28237 اسكەري ءبولىمى رادياتسيالىق, حيميالىق جانە بيولوگيالىق قورعانىس قىزمەتىنىڭ باستىعى مايور ابدۋجاليل ەرنازاروۆتىڭ ايتۋىنشا, وقۋ-جاتتىعۋعا ءىىم ۇلتتىق ۇلانىنىڭ قۇرىلىمىنا كىرەتىن ازاماتتىق قورعانىستاعى باۋىرجان مومىش ۇلى اتىنداعى 28237 اسكەري ءبولىمىنىڭ جەكە قۇرامى دا تارتىلدى. وقۋ-جاتتىعۋ جوسپارىنا سايكەس الاتاۋ اۋدانى العاباس شاعىن اۋدانىنداعى تەتس-2 جىلۋ-ەنەرگيا ستانساسىنىڭ اۋماعىنداعى مازۋتتىك تسەح ورتكە ورانادى. اپات ورنىنداعى اۋانىڭ لاستانۋى مەن اۋماعىنىڭ زاقىمدالۋىن تەكسەرۋ جانە ادامداردى قۇتقارۋ, توتەنشە جاعداي سالدارىن جويۋ بويىنشا 28237 اسكەري ءبولىمى رادياتسيالىق-حيميالىق جانە بيولوگيالىق قورعانىس روتاسىنىڭ جەكە قۇرامى ارحر جانە ارس-14 ارنايى كولىكتەرىمەن اپات ورنىنا دەرەۋ جەتتى. اۋداننىڭ حيميالىق احۋالى مەن جاي-كۇيىن باعالالاندى. اۋانىڭ, توپىراقتىڭ قۇرامى تەكسەرىلىپ, ناتيجەسى الماتى قالاسىنىڭ قوعامدىق دەنساۋلىقتى ساقتاۋ دەپارتامەنتىنىڭ ازاماتتىق قورعانىستاعى رادياتسيالىق, حيميالىق جانە بيولوگيالىق قىزمەتىنە ساراپتاماعا جىبەرىلدى.
وقۋ-جاتتىعۋ ناتيجەسى ۇلاندىق قۇتقارۋشىلاردىڭ دايىندىعى مەن كاسىبي بىلىكتىلىگىنىڭ جوعارى دەڭگەيدە ەكەندىگىن كورسەتتى. قۇتقارۋ قىزمەتى سالاسىنان تاجىريبە الماسقان ۇلاندىقتاردىڭ ءىس-تاجىريبەسىنە الماتى قالالىق توتەنشە جاعداي جونىندەگى دەپارتامەنتىنىڭ وكىلدەرى جوعارى باعا بەردى.
وقۋ-جاتتىعۋلارعا ورتالىق مەملەكەتتىك ورگانداردىڭ جەدەل توپتارى, ازاماتتىق قورعانىس جۇيەسىندەگى قىزمەتتەر مەن ءىىم قۇرىلىمىنداعى اپاتتىق-قۇتقارۋ قىزمەتتەرى مەن اۋماقتىق-قۇرىلىمدىق ورگاندارىنىڭ قىزمەتكەرلەرى قاتىستى.
ەلۆيرا سەرىكقىزى,
«ەگەمەن قازاقستان»
الماتى
