جاس تالانتتار اسىعا كۇتەتىن بايقاۋدىڭ سالتاناتتى اشىلۋى بەيبىتشىلىك جانە كەلىسىم سارايىندا ءوتتى. استانا قالاسى اكىمىنىڭ ورىنباسارى ەرمەك امانشاەۆ قاتىسۋشىلارعا ساتتىلىك تىلەپ, ەلوردا باسشىلىعىنىڭ اتىنان بايقاۋدى دايىنداپ, ۇيىمداستىرعاندارعا, سونداي-اق قازىلار القاسىنىڭ مۇشەلەرى مەن قوناقتارعا, «شابىت» فەستيۆالىنە كەلگەن تانىمال ونەر جۇلدىزدارىنا العىسىن ءبىلدىردى.
– مەملەكەت باسشىسى قازاقستاندىق جاستاردىڭ شىعارماشىلىعىن دامىتۋعا ايرىقشا كوڭىل بولەدى. جاقىندا حالىققا جولداۋىندا رەسپۋبليكا پرەزيدەنتى نۇرسۇلتان ءابىش ۇلى نازارباەۆ كەلەسى جىلدى جاستار جىلى دەپ جاريالادى. بۇگىندە جەر-جەرلەردە جانە مەملەكەتتىك دەڭگەيدە, استانا اكىمدىگىنىڭ دەڭگەيىندە ۇلكەن كەشەندى باعدارلاما ازىرلەنۋدە, وندا جاستاردى, ونىڭ ىشىندە ەلىمىزدىڭ جانە ەلوردامىزدىڭ شىعارماشىل جاستارىن قولداۋدىڭ ءتۇرلى شارالارى قاراستىرىلادى. وسىمەن «شابىت» 21-رەت وتكىزىلىپ وتىر. فەستيۆال ەلوردامىزبەن بىرگە دۇنيەگە كەلىپ, بىرگە جاساپ, وركەندەپ كەلەدى, شىعارماشىلىق پەن ونەر شىڭدارىن باعىندىرۋدا. جىل سايىن كوزدەرىندە وت ويناعان, سوزدەرىندە جالىن بار جاس تالانتتارىمىزدى قارسى الامىز, – دەدى ە.امانشاەۆ.
قازاقستاننىڭ ەڭبەك سىڭىرگەن قايراتكەرى, كومپوزيتور تولەگەن مۇحامەدجانوۆ پەن قازاق ۇلتتىق ونەر ۋنيۆەرسيتەتىنىڭ رەكتورى, پروفەسسور ايمان قوجابەكقىزى − «شابىت» شىعارماشىل جاستار فەستيۆالىنىڭ نەگىزىن قالاعاندار. ءدال وسى سەبەپتى دە ولاردى ەل ىشىندە بايقاۋدىڭ «اتا-اناسى» دەپ اتاپ كەتكەن.
– بايقاۋدىڭ بارشا الەم بويىنشا تابىنۋشىلارى بار, ونىڭ لاۋرەاتتارى بۇگىندە مادەنيەت قايراتكەرلەرى اتانىپ ءجۇر دەپ زور ماقتانىشپەن, قۋانا ايتا الامىز, – دەگەن ايمان قوجابەكقىزى كونكۋرسانتتارعا جوعارى دەڭگەيدە ونەر كورسەتۋدى تىلەدى.
ال تولەگەن مۇحامەدجانوۆ فەستيۆالدىڭ العاش شىمىلدىعىن اشقان كۇندەرىن ەسكە الىپ, تاعىلىمدى تاريحقا ءبىر ءسات كوز جۇگىرتتى.
