اسەمگۇل تۇياقباەۆا,
Zoomcare ءموبيلدى قوسىمشاسىنىڭ قۇراستىرۋشىسى:
– Zoomcare ءموبيلدى قوسىمشاسى – كوپشىلىكتىڭ قولدانۋىنا ارنالعان تەلەمەديتسينا سالاسىنداعى ءموبيلدى قوسىمشا. جالپى, تەلەمەديتسينا سالاسى الەمدىك نارىقتا ءۇش جىل بۇرىن پايدا بولعان. ال ەۋروپا مەن اقش-تا بۇل سالا تانىلا باستاعانىنا كوپ وتپەگەنىمەن, ءبىزدىڭ ستارتاپتار سەكىلدى بىرنەشە كومپانيالار نارىقتا ءوز ورنىن الىپ ۇلگەرسە, Zoomcare قوسىمشاسى – ورتالىق ازيا ەلدەرى ىشىندە العاشقى جوبا.
ءبىزدىڭ قوسىمشا – دارىگەر مەن پاتسيەنتتى تاۋلىك بويى قاشىقتىقتان ۆيدەوقوڭىراۋ جانە ءانونيمدى بايلانىستىراتىن قۇرال. مىسالى, شالعايدا تۇراتىن ازاماتتار استاناداعى نەمەسە شەتەلدەردەگى دارىگەرلەردەن ءبىزدىڭ قوسىمشا ارقىلى كەڭەس الا الادى.
ستارتاپتى باستاعاندا العاشقى قاراجات ءوز قالتامىزدان شىقتى. قازىر ءبىزدىڭ جوبامىز پايدالانۋعا 100 پايىز دايىن تۇر. ەندى كومپانيانى ءارى قاراي دامىتۋ ءۇشىن ينۆەستورلار ىزدەپ جاتىرمىز. ءۇش اي تەستىلەۋ كەزەڭىن ءساتتى وتكىزىپ, كوپشىلىككە تانىستىرىپ ۇلگەردىك. ناتيجەسىندە بىرقاتار دارىگەر مەن پاتسيەنت جوبامىزعا جوعارى باعا بەردى.
جوبا بويىنشا ۇزىن سانى جيىرما ادام ەڭبەك ەتىپ جاتساق, سونىڭ جەتەۋى – شەتەلدىك ازاماتتار. ال بۇگىنگى استانا حابىنىڭ اشىلۋى – ءبىز ءۇشىن ۇلكەن قۋانىش. ويتكەنى وسى ستارتاپتار الاڭى بىزگە التى ايعا دەيىن تەگىن كەڭسە مەن ينتەرنەت سەكىلدى قاجەتتى قۇرال-جابدىقتارىن ۇسىنۋدا. ودان بولەك, وتاندىق جانە شەتەلدىك الەۋەتتى ينۆەستورلارمەن, مەنتورلارمەن تابىستىرىپ جاتىر.
سانجار مىرزاعالىم,
«شەبەرحانا» پلاتفورماسى نەگىزىن قالاۋشىلاردىڭ ءبىرى:
– «شەبەرحانا» پلاتفورماسى كەز كەلگەن ستارتاپشىنىڭ ءوز يدەياسىن پروتوتيپتىك دەڭگەيگە دەيىن جەتىلدىرۋگە مۇمكىندىك بەرەتىن تسيفرلى الاڭ. كەز كەلگەن ونەرتاپقىش نەمەسە ستارتاپشى يدەياسىن ءبىزدىڭ «شەبەرحانادا» جۇزەگە اسىرىپ, ءونىمىن ينۆەستورلارعا نەمەسە تۇتىنۋشىلارعا كورسەتە الادى. ءبىزدىڭ پلاتفورمادا 3D پرينتەر, لازەرلىك پرينتەر مەن ەلەكترونيكا سەكىلدى ءوز يدەياڭىزدى ىسكە اسىرۋعا قاجەتتى بارلىق قۇرىلعىلار بار. ستارتاپتارعا تەگىن الاڭ ۇسىنا وتىرىپ, ءبىز باستاۋىش كاسىپكەرلەرگە مەنتورلىق قىزمەت تە ۇسىنامىز.
