بيىلعى جىلدىڭ ەكىنشى توقسانىندا الماتىعا كەلگەن تۋريستەر سانى 503 مىڭعا جەتتى. بۇل بىلتىرعىمەن سالىستىرعاندا 7% ارتىق. اسىرەسە رەسەيدەن كەلەتىن تۋريستەر سانى باسىم, بۇل كورسەتكىش 102 مىڭعا جەتتى. كەيىنگى ورىنداردا قىتاي (32 000) مەن وزبەكستان (24 000) تۇر. سونداي-اق تۇركيا مەن ءۇندىستاننان كەلىپ جاتقان تۋريستەر لەگى بار.
ال Visit Almaty تۋريستىك اقپاراتتىق ورتالىعىنىڭ ديرەكتورى ەدىگە مارعۇلاننىڭ ايتۋىنشا, حاب ىشكى تۋريزم تۇرلەرىن مەيلىنشە ساپالى دەڭگەيگە كوتەرۋگە مۇمكىندىك بەرەدى, تۋريستەر اعىلىپ كەلەتىن ورتالىقتى قۇرىپ, ءوڭىردىڭ تارتىمدىلىعىن ارتتىرادى, بۇكىل الەمگە تانىمال بولاتىن مادەني كودتى قالىپتاستىرماق.
سونىمەن قالاداعى امبەباپ تۋريستىك حاب تۋريستەرگە شاھاردىڭ كورىكتى جەرلەرى جايلى تولىققاندى اقپارات بەرە الادى ءارى تۋريستەردىڭ قاتارىن تولىقتىرا تۇسەتىن قالا قوناقتارى مەن تۇرعىندارىنا قولجەتىمدى باعىتتار تۋرالى جول سىلتەپ, ەستەلىك كادەسىيلار ساتىپ الۋ مەن دەمالىستى ويداعىداي وتكىزۋگە مۇمكىندىگىن بەرەدى. حاب قالانىڭ قاق ورتاسىندا, توعىز جولدىڭ تورابىندا ورنالاسقان, وعان مەگاپوليستىڭ كەز كەلگەن جەرىنەن وپ-وڭاي جەتۋگە بولادى.
الماتىداعى العاشقى تۋريستىك حاب اشىلماي تۇرىپ, وعان قالا اكىمى باۋىرجان بايبەك كەلىپ, ورتالىقتىڭ جاي-جاپسارىمەن تانىستى.
ءوز كەزەگىندە الماتى قالالىق تۋريزم جانە سىرتقى بايلانىستار باسقارماسىنىڭ باسشىسى ماقسات كيكيموۆ الداعى جىلى العاش رەت 2023 جىلعا دەيىنگى ءتۋريزمدى دامىتۋ جونىندەگى مەملەكەتتىك باعدارلاما ازىرلەنەتىندىگىن ايتا كەلە: «باعدارلامانىڭ نەگىزگى ماقساتى – ءتۋريزمنىڭ ءىجو-دەگى ۇلەسىن 8 پايىزعا دەيىن جەتكىزۋ. بۇگىندە بۇل كورسەتكىش الماتىدا 1,5 پايىزدى قۇرايدى. الماتى قالاسى اكىمىنىڭ باستاماسىمەن قۇرىلعان تۋريستىك حاب مەملەكەتتىك باعدارلاماداعى ماقساتتارعا قول جەتكىزۋگە جاعداي جاسايدى», دەيدى.
تۋريستىك حابتىڭ سالتاناتتى اشىلۋ راسىمىندە قولونەرشىلەردىڭ «قازاق ونەرى» ورتالىعى ۇلتتىق ماتەريالداردان ازىرلەنگەن كادەسىيلاردى كورسەتتى. ال تۋريستىك اگەنتتىكتەر الماتىنىڭ كورىكتى ورىندارىنا ساياحاتتاۋعا ارنالعان ەكسكۋرسيالار مەن ەكسكليۋزيۆتى تۋرلاردى ۇسىندى.
ايناش ەسالي,
«ەگەمەن قازاقستان»
الماتى