– نۇرسۇلتان ءابىش ۇلى ءبىرىنشى فەستيۆالدى ءوزى اشتى, زالدا وتىرىپ, قاتىسۋشىلاردى قوشەمەتتەگەن بولاتىن. ءبىر كەزدەرى ونەر كورسەتكەن جاستاردىڭ الدى 40-تان اسىپ, «شابىت» جاققان شىراقتاردىڭ كەيبىرى بۇگىن قازىلار القاسىنىڭ قۇرامىندا وتىر. ۇرپاقتار ساباقتاستىعى دەگەن وسى, بۇل ۇرپاقتان-ۇرپاققا بەرىلەتىن ەستافەتانىڭ سيمۆولى دەۋگە بولادى. جاستارعا ساتتىلىك پەن باقىت تىلەيمىن!, – دەدى ت. مۇحامەدجانوۆ.
«شابىت» فەستيۆالىنىڭ سالتاناتتى اشىلۋى بيىلعى اتالىمدار بويىنشا باسەكەگە تۇسەتىن كونكۋرسانتتاردىڭ ونەر كورسەتۋىمەن جالعاستى. حالىقارالىق كونكۋرستاردىڭ جەڭىمپازدارى مەن لاۋرەاتتارى اسلانا گۋماروۆا, نۇراي مىقتى, «باستاۋ» دۋەتى, سونداي-اق ۆيتەبسكىدە «سلاۆيان بازارى-2018» بايقاۋىنىڭ التىن جۇلدەسىن العان, امىرە اتىمەن اتاعى شىققان ەرنار سادىرباەۆ ونەر كورسەتىپ, قايرات باەكەنوۆ پەن «فورمات» ۇجىمى سوليستەرى دە ساحنادا ءان سالدى.
بيىلعى بايقاۋعا قاتىسۋعا ەلىمىزدىڭ تۇكپىر-تۇكپىرىنەن 613 ادام نيەت بىلدىرگەن. كونكۋرسانتتار اراسىندا بارشا قازاقستاننىڭ جاستارى, سونىمەن قاتار رەسەي, بەلارۋس, ۋكراينا, گرۋزيا, يزرايل, باشقۇرتستان, قىرعىزستان, ازەربايجان, وزبەكستان مەملەكەتتەرىنىڭ دە وكىلدەرى بار. بايقاۋ باعدارلاماسىنا كلاسسيكالىق مۋزىكا, حالىق مۋزىكاسى, ەسترادالىق ۆوكال, حورەوگرافيا, جۋرناليستيكا سىندى 5 نەگىزگى اتالىم ەنىپ وتىر. كەيبىر اتالىمدار سەكتسيالارعا بولىنەدى, ولاردىڭ ارقايسىسىندا نەگىزگى جۇلدەلى ورىندار مەن گران-پريدەن باسقا, تانىمال ونەر قايراتكەرلەرىنىڭ قۇرمەتىنە ارنايى اتاۋلى ديپلومدار دا قاراستىرىلعان.
– جىل سايىن 10-20 اتالىمنان وتكىزۋ وتە قيىن. سوندىقتان ولاردى وزگەرتىپ وتىرۋ تۋرالى شەشىم قابىلدادىق. بيىلعى بايقاۋدىڭ ەرەكشەلىگى, سوڭعى رەت 2011 جىلى بولعان جۋرناليستيكا اتالىمىنىڭ ەنگىزىلگەندىگى. بيىل ونى قايتا قوستىق. قاتىسۋشىلار مەن قازىلار القاسىنىڭ مۇشەلەرىنىڭ گەوگرافياسى ءارتۇرلى. قازىلار القاسىنىڭ قۇرامىندا رەسەي, ۋكراينا, قىرعىزستان سياقتى كورشى مەملەكەتتەردىڭ, اۋستريا, گەرمانيا, گرۋزيا, ماكەدونيا, يزرايل رەسپۋبليكاسىنىڭ كورنەكتى مادەنيەت قايراتكەرلەرى دە بار. بايقاۋ تۋرالى تورتكۇل دۇنيە دە بىلەدى, − دەيدى استانا اكىمدىگىنىڭ مادەنيەت جانە سپورت باسقارماسى باسشىسىنىڭ ورىنباسارى ناريما مۇحامبەتالينا.
ايا ءومىرتاي,
«ەگەمەن قازاقستان»
