اركىم ءوز باباسىنان قايراتكەر جاساپ شىعارۋ جولىندا ارپالىسقان قازىرگى كەزەڭدە كوزدەن دە كوڭىلدەن دە تاسا قالىپ كەلە جاتقان شىنايى قايراتكەردى تانىپ جانە ەلگە تانىتۋ ماقساتىنداعى ماقالا ءۇشىن باسىلىمعا دا, تىلشىگە دە العىس ايتامىن. گازەتتىڭ وقىلىمدىلىعى حالىققا قاجەتتى, وتكەندى جاڭعىرتىپ, بۇگىننىڭ ناقتى بەينەسىن بەرە بىلۋمەن ارتادى. سوندىقتان بەس جىلعا سوزىلعان قيان-كەسكى مايداندا ازاماتتىق ارىنا, قازاقى قانىنا قىلاۋ تۇسىرمەي شايقاسقان, ەل اتىنا كىر كەلتىرمەگەن بابامىز, قازاقتان شىققان تۇڭعىش كاسىبي تەڭىزشى وفيتسەر, رەسەي فەدەراتسياسى «سەۆاستوپول قالاسىنىڭ قۇرمەتتى ازاماتى» اتانعان قالماعانبەت قالاقاۋوۆ ناسيحاتتاۋعا, ۇرپاققا ۇلگى ەتۋگە تۇراتىن تۇلعا.
جەر شالعايلىعىنا, مەملەكەتتىڭ دەربەستىگىنەن بە, وسى ۋاقىتقا دەيىن قالماعانبەت اتامىز تۋرالى اتالاس اعايىن-تۋىستارى بولماسا, جالپى حالىقتىڭ, قالىڭ قازاقتىڭ بىلە بەرمەگەنى اقيقات. «ەگەمەن قازاقستان» گازەتىندە جاريالانعان ماقالا وسى توڭدى ەرىتىپ, ەسىل ەردىڭ ەڭبەگى مەن ەرلىگىنىڭ تۋعان ەلىندە لايىقتى دەڭگەيدە ارداقتالۋىنا جول اشادى دەپ جانە مەملەكەت باسشىسى ۇسىنعان «بولاشاققا باعدار: رۋحاني جاڭعىرۋ» باعدارلاماسى اياسىندا باتىر ەسىمىن ۇرپاق ساناسىنا ءسىڭىرۋ, تۋعان حالقىمەن قايتا قاۋىشتىرۋ باعىتىنداعى جۇمىستار قولداۋ تاۋىپ, سۇيەگى جات جەردە قالعان بابامىزدىڭ ەرلىگى جاڭعىرادى, رۋحى شاتتانادى دەپ ويلايمىن.
قازىرگى تاڭدا ق.قالاقاۋوۆتىڭ ءومىر جولى, قىزمەتى, سوعىس جىلدارىنداعى ەرلىكتەرى مەن سوعىستان سوڭعى قىزمەتى, وتباسىلىق جاعدايى تەرەڭ زەرتتەلۋ ۇستىندە. سوڭىندا قالعان ەكى قىزىنىڭ ءبىرى ومىردەن وتكەن ەكەن, دەنەسى سەۆاستوپول قالاسىنا جەرلەنىپتى. ەكىنشى قىزى رەسەيدەن تۋعان ەلگە – الماتى قالاسىنا كوشىپ كەلۋ باعىتىندا ءجۇر. قىزىمەن حابارلاسىپ, اكەسى تۋرالى مالىمەت الۋعا قول جەتكىزدىك. سونىمەن قاتار ماڭعىستاۋ وبلىستىق تاريحي-ولكەتانۋ مۋزەيى باسشىلىعىمەن حابارلاسىپ, مۋزەيدەن وڭىردەن شىققان تانىمال تۇلعا, ەكىنشى دۇنيەجۇزىلىك سوعىسقا باستان-اياق قاتىسىپ, سول كەزدەرى قازاق بالاسى ءۇشىن تاڭ كورىنەتىن جانە سيرەك كەزدەسەتىن ماماندىق – تەڭىزشى وفيتسەر اتانىپ, سوعىستان سوڭ دا وسى سالادا جەمىستى ەڭبەك ەتكەن ق.قالاقاۋوۆقا ارناپ بۇرىش نەمەسە ارنايى ستەند دايىنداۋدى وتىنگەن ەدىك. ءوتىنىشىمىزدى اياقسىز قالدىرماعان مۋزەي باسشىلىعىنا دا ريزاشىلىعىمدى بىلدىرەمىن, قازىرگى تاڭدا سەۆاستوپول قالاسىنان مۋزەي ءۇشىن ق.قالاقاۋوۆتىڭ كيتەلى, وزگە دە بۇيىمدارى الدىرىلۋدا. سونداي-اق ق.قالاقاۋوۆ الەمنىڭ ءار تۇكپىرىندەگى تانىمال قازاقتار تۋرالى مالىمەت جيناپ, ولار تۋرالى ارنايى ەنتسيكلوپەديا قۇراستىرۋدى قولعا العان ازاماتتاردىڭ قىزىعۋشىلىعىن تۋدىرىپ, قازىر ولار دا بابامىز تۋرالى زەرتتەۋ جۇمىستارىن قولعا الدى. ول ىستەر – جەكە رۋدىڭ داڭقىن اسىرۋعا ەمەس, باتىر ۇلدى ارداقتاۋعا, ەلدى, اسىرەسە جاس ۇرپاقتى اتا بولمىسىنا قاراپ بوي تۇزۋگە شاقىرۋعا باعىتتالاتىن بولادى.
تاعانياز بوحان ۇلى,
«كەدەي اتا» قوعامدىق قورىنىڭ توراعاسى
ماڭعىستاۋ وبلىسى