كەز كەلگەن يدەيانى ستارتاپ دەڭگەيىنە جەتكىزۋگە قولداۋ بىلدىرەمىز. وقۋشىلاردان باستاپ شەتەلدىك ستارتاپشىلار دا ءبىزدىڭ پلاتفورما مەن قۇرىلعىلارىمىزدى ازىرگە تەگىن پايدالانا الادى. كەيىننەن شەبەرلىك سىنىپتارى مەن ارنايى كۋرستار اشۋدى جوسپارلاپ وتىرمىز. سول كەزدە قىزمەتىمىزدى كوممەرتسيالاماقشىمىز.
«شەبەرحانا» پلاتفورماسىن ءوزىمىزدىڭ باسقا دا ستارتاپتارىمىز ءۇشىن قولداندىق. ودان بولەك قازىر استانا حابىنداعى وزگە دە ستارتاپشىلار ءبىزدىڭ الاڭدى يگىلىكتەرىنە جاراتىپ جاتىر. الداعى ۋاقىتتا «شەبەرحانا» الاڭىن وڭىرلەردەگى ستارتاپشىلاردىڭ دا پايدالانۋىنا مۇمكىندىك جاساۋ ءۇشىن «شەبەر Bus» دەگەن جوبانى قولعا الامىز. ال قازىرشە «شەبەرحانا» تەك الماتى مەن استانادا عانا جۇمىس ىستەپ تۇر. ۋنيۆەرسيتەتتى بىتىرگەننەن كەيىن ەكى جىل بويى وسى ستارتاپتى دايىندادىق. دايىن ءونىم شىققانعا دەيىن تەك قانا ءوزىمىزدىڭ قارجىمىزدى قۇيدىق. كەيىننەن مەملەكەت پەن ء«سابي» قورىنىڭ قولداۋىنا يە بولدىق.
ەرجان رىسقاليەۆ,
Clockster كومپانياسى نەگىزىن قالاۋشىلاردىڭ ءبىرى:
– استانا حاب اقپاراتتى تەحنولوگيالار ستارتاپتارىنىڭ الاڭى اشىلعالى بەرى ءبىزدىڭ كومپانيا سوندا تىركەلىپ, ەڭ العاشقى رەزيدەنتتەرىنىڭ بىرىنە اينالدى. بۇل الاڭمەن جۇمىس ىستەي وتىرىپ ءبىز از ۋاقىتتىڭ ىشىندە ۇلكەن جەتىستىكتەرگە جەتتىك. ءبىرىنشى كەزەكتە بيزنەس-مودەل قۇرۋدا تەڭدەسسىز تاجىريبە جينادىق. ەكىنشىدەن, وسى الاڭ بىزگە ينۆەستيتسيا تارتۋدىڭ, شەتەلدىك كومپانيالارمەن بايلانىس قۇرۋدىڭ وزىندىك ءادىس-تاسىلدەرىن ۇيرەتتى. ناتيجەسىندە ءبىز امەريكا-سينگاپۋر بىرلەسكەن قورىنان جانە نازارباەۆ ۋنيۆەرسيتەت جانىنداعى قوردان 135 ملن تەڭگەدەي ينۆەستيتسيا تارتتىق.
وتكەن ايدا وڭتۇستىك-شىعىس ازيا ەلدەرىنىڭ نارىعىنا شىعۋ ءۇشىن سينگاپۋردا كومپانيامىزدى تىركەدىك. قازىرگى تاڭدا اقپاراتتى تەحنولوگيالار كاسىپكەرلىگى سالاسىنداعى فيليپپيندىك كومپانيامەن كەلىسىمشارتىمىز بار. بۇل – ديستريبيۋتەرلىك سالادا ءىرى سۋپەرماركەتتەردى قولداۋعا ارنالعان جوبا.
جالپى, استانا حابىندا بۇگىنگە دەيىن 146 ستارتاپ تىركەلدى. سونىڭ ىشىندە 90 پايىزى قازاقستاندىق كومپانيالار. قالعانى قىرعىزستان, وزبەكستان, رەسەي, ۋكراينا سەكىلدى جاقىن شەتەلدەن كەلگەن كاسىپكەرلەر. ويتكەنى استانا حابى تەك قازاقستاندىق ەمەس, حالىقارالىق دەڭگەيدەگى ستارتاپتار الاڭى رەتىندە جۇمىس ىستەيدى.
دايىنداعان باۋىرجان مۇقان,
«ەگەمەن قازاقستان»
