جاس سۋرەتشىلەردىڭ «ەنەرگيا. جاستىق شاق. ونەر» اتتى بايقاۋ-كورمەسى قازاقستان, قىرعىزستان, تۇركيا, ۋكراينانىڭ ءارتۇرلى ايماقتارىنان كەلگەن شەبەرلەردىڭ سان الۋان باعىتتار مەن تەحنيكالىق تاسىلدەردە ورىنداعان الپىستان استام تۋىندىسىن قامتىعان. بيىل بايقاۋعا قاتىسۋعا ءوتىنىش بىلدىرگەن سەكسەننەن استام سۋرەتشىنىڭ تەك ەلۋى عانا ىرىكتەۋدەن وتكەن. جىل بويى ولار زاماناۋي سۋرەتشىنىڭ ارمانى نە, جاس سۋرەتشىلەر قازىرگى زامانعى الەۋمەتتىك ماسەلەلەر جونىندە نە ويلايدى, قوعامعا قانداي ۇندەۋ تاستايدى دەگەن ساۋالدار شوعىرىنا جاۋاپ تابۋ ءۇشىن ىزدەنەدى.
– بايقاۋدىڭ ماقساتى – كوركەمدىك دەڭگەيى جوعارى, مازمۇنى جاعىنان ماڭىزدى ءارى وزەكتى تۋىندىلاردى جارىققا شىعارۋ. سونداي-اق قازاقستاننىڭ زاماناۋي ونەرىن جانە ونىڭ الەمدىك كوركەمدىك كەڭىستىككە ينتەگراتسيالانۋىنا قولداۋ كورسەتۋ. بايقاۋ مەن كورمە بەينەلەۋ ونەرىنە قىزىعۋشىلىق تانىتاتىن اۋديتوريانىڭ نازارىنان تىس قالماي, جاڭا ەسىمدەردى اشىپ, جاستاردىڭ شىعارماشىلىعىنا دەم بەرىپ, ەلىمىزدىڭ بەينەلەۋ ونەرىنىڭ جاس شەبەرلەرىنىڭ كاسىبي كوركەمدىك دەڭگەيىن كوتەرەتىنى ءسوزسىز, – دەيدى ء ا.قاستەەۆ اتىنداعى ونەر مۋزەيىنىڭ قوعاممەن بايلانىس ءبولىمىنىڭ جەتەكشىسى كلارا يساباەۆا.
ۇيىمداستىرۋشىلار شىعارمالاردى باعالاۋدا سۋرەتشىنىڭ كوركەمدىك مانەرىنە, يدەيا ۇشقىرلىعىنا, شىعارمانىڭ مازمۇنىنا ەرەكشە كوڭىل بولىنگەنىن ايتادى. بايقاۋ قورىتىندىسى بويىنشا جاس دارىن باۋىرجان جەتپىسباەۆ ءوزىنىڭ «ماڭگىلىك ەل» شىعارماسىمەن بايقاۋ جەڭىمپازى دەپ تانىلدى. ونەرسۇيەر قاۋىمنىڭ ىستىق ىقىلاسىنا بولەنگەن «ارمانداعى ترامۆاي» كارتيناسىنىڭ اۆتورى راۋان سۇلەيمەنوۆ جۇلدەلى ەكىنشى ورىندى ەنشىلەسە, كوپتەگەن بايقاۋلاردىڭ جەڭىمپازى تالانتتى سۋرەتشى الماس نۇرعوجاەۆ «جاڭا اۋەن» دەپ اتالاتىن تۋىندىسىمەن ءۇشىنشى ورىنعا يە بولدى.
«مۇنداي بايقاۋلار ونەر ادامى ءۇشىن اسا قاجەت. ەڭبەگىڭنىڭ باعالانعانى شىعارماشىلىق تىنىسىڭدى اشىپ, شابىتىڭا شابىت قوسادى. ۇيىمداستىرۋشىلار القاسىنا ۇلكەن راحمەت. مەن ءوز تۋىندىمدا ەسكى مەن جاڭانى, تاريح پەن بۇگىندى ساباقتاستىرعىم كەلدى», دەيدى بايقاۋ جۇلدەگەرى الماس نۇرعوجاەۆ.
بەينەلەۋ ونەرىندەگى جاڭا زامان ايشىقتارىن ءبىر ارنادا توعىستىرعان ايتۋلى كورمە قاراشا ايىنىڭ سوڭىنا دەيىن جالعاسادى.
ارمان وكتيابر,
«ەگەمەن قازاقستان»
الماتى
