەيا, رەسەي جانە باسقا دا ەلدەردىڭ مۋزەيلەرىندە, سونداي-اق جەكە كوللەكتسيونەرلەردىڭ قولىندا ساقتاۋلى.
قايرات ءابىلدا,
«ەگەمەن قازاقستان»
قاراعاندى
