قاشاننان قوستاناي ەلىمىزدىڭ استىقتى ءوڭىرى سانالادى. دالانى دا مالدىڭ تۇياعى توزدىراتىن. بيىل قىستىڭ سوزىلىڭقى بولعانى شارۋانى دا, ديقاندى دا قوبالجىتقان ەدى. جاز ايلارىندا جەتكىلىكتى تۇسكەن ىلعال, ديقان ەڭبەگى مەن وندىرىسكە ەنگىزىلگەن وزىق تەحنولوگيالار كوشتى تۇزەپ جىبەردى. وبلىس ديقاندارى 5 ميلليون 200 مىڭ توننا استىق جينادى. بۇل جالپى ەلىمىزدەگى جينالعان استىقتىڭ تورتتەن ءبىرىن قۇرايدى.
گەكتار اينالىمى 12 تسەنتنەردەن اسىپ جىعىلدى. ونىڭ سىرتىندا كارتوپتىڭ گەكتارىنان 400 تسەنتنەردەن كەلىپ, 72 مىڭ توننا جينالدى, 20 مىڭ توننا كوكونىس تاعى بار. فەدوروۆ اۋدانىنداعى «بۋگرەي» شارۋا قوجالىعىندا گەكتار اينالىمى 34,7 تسەنتنەردەن كەلدى. بۇل وبلىس شارۋاشىلىقتارى اراسىندا ەڭ جوعارى كورسەتكىش بولدى. ونىڭ ءىزىن الا «مالىشكو يۋ.م» شارۋا قوجالىعى 32,2, «جاناحاي» شارۋا قوجالىعى گەكتارىنان 25 تسەنتنەردەن التىن ءدان جينادى. تورعاي ءوڭىرىنىڭ قۋاڭشىلىعى كوپ, قاتال تابيعاتىنا قاراماستان ديقاندار گەكتارىنا 10 تسەنتنەردەن اسىرىپ ساپالى بيداي الدى.
ال بيىل شارۋانىڭ تاياعى قۇتتى بولعان سىڭايلى. بۇگىنگە دەيىن 74 مىڭ توننا ەت, 358 مىڭ توننا ءسۇت, سونىمەن قاتار 492 ميلليون دانا جۇمىرتقا ءوندىرىلدى. مالشارۋاشىلىعىندا بار ت ۇلىكتىڭ سانى كوبەيدى, مال وسىرەتىن اگروقۇرىلىمداردىڭ سانى 1294 بولىپ وتىر.
– بولاشاق ءونىمنىڭ نەگىزى دۇرىس قالانعاندا تابىسقا جەتەمىز. تۇقىم تولىق كولەمدە سەبىلدى. پار القاپتارى ءتورت رەت وڭدەلدى, 2 ميلليون گەكتاردان اسا سۇدىگەر جىرتىلدى. قولعا قارايتىن مالدىڭ ءبىر جارىم جىلدىق جەمازىعى, سونداي-اق سۇرلەم, پىشەن جەتكىلىكتى دايىندالدى. وتكەن جىلدارمەن سالىستىرعاندا تاماق جانە وڭدەۋ كاسىپورىندارى 1,5 ميلليارد تەڭگەگە ارتىق ءونىم ءوندىردى, – دەدى وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆ.
ەسەپتى جىلى اۋىلشارۋاشىلىعىنىڭ ينۆەستورلارعا تارتىمدىلىعى بايقالدى. بيىل وڭىردەگى اگروونەركاسىپ كەشەنىنىڭ نەگىزگى كاپيتالىنا سالىنعان قارجى كولەمى 16 پايىزعا ءوسىپ, 32 ميلليارد تەڭگەنى قۇرادى. سونىڭ ىشىندە 12,5 ميلليارد تەڭگە اۋىلشارۋاشىلىعى تەحنيكالارىن جاڭالاۋعا جۇمسالعان. مۇنىڭ ءوزى سالاداعى ەڭبەك ونىمدىلىگىن 44 پايىزعا وسىرۋگە قول جەتكىزدى, اۋىلشارۋاشىلىعىنىڭ ەكسپورتتىق قۋاتى 24 پايىزعا ارتتى, 275 ميلليون دوللاردىڭ ءونىمى جونەلتىلدى.
اۋىلشارۋاشىلىعى القاپتارىن ءارتاراپتاندىرۋ ءىسى جىلدان-جىلعا جىلدامداتا جۇرگىزىلىپ كەلەدى. قازىر بيدايدىڭ كولەمى قىسقارىپ, ول بارلىق القاپتىڭ 62 پايىزى بولىپ وتىر. سونىڭ ارقاسىندا بۇرشاق تۇقىمداستار سەبىلەتىن القاپ – 37, جەمازىق ءشوبى – 18, مايلى داقىلدار 85 پايىزعا ۇلعايدى. ال اۋىلشارۋاشىلىعىن دامىتۋدا تسيفرلاندىرۋ باعدارلاماسىنىڭ اسەرى مول بولاتىنىن دا بيىلعى جۇمىستار كورسەتتى. ەگىنشارۋاشىلىعى مەن مالشارۋاشىلىعىندا قاتار جۇرگىزىلگەن جۇمىستار بۇگىندە وڭ ناتيجەسىن كورسەتە باستادى. «ولجا سادچيكوۆسكوە» جانە «ترويانا» شارۋاشىلىقتارىندا ناقتى ەگىنشارۋاشىلىعى, «تەررا» شارۋاشىلىعىنىڭ مال بورداقىلاۋ الاڭى مەن «ولجا سادچيكوۆسكوە» شارۋاشىلىعىندا تاۋارلى-ءسۇت فەرماسىندا «اقىلدى مال فەرماسى» جوبالارى ەنگىزىلدى. قازىردىڭ وزىندە وسى شارۋاشىلىقتاردا 1 ميلليارد تەڭگەدەي ۇنەم جاسالعان.
بيىلعى اۋىلشارۋاشىلىعىن وسىلاي كوتەرىڭكى كوڭىل كۇيمەن اياقتاعان قوستاناي ءوڭىرىنىڭ ديقان-شارۋالارى تابىستى جۇمىستى ءارى قاراي جالعاستىرۋعا كىرىسىپ كەتكەن. ينۆەستيتسيا قارجىسىنا وبلىستا اۋىلشارۋاشىلىعى ونىمدەرىن تەرەڭ وڭدەۋ كاسىپورنى سالىنىپ جاتىر. ارقالىقتا اشىلاتىن زاماناۋي, قۋاتتى ەت كومبيناتى تورعاي وڭىرىندە مال باسىن كوبەيتۋگە جول اشادى. تسيفرلاندىرۋ ءىسى جالعاسادى.
ارينە اۋىل شارۋاشىلىعىندا ءتۇيىندى ماسەلەلەر دە جوق ەمەس, قوستانايدا جينالعان استىقتىڭ كولەمى قازاقستاننىڭ سولتۇستىك وڭىرلەرىندەگى كورشى وبلىستاردان اسىپ كەتكەن جوق. مۇنىڭ ءوزى الداعى ۋاقىتتا ىلكىمدىلىكتىڭ, ىزدەنىستەردىڭ كەرەك ەكەندىگىن ايعاقتايدى.
وبلىس اكىمى ارحيمەد مۇحامبەتوۆ بيىلعى تابىستى جىل ءۇشىن ەڭبەككەرلەرگە راحمەت ايتا وتىرىپ, وزا شاپقاندارعا لايىقتى ماراپاتتار تابىس ەتتى.
ءنازيرا جارىمبەت,
«ەگەمەن قازاقستان»
قوستاناي
