بۇل جونىندە تۇركىستان وبلىسىنىڭ اكىمى جانسەيىت تۇيمەباەۆ ورتالىق كوممۋنيكاتسيالار قىزمەتىنىڭ تۇركىستان قالاسىندا وتكىزگەن كوشپەلى ءباسپاسوز كونفەرەنتسياسىندا مالىمدەدى. «ەلباسى جولداۋى مەن «رۋحاني جاڭعىرۋ» باعدارلاماسىن جۇزەگە اسىرۋ جانە تۇركىستان قالاسىن دامىتۋ بارىسى» تاقىرىبىنداعى ءباسپاسوز ءماسليحاتى جاڭا فورماتتا ءوتتى. ق.ا. ياسساۋي كەسەنەسى الدىندا وتكەن كوشپەلى وتىرىستا وبلىس اكىمى ءوڭىردىڭ ەكونوميكالىق-الەۋمەتتىك احۋالىنا كەڭىنەن توقتالىپ, جۋرناليستەر ساۋالىنا جاۋاپ بەردى.
تۇركىستان قالاسىندا جاڭا قۇرىلىستاردىڭ ساۋلەت ءستيلى جەرگىلىكتى ۇلتتىق سالت-داستۇرگە سۇيەنەتىن بولادى. ەلباسىنىڭ تۇركىستان وبلىسىنا ءىس-ساپارى بارىسىندا, بىرقاتار ۇلتتىق كومپانيالارعا, بيزنەس وكىلدەرى مەن شەت ەلدەردىڭ ينۆەستورلارىنا 16 نىساندى سالۋ بويىنشا ۇسىنىستار جاسالىنعان بولاتىن.
سونداي-اق رەسپۋبليكالىق ماڭىزى بار قالالاردىڭ جانە وبلىس اكىمدىكتەرىمەن 13 قۇرىلىس نىسانىن سالۋ كوزدەلىپ وتىر. مىسالى, «ERG» كومپانياسى «تۇركى الەمى» ورتالىعىن, «بازيس –ا» حولدينگى قازاق دراما تەاترىن, «SembolConstruction» اق-ى تۋريستىك باعىتتاعى كوللەدج, «قازاقمىس كورپوراتسياسى» جشس-ءى « ۇلى دالا ەلى» ورتالىعىن سالاتىن بولادى. سونىمەن قاتار, تۇركىستان قالاسىنىڭ دامۋى بويىنشا 2018-2021 جىلدارعا ارنالعان دامۋ تۇجىرىمداماسى جاسالىنىپ, قالانى تاريحي-كيەلى, قۇرىلىس سالۋدى رەتتەۋ, اكىمشىلىك-ىسكەرلىك ورتالىعى سىندى 3 ايماققا ءبولىپ, دامىتۋ جۇمىستارى ازىرلەنۋدە. جاڭا اۋەجاي قۇرىلىسى جۇرگىزىلەتىن اۋماق تا بەلگىلەنگەن.
جۋرناليستەردىڭ سۇراعىنا بەرگەن جاۋابىندا وبلىس اكىمى وڭىردە 28 مىڭ ادام باسپانا كەزەگىندە تۇرعانىن ايتىپ ءوتتى. تۇرعىنداردى باسپانامەن قامتاماسىز ەتۋ ماقساتىندا وڭىردە 73 كوپقاباتتى تۇرعىن ءۇي قۇرىلىسى جۇرگىزىلۋدە. سونداي-اق اۋدانداردا دا كوپقاباتتى ۇيلەر سالۋ قولعا الىنعان. مىسالى تولەبي اۋدانىنىڭ ورتالىعىندا 480 پاتەرلى 8 كوپقاباتتى تۇرعىن ءۇي پايدالانۋعا بەرىلگەن. سارىاعاشتا 13 كوپقاباتتى تۇرعىن ءۇي سالىنۋدا. تابيعي ءوسىمى جوعارى وڭىردە بالاباقشا, مەكتەپ سالۋ ماسەلەسى كۇن تارتىبىنەن تۇسكەن ەمەس. بالاباقشامەن قامتۋ قازىر 84 پايىز بولىپ وتىر. ال 8 اپاتتى, 7 ءۇش اۋىسىمدى مەكتەپ ماسەلەسى بىرتىندەپ شەشىمىن تاپپاق. وبلىس اۋماعىنداعى سامانمەن سالىنعان مەكتەپتەردى جاڭارتۋ دا ۋاقىت ەنشىسىندەگى ماسەلە. سونداي-اق وبلىس اكىمى بريفينگتە جىل باسىنان بەرگى 9 ايدا اتقارىلعان جۇمىستارعا كەڭىنەن توقتالدى.
عالىمجان ەلشىباي,
«ەگەمەن قازاقستان»
تۇركىستان وبلىسى.
